ހިންނަވަރުގައި އާރްޑީސީއަށް މުވައްޒަފުން އިތުރު ކުރުން ނޫން ކަމެއް ނެތް، ތަރައްގީ ހުއްޓިފައި

ރައީސް ޑރ.މުހައްމަދު މުއިއްޒު އެދިވަޑައިގެންނެވި ގޮތަށް ރައްޔިތުން މަޖިލީހުގެ މެޖޯރިޓީ މި ސަރުކާރަށް ދިން ނަމަވެސް ޅ.ހިންނަވަރުގެ ތަރައްގީ ގައި މާ ބޮޑު ކުލައެއް ޖެހިފައިނުވާ ކަމަށާއި، މިހާރު އުންމީދެއް ނެތް ކަމަށް އެމްޑީޕީ ގައުމީ މަޖިލީހުގެ ހިންނަވަރު ދާއިރާގެ ނައިބު ރައީސް އިބްރާހިމް އަބްދުﷲ ވިދާޅުވެއްޖެ އެވެ.

ރާއްޓީވީގެ ވައުދުނާމާ ޕްރޮގްރާމްގައި އެމްޑީޕީ ގައުމީ މަޖިލީހުގެ ހިންނަވަރު ދާއިރާގެ ނައިބު ރައީސް އިބްރާހިމް ވިދާޅުވީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ގިނަ މަޝްރޫއުތަކެއް ހިންނަވަރުގައި ކުރިއަށް ގެންދިޔަ ކަމަށާއި، ނަމަވެސް މިހާރު ގިނަ މަޝްރޫއުތައް އެއްކޮށް ހުއްޓިފައިވާ ކަމަށެވެ.

ބަނދަރު އަޕްގްރޭޑް ކުރުމުގެ މަޝްރޫއަށް އިޝާރާތް ކުރައްވައި އިބްރާހިމް ވިދާޅުވީ އެ މަސައްކަތް ވެސް ކުރިއަށް ގެންދިއުމަށް ފަހު މަޝްރޫއު ނުނިމުނު ނަމަވެސް މަސައްކަތް ހުއްޓުވާފައިވާ ކަމަށެވެ. އަދި އެމްޓީސީސީގެ ފަރާތުން މަސައްކަތަށް ގޮސް އުޅުނު ހުރިހާ އެންމެން އެރަށުން ވެސް ފައިބާފައިވާ ކަމަށާއި، މަސައްކަތު ސައިޓު ރޫޅާލާފައިވާ ކަމަށެވެ.

އެންމެ ބޮޑެތި ބޯޓު ފަހަރު ކައިރި ކުރެވޭ ގޮތަށް ޓީ ޖެޓީއެއް ގޮތަށް ހައްދަވާފައި އެވަނީ. އަދި އޭގެ އިތުރުން ރަށުގެ އުރުތުގައި އޮތް ބަނދަރަނީ އެންމެ މުސްކުޅި ބަނދަރު. އެ ބަނދަރު އެއްކޮށް ހަލާކުވެގެން އަލުން ބަލުން ސަރުކާރުން އެވަނީ ބަނދަރު ހަދާފައި. ފާލަމާއި، އަރިމަތީ ފާލަމާއި، އަދި ބޭރު ތޮށިވެސް އަލުން ޖަހާ އުސްކޮށްފައި އަދި ޕޭމަންޓު ވެސް އަޅާދީފައި. އަދި ދެކުނުން އޮތް ބަނދަރުވެސް ހަލާކުވެފައި އޮތްބާ އެއްކޮށްހެން ހަދާ ނިންމާ ފުންކޮށްފައި ނުނިމި މިހާރު މިއިނީ ބޭރު ތޮށި އައުކޮށްލުން. އެތަން ކޮޅެއް ތެރިވެފައި. ދެން ފާލަން ހަދަން ފަށާފައި. އޭގެވެސް 90 ޕަސެންޓް ނިމިފައި. އެމަސައްކަތް އެއްކޮށް ހުއްޓާލާފައި އެމްޓީސީސީގެ އެންމެން ބޭލީ.

އެމްޑީޕީ ގައުމީ މަޖިލީހުގެ ހިންނަވަރު ދާއިރާގެ ނައިބު ރައީސް އިބްރާހިމް އަބްދުﷲ

މަގު ހެދުމުގެ މަޝްރޫއާ ގުޅޭ ގޮތުން އިބްރާހިމް ވިދާޅުވީ މަގު ހެދުން ފިޔަވައި ހުރިހާ މަސައްކަތެއް ހަވާލުކުރީ އާރްޑީސީގެ މުވައްޒަފުން ކަމަށެވެ.

އެގޮތުން އާރްޑީސީއަށް މުވައްޒަފުން އިތުރު ކުރާ ކަމަށާއި، މިހާރު ވެސް ކޮންމެ މަސައްކަތު މީހަކަށް 3 ސުޕަވައިޒަރުން އަދި ކޮންމެ ސުޕަވައިޒަރަކަށް 5 މެނޭޖަރުން އެބަތިބި ކަމަށް އިބްރާހިމް ވިދާޅުވިއެވެ. އަދި ކުރަނީ ކޮންކަމެއް ނޭނގޭ ކަމަށާއި، މަސައްކަތް ކުރިއަށް ނުދާ ކަމަށް އޭނާ ވިދާޅުވިއެވެ.

އާރްޑީސީއާ ހަވާލު ކުރެވިގެން ބޮޑެތި ހުރިހާ މަގެއްގައި ތާރު އެޅުމުގެ މަސައްކަތް ފަށާފައި ވަނީ. މިވަގުތު ވެރިކަން ބަދަލުވިއިރު ބޮޑެތި މަގުތަކުގެ ޕޭމަންޓުތައް ނިންމާފައި ވަނީ. ތާރު އަޅަން ތައްޔާރުވާ ހިސާބުގައި ހުރީ. އެކަމަކު މިއަދު އެމަސައްކަތް މިއަދު ވަނީ ހުއްޓީފައި. އާރްޑީސީ އެބައޮތް އެތާގައި. މީހުން އެބައޮތް ފުރާ ބޯކޮށް އެބައޮތް. އެކަމަކު މަގު ހެދުން ފިޔަވައި ހުރިހާ މަސައްކަތެއް އެމީހުން ކުރޭ. މަގެއް ނުހަދައި. އެހެން ހުރިހާ މަސައްކަތެއް ކުރޭ. އެއްކޮށް ހުއްޓިފައި.

އެމްޑީޕީ ގައުމީ މަޖިލީހުގެ ހިންނަވަރު ދާއިރާގެ ނައިބު ރައީސް އިބްރާހިމް އަބްދުﷲ

މީގެ އިތުރުން އިބްރާހިމް ވަނީ ހިންނަވަރުގައި އިމާރާތް ކުރާ ޒާމާނީ ހޮސްޕިޓަލްގެ މަޝްރޫއަށް ވެސް އަލިއަޅުވާލާފައެވެ.

އޭނާ ވިދާޅުވީ ކުރީ ސަރުކާރުގައި ހޮސްޕިޓަލް އިމާރާތް ކުރުމުގެ އަމަލީ މަސައްކަތް ފަށައި، ބާރު ސްޕީޑްގައި ކުރިއަށް ގެންދިޔަ ކަމަށެވެ. ނަމަވެސް މި ސަރުކާރުގައި އެ މަސައްކަތް ވެސް ކުރިއަށް ދަނީ ވަރަށް ލަހުން ކަމަށާއި، މަސައްކަތް ކުރާ ކުންފުންޏަށް ދޫކުރަން ޖެހޭ ފައިސާ ސަރުކާރުން ނުދޭ ކަމުގެ ޝަކުވާ ލިބިފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ މި މަސައްކަތް ކުރުމުގައި ސަރުކާރުގެ ހެޔޮ ނިޔަތެއް އޮތް ނަމަ މިހާރު ހޮސްޕިޓަލްގެ ހުރިހާ މަސައްކަތެއް ނިމިދާނެ ކަމަށާއި، މިހާރު ކުރިއަށް ދަނީ ފިނިޝިންގެ މަސައްކަތް ކަމަށް އިބްރާހިމް ވިދާޅުވި އެވެ.

ރިބަން ކެނޑުމުގެ ބައެއް މަޝްރޫއުތައް ހުރިކަން ފާހަގަކުރައްވައި އިބްރާހިމް ވިދާޅުވީ ކުރީ ސަރުކާރުގައި އިމާރާތް ކުރި ފެނަކަ އޮފީސް ނިމިފައިވާ ކަމަށާއި، އެތަން ހުޅުވޭނީ ރައީސް މުއިއްޒު ރިބަން އެކެނޑުމުން ކަމަށެވެ.

ޒުވާނުން އެންމެ ބޮޑަށް އެދޭ މަޝްރޫއު ވެސް ހުއްޓިފައިވާތީ އެކަމުގެ ކަންބޮޑުވުން ވެސް އިންތިހާއަށް އޮތް ކަމަށް އޭނާ ވިދާޅުވިއެވެ. އިބްރާހިމް ވިދާޅުވީ ކުރީ ސަރުކާރުގައި ފުޓްބޯޅަ ދަނޑެއް އަޅައި، ޓާފް އަޅައި ނިންމި ނަމަވެސް މި ސަރުކާރުގައި ސިނޑިބަރި އާއި ޗޭންޖިންރޫމް އަދި އެހެނިހެން މަސައްކަތް ކުރިއަށް ގެންދިޔަ ނަމަވެސް ފައިސާގެ މައްސަލަ ކުރިމަތިވެ، ކޮންޓްރެކްޓަރު މަސައްކަތް ހުއްޓާލުމަށްފަހު އެރަށުން ފައިބާފައިވާ ކަމަށެވެ.

މީގެ އިތުރުން އިބްރާހިމް ވިދާޅުވީ ރައީސް މުއިއްޒު ހިންނަވަރަށް ވަޑައިގެންނެވީ ރިޔާސީ އިންތިޚާބުގެ ކުރިންނާއި، މަޖިލިސް އިންތިޚާބާ ގުޅިގެން ކަމަށެވެ.

ރިޔާސީ އިންތިޚާބުގެ ކެންޕޭންގެ ތެރޭގައި އެރަށަށް ތިން ވައުދެއް ވެވަޑައިގެންނެވި ނަމަވެސް މިއަދާ ހަމަައަށް ވެސް މަސައްކަތެއް ކޮށްފައިނުވާ ކަމަށް އޭނާ ވިދާޅުވި އެވެ.

އެއީ ހިންނަވަރު ހިއްކި ސަރަހައްދުގައި ފެނާއި ނަރުދަމާ ކަރަންޓު ގާއިމް ކޮށްދޭނަމޭ. އޭގެ އެއްވެސް އިޝާރާތެއް ނެތް. އެއްވެސް ކަމެއް ނެތް. ދެން ވިދާޅުވީ ހޮސްޕިޓަލްގެ މަސައްކަތް ފަށާނަމޭ. އެއީ ފަށާފައި އޮތް މަސައްކަތެއް. ދެން ފެން ޕްލާންޓްގެ ކެޕޭސިޓީ އިތުރު ކޮށްދޭނަމޭ. އަޅުގަނޑަށް ނުފެނޭ ކެޕޭސިޓީ އިތުރު ކުރުމަށް އިތުރު ތާންގީއެއް ނުގެނޭ. ރައީސް ކަމަށް ވަޑައިގެންނެވުމަށްފަހު ވަޑައިގެންނެވީ އެއް ފަހަރު އެއީ މަޖިލިސް އިންތިޚާބުގެ ތެރޭގައި މިދިޔަ ސަރުކާރުގައި ފަށާފައި ހުރި ހުރިހާ މަޝްރޫއެއް ބާރު ސްޕީޑްގައި ކުރިއަށް ގެންދަވާނެ ކަމަށް. ގާތްގަނޑަކަށް ހުރި ހިސާބުގައި ހުރީ.

އެމްޑީޕީ ގައުމީ މަޖިލީހުގެ ހިންނަވަރު ދާއިރާގެ ނައިބު ރައީސް އިބްރާހިމް އަބްދުﷲ

އިބްރާހިމް ވިދާޅުވީ މި ސަރުކާރު އެއްވެސް ޕްލޭނެއް އަމާޒެއް ނެތް ކަމަށާއި، މިއަދު މި ސަރުކާރާ މެދު މާ ބޮޑު އުންމީދެއް ނެތް ކަމަށެވެ.