ސަޢޫދީ ޢަރަބިއްޔާ އިން ޝައިޚް ޑރ. ޞާލިޙް ބިން ފައުޒާން ބިން ޢަބްދުﷲ އަލް-ފައުޒާން އެ ގައުމުގެ ގްރޭންޑް މުފްތީ ކަމަށް އައްޔަން ކޮށްފިއެވެ.

އެ މަނިކުފާނު މި މަގާމަށް އައްޔަނު ކުރެވުނީ ބޮޑުވަޒީރު މުޙައްމަދު ބިން ސަލްމާންގެ ހުށަހެޅުއްވުމަކަށް ބިނާކޮށް ރަސްކަމުގެ ޤަރާރަކުންނެވެ. މިކަން ސަޢޫދީ ޕްރެސް އޭޖެންސީ އިން ބުދަ ދުވަހު ރިޕޯޓު ކޮށްފައި ވެއެވެ.

ރަސްކަމުގެ ޤަރާރުގެ ދަށުން، ޝައިޚް އަލް-ފައުޒާން ވަޒީރެއްގެ ދަރަޖައިގައި ސީނިއަރ ސްކޮލަރުންގެ ކައުންސިލްގެ ޗެއަރމަން ކަމާއި ޢިލްމީ ދިރާސާތަކާއި އިފްތާގެ ޢާންމު ރިޔާސަތުގެ ރައީސް ކަން ވެސް އަދާ ކުރައްވާނެ އެވެ.

އަލަށް އައްޔަންކުރެވުނު މުފްތީ ވަނީ ޝަރީޢާ ގެ ދާއިރާ އިން ޔުނިވަރސިޓީ ޑިގްރީއަކާއި، "ވާރުތަ ޢިލްމުގެ ފަންނު" އާ ބެހޭ ތީސިސްއަކާއެކު މާސްޓަރސް ޑިގްރީއަކާއި، އިސްލާމީ ޝަރީޢަތުގެ ހެކިތަކުގެ މައްޗަށް ބިނާކޮށް ހަލާލު އަދި ހަރާމް ކާނާއާ ބެހޭ ޑޮކްޓަރަލް ތީސިސް އެއް ހާސިލުކުރައްވާފައެވެ.

އަލް ޢަރަބިއްޔާގެ ރިޕޯޓެއްގައިވާ ގޮތުން، ޝައިޚް އަލް-ފައުޒާންގެ އެކަޑަމިކް ދާއިރާގެ މަސައްކަތްޕުޅު އެތައް ގިނަ އަހަރުތަކަކަށް ފެތުރިފައިވެއެވެ. އެމަނިކުފާނު ފުރަތަމަ ރިޔާޟް ގެ ސައިންޓިފިކް އިންސްޓިޓިއުޓްގައި ދެ އަހަރު ދުވަހު ކިޔަވައިދެއްވުމަށްފަހު، ޝަރީޢާ ކޮލެޖަށް އަދި އޭގެފަހުން ދީނުގެ އަސާސްތަކުގެ ކޮލެޖަށް ބަދަލުވެވަޑައިގަތެވެ. އެމަނިކުފާނު ވަނީ ހަޔަރ އިންސްޓިޓިއުޓް އޮފް ޖުޑީޝަރީގެ ޑިރެކްޓަރުކަން ކުރައްވާ، އެ މުއްދަތު ނިމުމަށްފަހު އަލުން އެތަނުގައި ކިޔަވައިދެއްވުމަށް އެނބުރި ވަޑައިގެންފައެވެ.

އެކަޑަމިކް ޚިދުމަތްތަކުގެ އިތުރުން، ޝައިޚް އަލް-ފައުޒާން މަޝްހޫރުވެފައި ވަނީ އެމަނިކުފާނުގެ ދަރުސްތަކާއި، ލިޔުއްވުންތަކާއި، ސީނިއަރ ސްކޮލަރުންގެ ކައުންސިލާއި މައްކާގެ ފިޤުހު ކައުންސިލް ފަދަ މުހިންމު ދީނީ މަޖިލިސްތަކުގައި ދިގު މުއްދަތަކަށް ކުރައްވާފައިވާ ޚިދުމަތް ތަކުންނެވެ. އަދި ހައްޖު މޫސުމުގައި ދީނީ ހޭލުންތެރިކަމުގެ ޕްރޮގްރާމްތައް ހިންގާ ފަރާތްތަކުގެ މަސައްކަތްވެސް ބަލަހައްޓަވަމުން ގެންދަވައެވެ.