ސްރީ ލަންކާގައި ކުރިއަށް ދިޔަ ސައުތު އޭޝިއަން ސުޕަ ކަޕް ފުޓުބޯޅަ މުބާރާތް ކާމިޔާބު ކުރި، ރާއްޖޭގެ ސީނިއާ ޤައުމީ ފުޓުބޯޅަ ޓީމަށް ހޫނު މަރުޙަބާއެއް ކިޔައިފި އެވެ.

ސުޕަ ކަޕްގައި ލަންކާއާ ދެކޮޅަށް މިދިޔަ ހޮނިހިރު ދުވަހު ކުޅުނު ފުރަތަމަ މެޗު ރާއްޖެ އިން ކާމިޔާބު ކުރީ 3-0 އިންނެވެ. ދެ ވަނަ މެޗުގައި އަންގާރަ ދުވަހު ރާއްޖެ އާއި ލަންކާ ބައްދަލު ކުރި މެޗު ނިމުނީ 1-1 އިން އެއްވަރު ވެގެންނެވެ. އެހެންކަމުން، 4-1 ގެ އެގްރިގޭޓް ނަތީޖާ އަކުން ރާއްޖެ އިން ވަނީ ސުޕަ ކަޕް ކާމިޔާބު ކޮށްފަ އެވެ.

ސުޕަ ކަޕަށް ފަހު ޤައުމީ ޓީމު ރާއްޖެ އައިސްފައި ވަނީ ބުދަ ދުވަހުގެ މެންދުރު އެވެ. ވެލާނާ އިންޓަނޭޝަނަލް އެއާޕޯޓުން ޓީމަށް މަރުޙަބާ ދެންނެވީ ކޮމިޝަނަރ އޮފް ސްޕޯޓްސް މުޙައްމަދު ޠަލާލް އަދި ކުޅިވަރު ވުޒާރާގެ އިސްވެރިންނެވެ.

ރާއްޖޭގެ ފުޓުބޯޅައިގެ ޙާލަތު ދަށްވެފައި އޮތް ވަގުތެއްގައި، ޤައުމީ ޓީމުން ހޯދި ކާމިޔާބީ ފާހަގަ ކުރުމަށް ބުދަ ދުވަހުގެ ހަވީރު ގަލޮޅު ރަސްމީ ދަނޑުގައި ވަނީ ޚާއްސަ ޙަރަކާތެއް ވެސް ބާއްވައިފަ އެވެ. އެ ޙަރަކާތުގައި ކުޅިވަރު ވަޒީރު ޢަބްދުﷲ ރާފިޢު (ރާއްޕެ) އާއި އެ ވުޒާރާގެ އިސްވެރިން އަދި ފުޓުބޯޅައިގެ އެކި އެކި ފަރާތްތަކުން ވަނީ ބައިވެރިވެފަ އެވެ.

ރާއްޖެ އިން ސުޕަ ކަޕާ ކުރިމަތިލީ ތަޖުރިބާކާރު ކޯޗު މުޙައްމަދު ޝިޔާޒް (މޯހަން)ގެ އިރުޝާދުގެ ދަށުންނެވެ. މުބާރާތުގެ ކުރިން ލިބުނު މަދު ވަގުތު ކޮޅުގައި ޓީމުގެ ފަރިތަކުރުންތައް ކުރިއަށް ގެންގޮސް، މުބާރާތާ ކުރިމަތިލީއިރު ވެސް، ރާއްޖެ އަށް ކާމިޔާބު ހޯދޭނެ ކަމުގެ އުންމީދު މޯހަން ފާހަގަ ކުރި އެވެ.

މީގެ އިތުރުން ދިވެހި ފުޓުބޯޅައިގެ ޙާލަތު ދަށްވެފައިވާ ދަނޑިވަޅެއްގައި، ފުޓުބޯޅައިގެ ޙާލަތު ބަދަލު ކުރުމަށް ސުޕަ ކަޕަކީ މުހިންމު މުބާރާތެއް ކަމަށް ވެސް މޯހަން އޭރު ވަނީ ފާހަގަ ކޮށްފަ އެވެ. މި ކާމިޔާބާ އެކު، އަނެއްކާ ވެސް ރާއްޖޭގެ ފުޓުބޯޅަ އަށް ވަނީ އުންމީދެއް އައިސްފަ އެވެ.

ރާއްޖެ ސުޕަ ކަޕް ކާމިޔާބު ކޮށްފައިވާއިރު، މީގެ ކުރިން ރާއްޖެ އިން ވަނީ ދެ ފަހަރެއްގެ މަތިން ސަރަހައްދީ ފުޓުބޯޅަ މުބާރާތް (ސާފް ޗެމްޕިއަންޝިޕް) ކާމިޔާބު ކޮށްފަ އެވެ. އެންމެ ފުރަތަމަ ރާއްޖެ އިން ސާފް ޗެމްޕިއަންޝިޕް ކާމިޔާބު ކުރީ 2008 ވަނަ އަހަރު އެވެ. އޭގެ ފަހުން 2018 ވަނަ އަހަރު ވެސް ރާއްޖެ އިން ވަނީ ސާފް ޗެމްޕިއަންޝިޕް ކާމިޔާބު ކޮށްފަ އެވެ.