ހަމާސް އިން ހަތިޔާރު ނުބަހައްޓައިފ ނަމަ، ގަދަ ބާރުން އެކަން ކުރާނެ ކަމަށް ޓްރަމްޕް ވިދާޅުވެއްޖެ

ފަލަސްޠީނުގެ މިނިވަން ކަމަށް މަސައްކަތް ކުރަމުން އަންނަ ހަމާސް ޖަމާއަތުން ހަތިޔާރު ނުބަހައްޓައިފި ނަމަ، ގަދަ ބާރުން އެކަން ކުރާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި އެވެ.

ޓްރަމްޕްގެ ފަރާތުން ހުށަހަޅާފައިވާ ޕްލޭން އަށް މަޝްވަރާ ކުރުމަށް ފަހު، ހަނގުރާާމަ ހުއްޓާލުމަށް ހަމާސް އާއި އިސްރާއީލް އިން އެއްބަސްވެފައިވާއިރު، އެ ޕްލޭންގައި ވަނީ ހަމާސް ޖަމާއަތުން އެ ޖަމާއަތުގެ ހަތިޔާރު ބަހައްޓަން ޖެހޭނެ ކަމަށެވެ. ނަމަވެސް، ހަމާސް އިން އެކަމަށް އެއްބަސްވެފައި ނުވެ އެވެ.

އެކަމާ ގުޅޭ ގޮތުން ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، ހަމާސް ޖަމާއަތަށް ޖެހޭނީ ހަތިޔާރު ބަހައްޓަން ކަމަށެވެ. އަދި އެ ޖަމާއަތުން އެކަން ނުކޮށްފި ނަމަ، އެމެރިކާ އިން ގަދަ ކަމުން އެކަން ކުރުވާނެ ކަމަށް ވެސް ޓްރަމްޕް ވަނީ ވިދާޅުވެފަ އެވެ.

ޓްރަމްޕް ވިދާޅުވެފައި ވަނީ ހަމާސް ޖަމާއަތުން ކުރަން އުޅޭ ކަންކަން ވެސް އިނގޭ ކަމަށެވެ. އެހެން ނަމަވެސް، ވަރަށް އަވަހަށް ހަމާސްގެ ހަތިޔާރު ބެހެއްޓުމަށް ކުރާ މަސައްކަތް ކާމިޔާބު ވާނެ ކަން ފާހަގަ ކުރައްވައި ޓްރަމްޕް ވިދާޅުވީ، ފަހަރުގައި އަނިޔާވެރި ގޮތެއްގައި ވެސް އެކަން ކުރަން ޖެހިދާނެ ކަމަށެވެ.

ޓްރަމްޕް މިފަދައިން ވާހަކަ ދައްކަވާފައިވާއިރު، ހަނގުރާމަ ހުއްޓާލުމުގެ ފުރަތަމަ ފިޔަވަހީ ވަނީ ތަންފީޒު ކުރަން ފަށައިފަ އެވެ. ހަމާސް ޖަމާއަތުގެ ބެލުމުގެ ދަށުގައި ތިބި އިސްރާއީލްގެ ހުރިހާ ރަހީނުން މިނިވަން ކޮށްފައިވާއިރު، އިސްރާއީލްގެ ޖަލު ތަކުގައި ތިބި ފަލަސްޠީނުގެ ރައްޔިތުން ވެސް ވަނީ މިނިވަން ކޮށްފަ އެވެ. ނަމަވެސް، ހަނގުރާމަ ހުއްޓާލަން ވެފައިވާ އެއްބަސްވުމުގެ ދެ ވަނަ ފިޔަވަހި ކުރިއަށް ދާނެ ގޮތާ މެދު މިހާރު ވަނީ ގިބަ ސުވާލު ތަކެއް އުފެދިފަ އެވެ.

އިތުރަށް ޓްރަމްޕް ވިދާޅުވީ އޭނާ ހަމާސް ޖަމާއަތާ ވާހަކަ ދައްކާފައި ވާނެ ކަމަށެވެ. އަދި ހަމާސް އިން ހަތިޔާރު ދޫކޮށްލަން ޖެހޭނެ ކަމަށް އެ ޖަމާއަތަށް އަންގާފައި ވާނެ ކަމަށް ވެސް ޓްރަމްޕް ވިދާޅުވެފައިވެ އެވެ. އެއާއެކު، ހަތިޔާރު ދޫކޮށްލާނެ ކަމަށް އެ ޖަމާއަތުން އޭނާގެ ގާތު ބުނެފައިވާ ކަމަށް ޓްރަމްޕް ވިދާޅުވި އެވެ. އެކަން ފާހަގަ ކުރައްވައި ޓްރަމްޕް ވިދާޅުވީ އެ މެސެޖު ފޯރުކޮށްދެވުނީ އޭނާގެ މީހުން މެދުވެރިކޮށް ކަމަށެވެ.

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓާލުމަށް އެއްބަސްވުމާ އެކު، ޣައްޒާގެ ސުލްޙައާ ގުޅޭ ގޮތުން މިޞްރުގައި ވަނީ ޚާއްސަ ސަމިޓެއް ވެސް ކުރިއަށް ގެންގޮސްފަ އެވެ. އެ ސަމިޓުގައި ވެސް ޓްރަމްޕް ވަނީ ހަނގުރާމަ ހުއްޓާލުމަށް ވެފައިވާ އެއްބަސްވުމާއި، ސުލްޙަ ޤާއިމު ކުރުމާ ގުޅޭ ގޮތުން ވާހަކަ ދައްކަވައިފަ އެވެ.

ޣައްޒާ ހަނގުރާމަ ހުއްޓާލުމަށް އެއްބަސްވެފައިވާއިރު، ދެ އަހަރު ދުވަހަށް ދެމިގެން ދިޔަ މި ހަނގުރާމައިގައި ވަނީ ޣައްޒާގެ 68،000 އަށް ވުރެ ގިނަ ރައްޔިތުން ޝަހީދު ކޮށްލައިފަ އެވެ. އޭގެ އިތުރުން، 150،000 އަށް ވުރެ ގިނަ މީހުންނަށް ވަނީ އެކި ވަރުގެ އަނިޔާތައް ލިބިފަ އެވެ. ޣައްޒާގެ އިދާރާ ތަކުން ހާމަ ކޮށްފައިވާ ގޮތުގައި ސުންނާފަތި ވެފައިވާ އިމާރާތްތަކުގެ ދަށުގައި ވެސް އެތައް ހާސް ބަޔަކު ތާށިވެފައި ތިބޭނެ އެވެ.