އޭސީސީ ގެ މެމްބަރުން އަސާސުން ބޭރުން ކުރާ ކަންކަން ބަލައިދިނުމަށް އެދި މަޖިލީހަށް ހުށަހަޅަނީ
17 އޮކްޓޯބަރު 2025 | ހުކުރު 07:03އުސޫލުން ބޭރުން އޭސީސީ ގެ މެމްބަރުން މިހާރު ވަރަށް ބައިވަރު ކަންތައްތަކެއް ހިންގަމުން އެބަގެންދޭ
އެމްޑީޕީގެ ޕީޖީ ލީޑަރު އިބްރާހިމް ނާޒިލް
އަސާސުން ބޭރުން އެންޓި ކޮރަޕްޝަން ކޮމިޝަން (އޭސީސީ)ގެ މެމްބަރުން މި ހިންގާ ކަންކަން ބަލައިދިނުމަށް އެދި މަޖިލީހުގެ މިނިވަން މުއައްސަސާ ކޮމިޓީ އަށް ހުށަހަޅުއްވާނެ ކަމަށް ރައްޔިތުންގެ މަޖިލީހުގެ އެމްޑީޕީގެ ޕީޖީ ލީޑަރު އިބްރާހިމް ނާޒިލް ވިދާޅުވެއްޖެއެވެ.
ކުރީގެ ބަންޑާރު ނައިބު އަލްއުސްތާޛް އިބްރާހީމް ރިފްއަތު އޭސީސީ އަށް ހާޒިރުކުރުމާ ގުޅިގެން ރާއްޖެޓިވީ އަށް ދެއްވި ބަސްދީގަތުމެއްގަ ނާޒިލް ވިދާޅުވީ، އުސޫލުން ބޭރުން އޭސީސީ ގެ މެމްބަރުން މިހާރު ވަރަށް ބައިވަރު ކަންތައްތަކެއް ހިންގަމުން އެބަގެންދާކަމަށާއި، މިކަން ހުއްޓުވުމަށް މަޖްލިސް ތެރެއިން ކުރެވެންހުރި ހުރިހާ ކަމެއް ކުރައްވާނޭ ކަމުގައެވެ.
އެސީސީގެ މެމްބަރުން އަސާސުން ބޭރުން މިހިންގާ ކަންކަން ބަލައިދިނުމަށް އެދި ރައްޔިތުންގެ މަޖިލީހުގެ މިނިވަން މުއައްސަސާ ކޮމިޓީ އަށް ހުށަހަޅާނަން. މިކަމުގަ މަޖްލިސް ތެރެއިން ކުރެވެން ހުރި ހުރިހާކަމެއް ކުރާނަން. އެބޭފުޅުންގެ އިތުބާރާ ދޭތެރޭ އާއްމު ދިވެހި ރައްޔިތު މީހާއަށް ސުވާލު އުފެދޭ މިންވަރަށް މިހާރު އެކަންތައްތައް ކުރިޔަށް އެދަނީ. ސަރުކާރުގެ ސުޕަރ މެޖޯރިޓީ މަޖިލީހެއް އޮތަސް ކުރެވެން އޮންނާނެ ކިތަންމެ ކަމެއްވެސް. އެކަންތައްތައް ޔަގީން ކަށަވަރުކޮށް އަޅުގަނޑުމެން ކުރާނަން. ދިވެހި ރައްޔިތުންނަށް އެކަމުގެ ފުރިހަމަ ޔަގީންކަން އަރުވަން.އެމްޑީޕީގެ ޕީޖީ ލީޑަރު އިބްރާހިމް ނާޒިލް
މަޖިލީހުގައި ރައީސް މުއިއްޒުގެ ސުޕަރމެޖޯރިޓީ އޮތަސް އެމްޑީޕީ އިން މިކަމުގައި ކުރެވެން އޮތް ހުރިހާކަމެއް ކުރާނެ ކަމުގެ ޔަގީންކަން ނާޒިލް ވަނީ ދިވެހި ރައްޔިތުންނަށް އަރުވާފައެވެ.
ކުރީގެ ބަންޑާރު ނައިބު ރިފްއަތު، އޭސީސީ އަށް ހާޒިރު ކޮށްފައި ވަނީ އޭނާގެ މައްޗަށް ކުރާ ތުހުމަތެއް ވެސް ނެތި ކަމަށާއި އެއީ ޖިނާއީ ކުށެއް ކަމަށް ރިފްއަތުގެ ޤާނޫނީ ވަކީލް ނޫރުއްސަލާމް އަބޫބަކުރު ވެސް ވަނީ ވިދާޅުވެފައެވެ. އަދި ރިފްއަތު އޭސީސީ އަށް ހާޒިރުކުރާނެ ސަބަބުވެރި އެއްވެސް ކަމެއް އޭސީސީ އަށް ދެއްކިފައި ނުވުމާއި އެކު ރިފްއަތު އޭސީސީ އަށް ހާޒިރު ކުރީ ރަނގަޅަށް ނޫން ކަމަށް އޭނާ ވިދާޅުވިއެވެ.
މީގެ އިތުރުން ރިފްއަތު ހާޒިރުކުރުމަށް ފަހު ރިފްއަތާ ދެކޮޅަށް އޭސީސީ އިން ދެއްކި ބައެއް ލިޔުންތައް ހޯދަން އެދުމުން އެ ލިޔުންތައްވެސް ފޯރުކޮށްދީފައި ނުވާ ކަމަށާއި، އެއީ ވެސް ޖިނާއީ އިޖުރާތުގެ ގާނޫނުން ރިފްއަތު އަށް ލިބެންޖެހޭ ހައްގެއް ނިގުޅައިގަތުން ކަމަށް ވަކީލް ވަނީ ފާހަގަކުރައްވާފައެވެ.
އިދިކޮޅު ޕާޓީގެ ދައުރަށް ހުރަސް އަޅަން ރައީސް މުއިއްޒުގެ ސަރުކާރުން ރާވައިގެން އެމްޑީޕީގެ އިސްވެރިން އަދި އެމްޑީޕީ ސަރުކާރުގެ ވަޒީރުން އޭސީސީއަށް ހާޒިރު ކުރާ ކަމަށް ބުނެ ގިނަ ބަޔަކު އަންނަނީ ރައީސް މުއިއްޒަށް ފާޑު ކިޔަމުންނެވެ. ޚާއްސަކޮށް މިއީ ސަރުކާރާ ދެކޮޅަށް އެމްޑީޕީ އިން ކުރިއަށް ގެންދާ ހަރަކާތްތައް ފަހަތަށް ޖައްސައި، އެމްޑީޕީގެ އިސްވެރިން އަދި މެމްބަރުންނަށް ބިރު ދެއްކުމުގެ އަމަލެއް ކަމަށް ވެސް ގިނަ ބަޔަކު އަންނަނީ ބުނަމުންނެވެ.
އެމްޑީޕީ އިން އިސްވެ އޮކްޓޯބަރު 3 ވަނަ ދުވަހުގެރޭ ކުރި މުޒާހަރާގެ ފަހުން ސަރުކާރުން އަންނަނީ ވަކި ފަރާތްތަކަކަށް އަމާޒުކޮސް ސިޔާސީ ތަހުގީގު ތަކެއް ހިންގަމުންނެވެ. އަދި މުޒާހަރާގެ ތެރެއިން ހައްޔަރު ކުރި 6 މީހަކު ވަނީ އެއްވެސް ހައްގަކާ ނުލާ މިހާރުވެސް ދޫނިދޫ ޖަލުގަ ބަންދުކޮށްފައެވެ. އަނެއްކާވެސް ނޮވެމްބަރު 17 ވަނަ ދުވަހު އެމްޑީޕީ އިން ބޮޑު އެއްވުމެއް ބޭއްވުމަށް ތައްޔާރުވަމުން އަންނައިރު، ސަރުކާރުން ދަނީ ކެނޑިނޭޅި މިއެއްވުމަށް ހުރަސް އެޅުމުގެ ގޮތުން އެތައްކަމެއް ކުރަމުންނެވެ.
