ލޯކަލް އިންތިޚާބުގައި ބަލިވެއްޖެ ނަމަ، ސްޓާމާގެ ވެރިކަން ނިމުމަކަށް އަންނާނެ ކަމަށް މެމްބަރުން ބުނަން ފަށައިފި

ވޭލްސްގައި އާންމުކޮށް ލޭބާ ޕާޓީ އަށް ތާއީދު ލިބޭ ސަރަހައްދެއް ކަމަށްވާ، ކެއާފިލީގައި އެ ޕާޓީ އަށް ލިބުނު ހިތްދަތި ބައްޔާ ގުޅިގެން، އަންނަ އަހަރުގެ މެއި މަހު ބޭއްވުމަށް ހަމަޖެހިފައިވާ ލޯކަލް އިންތިޚާބުގައި ބަލިވެއްޖެ ނަމަ، ބޮޑު ވަޒީރު ކިއާ ސްޓާމާގެ ވެރިކަން ނިމުމަކަށް އަންނާނެ ކަމަށް މެމްބަރުން ބުނަން ފަށައިފި އެވެ.

ޕްލައިޑް ސިމްރޫ ޕާޓީ އިން ވަނީ، ރިފޯމް ޔޫކޭއާ ވާދަކޮށް ސެނެޑް ގޮނޑި ކާމިޔާބު ކޮށްފަ އެވެ. ނަމަވެސް، މި ނަތީޖާ އިން ދައްކުވައި ދެނީ މިހާރު ވެރިކަން ކުރަމުން އަންނަ ލޭބާ ޕާޓީގެ ވޯޓުތައް އެއްކޮށްހެން ގެއްލިގެންދާ މަންޒަރު ކަމަށް މާހިރުން ވަނީ ފާހަގަ ކޮށްފަ އެވެ.

އެކަމާ ގުޅިގެން ވެސްޓްމިންސްޓާގައި ކަންބޮޑުވުން ފާޅު ކުރަމުން ދަނީ ވޭލްސްގައި ލޭބާ ޕާޓީ ތިން ވަނަ އަށް ވެއްޓުމުގެ ބިރު އޮތް ކަމަށާއި، އެ ފަދަ ޙާލަތެއްގައި ޕާޓީގެ ލީޑަރުގެ މަޤާމު ސްޓާމާ އަށް ސަލާމަތް ކުރެވޭނެ ގޮތެއް ނޯންނާނެ ކަމަށް ބުނެ އެވެ.

ގަރުނެއްގެ މުއްދަތަކަށް ވުރެ ދިގު މުއްދަތެއްގައި ލޭބާ ޕާޓީގެ ބާރުގެ ދަށުގައި އޮތް، އަދި މިހާރު ވެސް އެ ޕާޓީގެ މެމްބަތެއް ތަމްސީލު ކުރާ މި ސަރަހައްދުގައި އެ ޕާޓީ އަށް ލިބުނީ އެންމެ 11 އިންސައްތަ ވޯޓެވެ. މިއީ 27 އިންސައްތައިގެ ނެގެޓިވް ނަތީޖާ އެކެވެ. މި ނަތީޖާ އިން ދައްކުވައި ދެނީ އެހެން ޕްރޮގްރެސިވް ޕާޓީ ތަކާއި، ރީފޯމް ޔޫކޭއާ ވާދަކޮށް ލޭބާ ޕާޓީ ވަރަށް ބޮަޑަށް ދަށްވެފައިވާ މިންވަރެވެ.

އެކަމާ ގުޅޭ ގޮތުން ވާހަކަ ދައްކަމުން ލޭބާ ޕާޓީގެ އިސް ފަރާތެއް ބުނެފައި ވަނީ، ސަރުކާރުގައި އޮންނަ ޕާޓީ އަށް ބައި އިލެކްޝަންތައް ކާމިޔާބު ކުރުމުގައި ދަތި ތަކެއް ދިމާވާކަން އަބަދު ވެސް އިނގޭ ކަމަށެވެ. އެހެން ނަމަވެސް، މިފަހަރުގެ ނަތީޖާ ދަށްވި މިންވަރަށް ދަށްވެގެން ދިޔަ އިރު، އެކަމުގެ ޒިންމާ ނަގަން ޖެހޭ ފަރާތެއް ހުންނާނެ ކަމަށް އޭނާ ވަނީ ވިދާޅުވެފަ އެވެ.

އަންނަ އަހަރުގެ މެއި މަހު އޮންނަ އިންތިޚާބުގައި އިނގިރޭސިވިލާތުގެ 1600 އަށް ވުރެ ގިނަ ކައުންސިލް ގޮނޑި އާއި، ވޭލްސް އަދި ސްކޮޓްލެންޑުގެ ޕާލިމެންޓު ތަކަށް މެމްބަރުން އިންތިޚާބު ކުރުމަށް ވޯޓު ލެވޭނެ އެވެ. މި އިންތިޚާބަކީ ބޮޑު ވަޒީރު ސްޓާމާ އަށް ވަރަށް މުހިންމު އިންތިޚާބަކަށް ވާނެ ކަމަށް ބެލެވޭ އިންތިޚާބެކެވެ.