ބޭރުން ކޯޗުން ގެނެސްގެން ރަނގަޅު ނަތީޖާއެއް ނުނެރެވޭ: މޯހަން

ރާއްޖޭގެ ސީނިއާ ޤައުމީ ފުޓުބޯޅަ ޓީމަށް އިރުޝާދު ދިނުމަށް ބޭރުގެ ކޯޗުން ގެނައި ނަމަވެސް، ގިނަ ފަހަރު އެދިވިގެންވާ ނަތީޖާއެއް ނުނެރެވޭ ކަމަށް ޤައުމީ ޓީމުގެ ކޯޗު މުޙައްމަދު ޝިޔާޒް (މޯހަން) ބުނެފި އެވެ.

މޯހަން މިހެން ބުނެފައި ވަނީ، ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯ ރާއްޖެ އަށް ކުރެއްވި ދަތުރުފުޅާ ދިމާކޮށް، ދައުލަތުގެ މީޑިއާ އިން ގެނެސްދިން ޚާއްސަ ކަވަރޭޖުގައި ވާހަކަ ދައްކަމުންނެވެ.

އެގޮތުން މޯހަން ބުނެފައި ވަނީ، ރާއްޖޭގެ ފުޓުބޯޅައިގެ ޙާލަތު ރަނގަޅުވާއިރަށް އަބަދު ވެސް ބޭރު ކޯޗެއް ގެންނަ ކަމަށެވެ. އެއީ ހިތާމައާ އެކު ފާހަގަ ކުރާ ކަމެއް ކަމަށާއި، ހަގީގަތަކީ ބޭރު ކޯޗުން ގެނެސްގެން ވެސް ރަނގަޅު ނަތީޖާ އަށް ވުރެ، ދަށް ނަތީޖާ ނިކުމެފައިވާ ކަމަށް މޯހަން ބުންޏެވެ.

އެއީ ހަގީގަތެއްކަން ފާހަގަ ކުރަމުން މޯހަން ބުނީ، ރަނގަޅު ކޯޗުން ވެސް އައިސްފައިވާ ކަމަށެވެ. އެގޮތުން ވަރަށް މޮޅެތި ބޭރުގެ ކޯޗުން އައިސްގެން، އެ ކޯޗުންގެ ފަރާތުން ރަނގަޅު ނަތީޖާ ތަކެއް ވެސް ނިކުމެފައިވާ ކަމަަށެވެ. އަދި ޚުދު އޭނާ އަށް ވެސް ދަސްވެފައި ހުރި ގިނަ ކަންކަމަކީ ހައްތަހާ ވެސް ބޭރު ކޯޗުންގެ ފަރާތުން ލިބިފައި ހުރި މައުލޫމާތާއި، އެ މީހުންނާ އެކ އުޅެގެން ދަސްވެފައި ހުރި ކަންކަން ކަމަށް މޯހަން ބުންޏެވެ.

އެގޮތުން ޤައުމީ ޓީމަށް ކޯޗެއް ގެންނަ ނަމަ، އެ ފެންވަރުގެ ކޯޗެއް ގެނައުމަކީ މުހިންމު ކަމެއް ކަމަށް މޯހަން ވަނީ ބުނެފަ އެވެ. މިހާތަނަށް އައިއިރު، މި ފަހުން ޤައުމީ ޓީމަށް އެ ފެންވަރުގެ ކޯޗެއް ގެނެވިފައި ނުވާ ކަމަށް ވެސް މޯހަން ވަނީ ފާހަގަ ކޮށްފަ އެވެ. އެގޮތުން މިހާތަނަށް ގެނެެވުނީ، ބޮޑު ޚަރަދު ތަކެއް ކުރާއިރު ވެސް ނަތީޖާ ނުނެރެވޭ ކޯޗުން ކަމަށް އޭނާ ބުންޏެވެ.

ޤައުމީ ޓީމުގެ ކޯޗަކަށް މޯހަން ހަމަޖައްސާފައި ވަނީ މިއަހަރުގެ އޮގަސްޓު މަހުގެ ތެރޭގަ އެވެ. އެއީ އޭނާގެ ކުރިން އެ މަގާމުގައި ހުރި އަލީ ސުޒޭން ޤައުމީ ޓީމުގެ ކޯޗުކަމުން އިސްތިއުފާ ދިނުމާ އެކު އެވެ. މޯހަންގެ އިރުޝާދުގެ ދަށުން ޤައުމީ ޓީމުން ވަނީ ސްރީ ލަންކާގައި ކުރިއަށް ދިޔަ ސައުތު އޭޝިއަން ސުޕަ ކަޕް ކާމިޔާބު ކޮށްފަ އެވެ. އޭގެ ފަހުން އޭޝިއަން ކަޕް ކޮލިފިކޭޝަންގައި ތަޖަކިސްތާނާ ދެކޮޅަށް ރާއްޖެ އިން ކުޅުނުއިރު، ދެ މެޗުން ވެސް ވަނީ ބަލިވެފަ އެވެ.

އެންމެ ފަހުން ޤައުމީ ޓީމަށް އިރުޝާދު ދިން ބިދޭސީ ކޯޗަކީ ފްރެންޗެސްކޯ މޮރިއޭރޯ އެވެ. ނަމަވެސް، އޭނާގެ އެއްބަސްވުން ހަމަވުމުން، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ވަނީ އެއްބަސްވުން އައު ނުކުރަން ނިންމައިފަ އެވެ.