ޗާގޯސް މައްސަލާގައި ކުރީ ސަރުކާރުން ދައުލަތަށް ގެއްލުންވާނެ ލިޔެކިޔުމެއް ބޭރު ބަޔަކަށް ދީފައިނުވާ ކަމަށް މުއިއްޒުގެ ބަންޑާރަ ނައިބު އުޝާމް ވިދާޅުވެއްޖެ

ޗާގޯސްގެ މައްސަލާގައި ދިވެހި ދައުލަތަށް ގެއްލުންވާނެ ފަދަ ލިޔެކިޔުންތަކެއް އޭރުގެ ބަންޑާރަނައިބު އިބްރާހިމް ރިފްއަތު ބޭރުގެ ބަޔަކަށް ދިން ކަމަށް ބުނާ ވާހަކަ ބަންޑާރަނައިބު އަހުމަދު އުޝާމް ދޮގުކުރައްވައިފި އެވެ.

ބުދަ ދުވަހު ކުރިއަށް ގެންދިޔަ ރައްޔިތުން މަޖިލީހުގެ ޖަލްސާގައި، ސަރުކާރުގެ ޕާޓީ، ޕީއެންސީ އަށް ނިސްބަތްވާ ހުޅުދޫ ދާއިރާގެ މެންބަރު މުހައްމަދު ޝާހިދު ވަނީ ޗާގޯސްގެ މައްސަލައާ ގުޅޭގޮތުން ސުވާލު ކުރައްވާފައެވެ. މެންބަރު ޝާހިދު ވިދާޅުވީ، ބާނަ ބާނަ ތިއްބާ ދިވެހިންގެ މަސްކަނޑު ބޭރުގެ ބަޔަކަށް ނިމިދިޔަ ސަރުކާރުން ދީފައިވާ ކަމަށާއި، އޭރުގެ ދައުލަތުގެ ބަންޑާރަ ނައިބު މިކަމާ ގުޅޭ ލިޔެކިއުންތަކެއް ބޭރުގެ ބަޔަކަށް ދީފައިވާ ކަމަށެވެ. އަދި އެފަދަ އެއްވެސް ލިޔެ ކިއުމެއް ފެންނަން އެބައޮތްތޯ މެންބަރު ޝާހިދު ބަންޑާރަ ނައިބު އާ ސުވާލު ކުރެއްވިއެވެ.

މި ސުވާލުތަކަށް އުޝާމް ވިދާޅުވީ މިމައްސަލައާ ގުޅޭ އެއްވެސް ލިޔެކިއުމެއް ބޭރުގެ ފަރާތްތަކަށް ދީފައިވާ ކަމަށް ގަބޫލު ނުކުރެވޭ ކަމަށާއި، އެއީ މި ސަރުކާރުން ވަރަށް ތަފްސީލުކޮށް ބަލަމުން ގެންގޮސްފައިވާ މައްސަލަ އެއް ކަމުގައެވެ.

އަޅުގަނޑަކަށް ގަބޫލެއް ނުކުރެވޭ އެއްވެސް ލިޔެކިއުމެއް ބޭރުގެ ފަރާތްތަކަށް ދީފައި ހުރި ކަމަކަށް އެނގޭތޯ. އަޅުގަނޑުމެން މި މައްސަލަ ހަމަ އަޅުގަނޑު މިމަގާމާ ހަވާލުވި ހިސާބުން މިމައްސަލަ ވަރަށް ބޮޑަށް ދިރާސާ ކުރުމަށްފަހު މިކަމަށް އަޅުގަނޑުމެންގެ ސަރުކާރުގައި ހަމަ އަޅަންޖެހޭ ފިޔަވަޅުތައް އެޅުމަށްޓަކައި މިމައްސަލަ ކުރިއަށް ގެންދިއުމަށްޓަކައި މިހާރު ވެސް މަސައްކަތްތަކެއް ކުރެވެމުން އެބަދޭ. އަޅުގަނޑަށް ގަބޫލެއް ނުކުރެވޭ މިދިޔަ ސަރުކާރުގެ ބަންޑާރަ ނައިބު ބަޔަކަށް ލިޔެކިއުންތަކެއް ދީފައި ހުރި ކަމަކަށް.

ބަންޑާރަނައިބު އަހުމަދު އުޝާމް

ޗާގޯސްގެ މައްސަލާގައި މިސަރުކާރުގެ ރައްޔިތުން މަޖިލީހުގެ މެންބަރުންނާއި، ސިޔާސީ ބޭފުޅުން ގެންދަވަނީ ހަގީގަތާ ހިލާފު ދޮގު ވާހަކަތައް ފަތުރަމުން ކަން ބަންޑާރަ ނައިބު އުޝާމުގެ ޖަވާބުން ސާފުކޮށް އެނގިގެން ދިޔަކަން ފާހަގަ ކުރެވެއެވެ. އަދި ކުރީ ސަރުކާރުގެ ވެރިން ކަނޑުވިއްކާލާ ފައިސާ ނެގި ކަމަށް ވެސް ބުނަމުން ގެންދިޔައެވެ.

ރާއްޖޭގެ ކަނޑުގެ ބައެއް ވިއްކާލާފައިވާ ކަމަށް ތުހުމަތު ކުރަމުންދާއިރު، މި ސަރުކާރުގެ ފުރަތަމަ 100 ދުވަހުގެ ތެރޭގައި އިޓްލޮސްގެ ނިންމުން އިސްތިއުނާފުކުރާނެ ކަމަށް ރައީސް މުއިއްޒު ވައުދުވެވަޑައިގެންނެވިއެވެ. ނަމަވެސް މިއަދާ ހަމައަށް އަދިވެސް އެކަން ވެފައެއް ނެތެވެ.

އިނގިރޭސިވިލާތުން ޗާގޯސް މޮރިޝަސް އަށް ދީފައިވަނީ 22 މެއި 2025 ގައެވެ.

ޗާގޯސްގެ ސިޔާދަތީ ބާރު މޮރިޝަސް އަށް ލިބޭ ކަމަށް ބައިނަލްއަގުވާމީ ކޯޓުން ނިންމި ނިންމުމާއެކު، ޗާގޯސް އާއި ރާއްޖެއާ ދެމެދު އޮތް ކަނޑުގެ އިން ވަކިކުރުމަށް އިޓްލޮސް އަށް މޮރިޝަސް އިން ހުށަހެޅި މައްސަލާގައި އެ ކޯޓުން ވެސް ވަނީ އެ އިންޓަނޭޝަނަލް ކޯޓު އޮފް ޖަސްޓިސް ނިންމުން ވެސް ދަމަހައްޓާފައެވެ.