މެންބަރުން ހަމަ ނުވެގެން މީޑިއާ ކޮންޓްރޯލް ކުރާ ކޮމިޝަނަށް މެންބަރުން އައްޔަނުކުރުމާއި ގުޅޭ ވޯޓަށް ނޭހި

ރައްޔިތުންގެ މަޖިލީހުގެ މެންބަރުން ހަމަނުވެގެން މީޑިއާ ކޮންޓްރޯލް ކުރާ ކޮމިޝަނަށް މެންބަރުން އައްޔަނުކުރުމާ ގުޅޭ ވޯޓަށް ނާހައި މަޖިލިސް ނިންމާލައިފިއެވެ.

ހޯމަ ދުވަހުވެ ޖަލްސާގައި އެޖެންޑާ ކޮށްފައި އޮތީ މިނިވަން މުއައްސަސާތަކާއި ގުޅޭ ކޮމީޓީން ދިރާސާކޮށް ނިންމި ރިޕޯޓަށް ބަހުސްކޮށް އެއަށް ވޯޓަށް އެހުމެވެ. މަޖިލީހުގެ ރިޔާސަތުގައި އިންނެވި ދިއްގަރު ދާއިރާގެ މެންބަރު އަދި މަޖިލީހުގެ ނައިބު ރައީސް ނާޒިމް ވިދާޅުވީ މީޑިއާ އެންޑް ބްރޯޑްކާސްޓިން ރެގިއުލޭޝަންގެ ގާނޫނުގެ ދަށުން މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނަށް 3 މެންބަރުން ރައްޔިތުންގެ މަޖިލިހުން ކަނޑައެޅުމަށްޓަކައި ފޮނުވާފައިވާ، މިނިވަން މުއައްސަސާތަކުގެ ކޮމިޓީ އިން ދިރާސާކޮށް ނިންމި ގޮތުގެ ރިޕޯޓުގެ މައްސަލަ ކުރިއަށް ގެންދެވެން ނެތް ކަމަށެވެ.

ސަބަބެއްގެ ގޮތުގައި ނާޒިމް ވިދާޅުވީ އެ މަސައްކަތަކީ ގާނޫނެއްގެ ދަށުން ކުރާ މަސައްކަތެއް ކަމަށާއި، އެ ގާނޫނުގެ 19 ވަނަ މާއްދާގައި ބުނަނީ ރައްޔިތުންގެ މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްކުރާ ފަރާތްތަކެއް ކަމަށް ކޮމިޝަނުގެ މެންބަރުން ވާންޖެހޭނެ ކަމަށެވެ. އެހެންކަމުން ވޯޓަށް އަހާއިރު 47 މެންބަރުން ހާޒިރުވެ ޖަލްސާގައި ތިބެންޖެހޭ ކަމަށެވެ.

ރައީސް މުއިއްޒުގެ ޕާޓީ ޕީއެންސީ ގެ ސުޕަރ މެޖޯރިޓީ އޮންނަ 20 ވަނަ މަޖިލީހުގެ ހޯމަ ދުވަހުގެ ޖަލްސާގެ ހާޒިރީ އަށް ބަލާއިރު 17 މެންބަރުން ރަސްމީ ދަތުރުގައި ތިބި އިރު 2 މެންބަރަކު ހުރީ ސަލާމުގައެވެ. ހޯމަ ދުވަހުގެ ޖަލްސާ ފެށި އިރު 58 މެންބަރުން ތިއްބެވި އެވެ. އެހެން ނަމަވެސް ވޯޓު ގަޑިއާ ހަމަ އަށް ދިޔަ އިރު އެ މެމްބަރުންނަށް ވީގޮތެއް ސާފުވެފައެއް ނުވެއެވެ. ގާނޫނަށް ބަލާއިރު ވޯޓަށް އެހޭނެ ފުރުސަތެއް ނެތް ކަމަށާއި، އެހެންކަމުން ވޯޓަށް ނާހާނެ ކަމަށް ރިޔާސަތުން އިއުލާނު ކުރެއްވިއެވެ.

މި މައްސަލަ އަންގާެރަ ދުވަހުގައި އޮންނަ މަޖިލީހުގެ ޖަލްސާއަށް މިހާރު ވަނީ އެޖެންޑާކޮށްފައެވެ. ނާޒިމް ވަނީ ޖަލްސާ ނިންމާލުމުގެ ކުރިން މި ކަންކަމަށް ވޯޓަށް އެހޭނެ ގޮތަކަށް ހާޒިރީ ރަނގަޅު ކޮށްދިނުމަށް ޕީޖީ ލީޑަރުންގެ އަރިހުން އެދިވަޑައިގެންފައެވެ.

މީޑިއާ ކޮންޓްރޯލް ކުރާ ކޮމިޝަނަށް 10 ފަރާތެއް ކުރިމަތިލިއެވެ. އަދި އެ ފަރާތްތަކާއި އިންޓަރވިއު ކުރުމަށް ފަހު ކޮމިޓީ އިން އާދީއްތަ ދުވަހު ވަނީ 3 ނަމެއް ފާސްކޮށްފައެވެ. އެއީ މީޑިއާ ބިލާ ދެކޮޅަށް މަޖިލީހުގެ ކޮމިޓީގައި ފާޅުކަން ބޮޑުގޮތެއްގައި ފާޑުވިދާޅުވި ކުރީގެ ބްރޯޑްކޮމްގެ ރައީސް ސަފާ ޝަފީގުގެ އިތުރުން ކުރީގެ މެންބަރުން އައިމިނަތު ސަރާހަތު އިއްޒަތު އަދި މީޑިއާ ކައުންސިލްގެ ކުރީގެ ސެކްރެޓަރީ ޖެނެރަލް މުހައްމަދު ފަރުސަތުއެވެ.

މީޑިއާ ކޮންޓްރޯލް ކުރާ ގާނޫނުގައި ބުނާ ގޮތުން ބްރޯޑްކާސްޓަރުން ތަމްސީލު ކުރާ 2 މެންބަރަކާއި، އެހެނިހެން މީޑިއާ ތަމްސީލު ކުރާ 2 މެންބަރެއްގެ އިތުރުން މަޖިލީހުން އައްޔަންކުރާ 3 މެންބަރަކު ތިބެންޖެހެއެވެ. ނަމަވެސް މީޑިއާތަކާއި މަޝްވަރާ ކުރުމެއް ނެތި ފާސްކުރި މި ގާނޫނުގެ ދަށުން އުފައްދާ ކޮމިޝަނަށް ކުރިމަތިލާން ހުޅުވާލުމުން އެކަށީގެންވާ ތަރުހީބެއް ނުލިބި ވޯޓަކާއި ނުލާއި 4 މެންބަރުން ވަނީ ހޮވިފައެވެ.