ޤައުމީ ޓީމުގެ ކުރީގެ ކީޕަރު އިފްރާހު އަށް ސްޓްރޯކެއް ޖެހި އައިސީޔޫގައި

ރާއްޖޭގެ ތަޖުރިބާކާރު ގޯލު ކީޕަރު އިބްރާހީމް އިފްރާހު އަރީފް (އިފުރާ) އަށް ސްޓްރޯކެއް ޖެހިގެން ފަރުވާން ދޭން ފަށައިފި އެވެ.

އިފްރާހު އަށް ފަރުވާ ދެމުން އަންނަނީ އޭޑީކޭ ހޮސްޕިޓަލްގެ އައިސީޔޫގަ އެވެ. އޭނާގެ އާއިލާ މެމްބަރަކު ބުނެފައި ވަނީ، އިފްރާހު އަށް ސްޓްރޯކް ޖެހިފައި ވަނީ ހޯމަ ދުވަހުގެ ވަގުތެއްގައި ކަމަށެވެ. އަދި ސްޓްރޯކް ޖެހުމުގެ ސަބަބުން އޭނާގެ ސިކުނޑި އަށް ލޭ އެޅިފައިވާ ކަމަށް ވަނީ ބުނެފަ އެވެ.

އާއިލާގެ މެމްބަރު ބުނެފައިވާ ގޮތުގައި އިފްރާހުގެ ސިކުނޑި އަށް ލޭ އެޅިފައިވުމުގެ ސަބަބުން ވަނީ ސަރޖަރީއެއް ވެސް ކޮށްފަ އެވެ. އަދި އެ ސަރޖަރީ އަށް ފަހު ވެސް އޭނާ އަށް އަންނަނީ ފަރުވާ ދެމުންނެވެ.

ރާއްޖޭގެ ގިނަ ކުލަބުތަކަށް ކުޅެފައިވާ އިފްރާހު އަކީ ސީނިއަރ ޤައުމީ ޓީމަށް ވެސް ކުޅެފައިވާ ކުޅުންތެރިޔެކެވެ. ކެރިއަރުގައި އޭނާ ވަނީ ވެލެންސިއާގެ އިތުރުން، މާޒިޔާ ސްޕޯޓްސް އެންޑް ރެކްރިއޭޝަން، ނިއު ރޭޑިއަންޓް ސްޕޯޓްސް ކުލަބު، ވިކްޓްރީ، ޓީސީ ސްޕޯޓްސް ކުލަބު އަދި ބީޖީ ސްޕޯޓްސް ކުލަބަށް ވެސް ކުޅެފަ އެވެ. ކުލަބު ކެރިއަރުގައި ވެސް އޭނާ ވަނީ ގިނަ ކާމިޔާބީތަކެއް ހޯދައިފަ އެވެ.

މީގެ އިތުރުން އިފްރާހު ވަނީ ރާއްޖޭގެ ސީނިއަރ ޤައުމީ ޓީމުގައި ވެސް ހިމެނިފަ އެވެ. ރާއްޖެ އިން 2008 ވަަނަ އަހަރުގެ ސަރަަހައްދީ ފުޓުބޯޅަ މުބާރާތް (ސާފް ޗެމްޕިއަންޝިޕް) ކާމިޔާބު ކުރި ޓީމުގައި އިފްރާހު ހިމެނުނެވެ. އޭނާ އަކީ އޭރު ޤައުމީ ޓީމުގެ ރިޒާވް ކީޕަރެވެ.

މިވަގުތު ފުޓުބޯޅަ ކުޅުން ހުއްޓާލައިގެން ހުރި އިފްރާހު އަށް އައިސީޔޫގައި ފަރުވާ ދެމުން އަންނައިރު، ގިނަ ބަޔަކު އަންނަނީ އޭނާ އަށް ހެޔޮ ދުއާ ކުރަމުންނެވެ.