ފިލިޕީންސް އަތުންވެސް ބަލިވެ، ރާއްޖެ ސުން ޕޮއިންޓާއެކު ގުރޫޕުގެ ފުލުގައި

އޭއެފްސީ އޭޝިއަން ކަޕް ކޮލިފައިންގައި އަންގާރަ ދުވަހު ހަވީރު ދިވެހިރާއްޖެ އާއި ފިލިޕީންސް ކުޅުނު މެޗު، 2-0 އިން ފިލިޕީންސް ކާމިޔާބުކޮށްފި އެވެ.

މި މޮޅާއެކު ފިލިޕީންސް ގްރޫޕުގެ އެއްވަނަ ދަމަހައްޓާފައި ވާއިރު، ދިވެހިރާއްޖެ އަދިވެސް އޮތީ ކުޅުނު ހުރިހާ މެޗަކުން ބަލިވެ ގްރޫޕުގެ ފުލުގަ އެވެ.

ގަލޮޅު ދަނޑުގައި ކުޅުނު މި މެޗު ފަށައިގެންވެސް ފެނިގެންދިޔައީ ގިނަވަގުތު ބޯޅަ ހިފަހައްޓާ ފިލިޕީންސް ޓީމުން އެޓޭކްތައް ތަނަވަސްކުރެވޭތޯ މަސައްކަތް ކުރަމުންދިޔަ މަންޒަރެވެ. ފިިލިޕީންސް އިން ލީޑުނެގީ މެޗުގެ 25 ވަނަ މިނިޓްގައި އޭރިއާތެރެ އަށް ނެގި ހުރަަހަކުން ޕޯލް ޓަބީނަސް ބޮލުން ޖެހި ގޯލަކުންނެވެ. އަދި، މެޗުގެ 37 ވަނަ މިނިޓްގައި ފިލިޕީންސް އިން ދެ ވަނަ ލަނޑު ޖެހީ އޭރިއާތެރެ އިން ލިބުނު ފުރުސަތެއްގައި، ސަންޑްރޯ ރެޔެސް އެވެ. އޭނާ ވަނީ ގޯލުގެ ދުރު ކަނަށް ބޯޅަ ފޮނުވާލައިފަ އެވެ.

ރާއްޖެ އިން ވަނީ ދެ ވަނަ ހާފުގައި ކުޅުން ވަރަށް ބޮޑަށް ރަނގަޅުކޮށް ގިނަ ފުރުސަތުތަކެއް ހޯދައިފަ އެވެ. އެ ގޮތުން، ރާއްޖެ ޓީމުގެ ފޯވާޑް، ނާއިޒު ހަސަން (ދާދު) އަށް ލިބުނު ފުރުސަތުތަކުގައި ރަނގަޅަށް ބޯޅަ ފޮނުވާލެވޭ ގޮތެއްނުވި އެވެ. އަދި، ބަދަލު ކުޅުންތެރިންގެ ގޮތުގައި ކުޅެން އަރައި، އަލީ ފާސިރު (ސެންޓޭ) މޮޅު ކުޅުމެއް ދެއްކިއިރު، އޭނާ ފޮނުވާލި ބޯޅައެއް ވަނީ ގޯލުގެ ހުރަސްދަނޑިމަތިން ގޮސްފަ އެވެ.

ދެ ވަނަ ހާފުގައި ފިލިޕީންސް އިން ގޯލެއް ޖަހަން ފޮނުވާލި ރަނގަޅު ހަމަލާތަކެއް ރާއްޖޭގެ ކީޕަރު، މުހައްމަދު ފައިސަލް ވަނީ މަތަކޮށްފަ އެވެ.

މިމެޗުން ލިބުނު 3 ޕޮއިންޓާއެކު ފިލިޕީންސް ވަނީ ކުޅުނު 5 މެޗުން 13 ޕޮއިންޓް ހަމަކޮށްފަ އެވެ. އޭޝިއަން ކަޕް ކޮލިފައިންގައި ދިވެހި ޓީމަށް ދެން އޮންނާއި ގްރޫޕްގެ ފަހު މެޗެވެ. އެއީ މިއަންނަ އަހަރުގެ މާޗު ގައި ޓިމޯ ލަސްޓޭ އާއި ބައްދަލުކުރާ މެޗެވެ.

ފިލިޕީންސް އިން މި ވަނީ ރާއްޖެއާ ދެކޮޅަށް ކުޅުނު ހަތް މެޗުގެ ތެރެއިން ފަސް މެޗުން މޮޅުވެފަ އެވެ. ރާއްޖޭން ފިލިޕީންސް އަތުން މޮޅެއް ހޯދީ މި ދެ ޓީމު އެންމެ ފުރަތަމަ ބައްދަލުކުރި މެޗުގައި، 2009 ވަނަ އަހަރު މާލޭގަ އެވެ. އަދި، މި ދެ ޓީމު ވަނީ، ޔޫއޭއީ ގައި ކުޅުނު މެޗަކުން 1-1 އިން އެއްވަރުވެފަ އެވެ.