ދައުލަތަށް ޑިއުޓީ ދައްކައިގެން އެތެރެކުރާ ސިނގިރޭޓަށް ވުރެ ވަގަށް އެތެރެކުރާ ސިނގިރޭޓުގެ އަދަދު ގިނަ ކަމަށް ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް ވިދާޅުވެއްޖެ އެވެ.

ހޯމަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން ނާޒިމް ވިދާޅުވީ ސިނގިރޭޓުގެ ޑިއުޓީ ބޮޑުކުރި ފަހުން ދައުލަތަށް ޑިއުޓީ ދައްކައިގެން ގާނޫނާއި ގަވާއިދާ އެއްގޮތަށް ރާއްޖެ އެތެރެކުރާ ސިނގިރޭޓަށް ވުރެ ސްމަގްލް ނުވަތަ ވަގަށް ރާއްޖެ އެތެރެކުރާ އަދަދު އިތުރު ކަމަށެވެ.

ނާޒިމް އިތުރަށް ވިދާޅުވީ، ސިނގިރޭޓާ އެއްގޮތަށް ވޭޕް ވަގަށް އެތެރެކުރާ މިންވަރު ވެސް އިތުރުވެފައި ވަނީ އިންތިހާއަށް ކަމަށެވެ. ކަސްޓަމްސް އިން ވެސް ކޮންމެވެސް ގޮތަކުން މިފަދަ ބައެއް ތަކެއްޗަށް ކްލިއަރެންސް ދީފައިވާކަން ފާހަގަކޮށް ނާޒިމް ވިދާޅުވީ މިފަދަ ތަކެތި ވިއްކާ، އިޝްތިހާރު ކުރާ ޕޭޖުތައް ސޯޝަލް މީޑިއާ އިން ފެންނަން ހުންނަ ކަމަށެވެ.

އެހެންކަމުން މިކަންކަން ކޮންޓްރޯލް ކޮށް ހުއްޓުވުމަށްޓަކައި ކަސްޓަމްސްގެ ހިންގުމާއި، އެނޫންވެސް ކަމާ ގުޅޭ އިދާރާތަކަށް ބަދަލުތަކެއް ގެންނަން ޖެހޭ ކަމަށް މެންބަރު ވިދާޅުވި އެވެ. އަދި ވިދާޅުވީ އެ މައްސަލަ ދިރާސާ ކުރުމަށް ފަހު 241 ކޮމިޓީން ދީ ފައިވާ ރިކޮމެންޑޭޝަންތަކާއެކު ގިނަ ކަންކަން އިސްލާހު ވެގެން ދާނެ ކަމަށް ގަބޫލު ކުރައްވާ ކަމަށެވެ.

ސިނގިރޭޓް އަގުބޮޑު ކުރުމާއެކު އެންމެފުރަތަމަ ފަޅާއެރީ ގެއެއްގައި ފުޅާ ދާއިރާއެއްގައި ފެކްޓްރީ ހަދައިގެން ސިނގިރޭޓް އުފައްދަނިކޮށެވެ. ފުލުހުން އަތުލައިގަތީ އެކަމަށް ބޭނުންކުރި ތަކެއްޗާ ވެސް އެކު ރެޑް ހޭންޑްކޮށެވެ. އޭގެ ފަހުން ވަގު ސިނގިރޭޓް ތައް ބަހައްޓާފައި ހުރި ގުދަނެއްވެސް ހިފެހެއްޓި އެވެ. އެންމެ ފަހުން މިހާރު އެންމެ ބޮޑަށް ދެކެވެނީ އެމްޕީއެލްގެ ބެލުމުގެ ދަށުގައި ހުރި އެތައް މިލިއަން ސިނގިރޭޓު ހުރި މާސިންގާ ބޮޑު ސިނގިރޭޓް ދެ ކޮންޓޭނަރު ވަގަށް ނެގި ވާހަކައެވެ.