ރައީސް ޑރ.މުހައްމަދު މުއިއަޒު ޖައްސަވަނީ ނުބައި ހިސާބެއް ކަމަށާއި، ރައްޔިތުންގެ މަޖިލީސް މެދުވެރިކޮށް ޤާނޫނަށް ބަދަލުގެނެސްގެން އާއްމުން ތަޅު އެޅުވޭނެ ކަމަށް ހީކޮށްގެން އެ މަނިކުފާނު ޖައްސަބާ ހިސާބަކީ ރަނގަޅު ހިސާބެއް ނޫން ކަމަށް ދާންދޫ ދާއިރާގެ ކުރީގެ މެމްބަރު ޔައުގޫބް އަބްދުﷲ ވިދާޅުވެއްޖެއެވެ.

ޔައުގޫބް އެފަދައިން ވިދާޅުވީ ލޫޓުވައިފި، ލޫޓުވައިފި މުޒާހަރާ އިން ހައްޔަރު ކުރި މީހުންނާއި އެކު ބުރާސްފަތި ދުވަހުގެ ރޭ އެމްޑީޕީ އިން ބޭއްވި ސުވާލާއި ޖަވާބު ސެޝަންގައި ވާހަކަދައްކަވަމުންނެވެ.

ޤާނޫނުތަކަށް ބަދަލުކޮށްގެން އާއްމުންނަށް ލިބޭ ޚިޔާލުފާޅުކުރުމުގެ ހައްގުތައް ހަނިކުރުމުން އާއްމުން ފަހަތަށް ޖެހޭނެ ކަމަށް ރައީސް މުއިއްޒު އަށް ހީފުޅުވި ނަމަވެސް އެއީ ކުށް ހީއެއް ކަމަށް އޭނާ ވަނީ ވިދާޅުވެފައެވެ. މީގެ އިތުރުން ނޫސްވެރިކަމާއި މުޒާހަރާކުރުން ތަޅު އަޅުވަނީ ޤައުމު ލޫޓުވުމުން ވެސް އެކަމާއި ދެކޮޅަށް ބަސް ބުނެވޭނެ ހުރިހާ މަގެއް ބަންދުކުރަން ކަމަށް ޔައުގޫބް ވަނީ ތުހުމަތުކުރައްވާފައެވެ.

މަޖިލީސް މެދުވެރިކޮށް ނޫސްވެރިކަން ހިފަހައްޓަން މަސައްކަތްކޮށްފައިވާ ކަމަށް ޔައުގޫބް ވިދާޅުވިއެވެ. އަދި ނޫސްވެރިކަމުގެ ހައްގަށް އަރައިގަންނަން މި ސަރުކާރުން މަސައްކަތް ކުރުމުން އެކަން މުޅިން ކާމިޔާބު ނުވި ކަމަށް އޭނާ ފާހަގަކުރެއްވިއެވެ. އެހިސާބުން އަރައިގަތީ ރައްޔިތުންގެ އަސާސީ ހައްގަކަށް ކަމަށާއި، އެއީ މަގުމައްޗަށް ނުކުމެ މުޒާހަރާ ކުރުމުގެ ހައްގު ކަމަށް ވެސް އޭނާ ވިދާޅުވިއެވެ.

"ޑރ.މުއިއްޒުގެ ވިސްނުމުގައި ހުރީ މަޖިލީސް ތެރެއިން ޚާއްސަކޮށް ޤާނޫނުއަސާސީގެ އެކި އެކި މާއްދާތައް ތަޅު އަޅުވާފައި، ދިވެހި ރައްޔިތުން ހުއްޓުވާފައި، ދިވެހި ރައްޔިތުން ގޭގައި ބަނދެފައި ބޭތިއްބޭނެ ކަމަށް." ޔައުގޫބް ވިދާޅުވިއެވެ.

ޔައުގޫބް ވިދާޅުވީ އެފަދަ ފިއްތުންތަކަށް އެމްޑީޕީ އިން ފަހަތަށް ނުޖެހޭނެކަން މީގެ ކުރީގެ ވެރިކަންތަކުގައި އާއި މި ވެރިކަމުގައި ވެސް އެމްޑީޕީން ވަނީ ސާބިތުކޮށްދީފައި ކަށެވެ. ރައީސް މުއިއްޒު ޖައްސަވަނީ ނުބައި ހިސާބެއް ކަމަށާއި ޖަލަށް ދާން ޖެހުނަސް އެމްޑީޕީ އިން ފަހަތަށް ނުޖެހޭނެ ކަމަށް ޔައުގޫބް ވިދާޅުވިއެވެ.

"އެހެންނަމަވެސް އަޅުގަނޑުމެން އެމްޑީޕީ އަކީ އެހެން ދައްކާ ބިރަކަށް ގޭގައި މަޑުން ތިބޭނެ ބައެއް ނޫންކަން މީގެ ކުރިން ވެރިކަން ކުރި މީހުންނަށް ވެސް އަދި މިހާރު ވެރިކަމުގައި ހުންނެވި ބޭފުޅާ އަށް ވެސް އެނގޭނެ ކަމެއް އެއީ." ޔައުގޫބް ވިދާޅުވިއެވެ.

ޔައުގޫބް ވިދާޅުވީ އޮކްޓޯބަރ 3ގެ މުޒާހަރާ ކާމިޔާބު ކަމަށާއި ކުރިއަށް އޮތްތަނުގައި އިދިކޮޅުގެ މުޒާހަރާތައް ދާނީ އިތުރަށް ވަރުގަދަ ވަމުން ކަމަށެވެ. އަދި ނޮވެމްބަރ 17 ވަނަ ދުވަހު ބާއްވާ އެމްޑީޕީގެ މުޒާހަރާ އަށް އާއްމުން ނުކުންނާނީ ކުރިއަށް ވުރެ ގަދަކޮށް ކަމަށް ވެސް ޔައުގޫބް ވަނީ ވިދާޅުވެފައެވެ.

ރައީސް ޑރ މުހައްމަދު މުއިއްޒުގެ ޚުދުމުހުތާރު ސަރުކާރު ޖަވާބުދާރީ ކުރުމަށް އަންނަ ނޮވެމްބަރު މަހުގެ 17 ވަނަ ދުވަހު ބޮޑު މުޒާހަރާއެއް ބޭއްވުމަށް އެމްޑީޕީން ނިންމާފައި ވަނީ މި އޮކްޓޯބަރ މަހުއެވެ. އެގޮތަށް ނިންމާފައި ވަނީ 5 އޮކްޓޯބަރގައި ބޭއްވި އެމްޑީޕީ ޤައުމީ މަޖިލީހުގެ ޖަލްސާގައެވެ.