އިނގިރޭސިވިލާތުގައި ބޮޑު ވަޒީރު ސްޓާމާގެ މަޤުބޫލުކަން ދައްވަނީ!

މީގެ އަހަރެއް ކުރިން ތާރީޚީ ކާމިޔާބެއް ހޯދި، އިނގިރޭސިވިލާތުގެ ބޮޑު ވަޒީރު ކަމަށް ވަޑައިގެންނެވި ކިއާ ސްޓާމާގެ ލޭބާ ޕާޓީ މިހާރު ވަނީ ސިޔާސީ ހަލަބޮލި ކަމެއްގެ ތެރެއަށް ވެއްޓިފަ އެވެ. 2024 ވަނަ އަހަރުގެ ޖުލައި މަހު އޮތް އިންތިޚާބުގައި 411 ގޮނޑީގެ ބޮޑު މެޖޯރިޓީ އެއް ހޯދި ނަމަވެސް، މިހާރު ސްޓާމާގެ މަޤުބޫލުކަން ވަނީ ވަރަށް ބޮޑަށް ދަށްވެފަ އެވެ.

ފަހުގެ ހޯދުން ތަކުން ދައްކާ ގޮތުގައި، ރިފޯމް ޕާޓީގެ މަޤުބޫލުކަން ވަނީ ވަރަށް މައްޗަށް ގޮސްފަ އެވެ. އަދި ކުރިއަށް އޮތް އިންތިޚާބު އެ ޕާޓީ އިން ކާމިޔާބު ކުރުމުގެ ފުރުސަތު އޮތް ކަމަށް ވެސް ބުނެފައިވެ އެވެ. ސަންޑޭ ޓައިމްސްގެ އެމްއާރްޕީ ސާވޭ އިން ދައްކާ ގޮތުގައި ސްޓާމާ އަކީ، އިނގިރޭސިވިލާތުގެ ތާރީޚުގައި އެންމެ މަޤުބޫލުކަން ކުޑަ ބޮޑު ވަޒީރެވެ.

މެންޗެސްޓާގެ މޭޔަރު އެންޑީ ބާންހަމް ވަނީ ލޭބާ ޕާޓީގެ ލީޑާޝިޕް އަށް އޭނާ ވާދަ ކުރައްވަފާނެ ކަމުގެ އިޝާރާތެއް ދެއްވައިފަ އެވެ. 2029 ގައި ބާއްވަން ހަމަ ޖެހިފައިވާ އިންތިޚާބުގެ ކުރިން، ސްޓާމާ މަޤާމުން ވަކި ކުރެވުމަކީ އެކަށީގެންވާ ކަމެއް ކަމަށް ވެސް، މަޝްރަހު ދިރާސާ ކުރާ ފަރާތްތަކުން ވަނީ ބުނެފަ އެވެ.

ޕްރެޝަރު ބޮޑުވެފައިވާ ސްޓާމާގެ މައްސަލަަތައް އޮތީ މައިގަނޑު ތިން ބަޔަކަށެވެ. އެއީ އަމަލީ ގޮންޖެހުންތަކާއި، ނޭދެވޭ މަންޒަރުތައް ސަރުކާރުން ފެނުމާއި، އެތެރޭގެ ސިޔާސީ މައްސަލަ ތަކެވެ. އޭގެ ތެރޭގައި ޓެކްސް ނުދެއްކުމުގެ މައްސަލަ ތަކާއި، ވިޔަފާރި ވެރިންގެ އިތުބާރު ގެއްލުމާއި، ބޭރު މީހުންގެ މައްސަލަ ހައްލު ނުކުރެވުން ހިމެނެ އެވެ.

މީގެ އިތުރުން އޮޕީނިއަމްގެ ޖޭމްސް ކްރައުޗް ބުނާ ގޮތުގައި، ބޮޑު ވަޒީރު ސްޓާމާގެ ސަރުކާރު، ނުވަތަ ވެރިކަން މިހާރު އޮތީ "މަރުވަމުންދާ" ޙާލަތެއްގަ އެވެ. އަދި ސްޓާާމާގެ މަޤުބޫލުކަމް އިންތިހާ އަަށް ދަށްވެފައިވާއިރު، ސްޓާމާ މިހާ ހިސާބަށް އައި ގޮތް އޭނާ އަށް އޮޅިވަޑައިގެންފައިވާ ކަމަށް ވެސް ކްރައުޗް ވަނީ ބުނެފަ އެވެ.

ހަމަ އެހެންމެ، ޓްރަފަލްގާ ސްޓްރެޓެޖީގެ ޖައިލްސް ކެނިންގްހަމް ބުނާ ގޮތުގައި ސްޓާމާ އަށް އެންމެ ބޮޑު ގެއްލުމަކަށް ވާނީ، އޭނާގެ ސިޔާސަތު ތަކުގެ މަޤުސަދު ސާފު ނުވުމެވެ. އެގޮތުން "ސްޓާމަރައިޒް" އަކީ ކޮބައިކަން ސާފު ނުވާ ކަމަށް އޭނާ ވަނީ ފާހަގަ ކޮށްފަ އެވެ.

ނޭޝަނަލް ވެސްޓްމިންސްޓާ ބޭންކުގެ ޗެއާމަން ރިކް ހޭތޯންތުވެއިޓް ފައިނޭންޝަލް ޓައިމްސް އަށް ވިދާޅުވެފައި ވަނީ، މިއީ ކޮންމެ ސިޔާސީ ފިކުރެއްގެ ސިޔާސީ މީހަކަށް ވިޔަސް، އުނދަގޫ ދުވަސް ވަރަަކަށް ވާނެ ކަމަށެވެ. ސިޔާސީ ނިޒާމު ބައިބައިވަމުންދާއިރު، ނައިޖެލް ފަރާޖް ވެރިކަމަށް އައުމަކީ މިހާރު އެކަށީގެންވާ ކަމެއް ކަމަށް ވެސް ކެނިންގްހަމް ވަނީ ފާހަގަ ކުރައްވައިފަ އެވެ.

އައިޕްސޮސްގެ ހޯދުންތަކުން ދައްކާ ގޮތުގައި، 1977 އިން ފެށިގެން މިހާތަނަށް އެންމެ ދަށް އެޕްރޫވަލް ރޭޓިން ލިބިފައި ވަނީ ސްޓާމާ އަށެވެ. ސްޓާމާ އާއި، އޭނާގެ ސަރުކާރުން ކުރަމުން އަންނަ މަސައްކަތާ މެދު ހިތްހަމަ ޖެހޭ ކަމަށް ބުނެފައި ވަނީ އެންމެ 13 އިންސައްތަ މީހުންނެވެ. އެ ހޯދުންތަކުގެ 70 އިންސައްތަ މީހުން ބުނެފައި ވަނީ، ސްޓާމާގެ ސަރުކާރާ މެދު ހިތްހަމަ ނުޖެހޭ ކަމަށެވެ.

އެކަންކަމާ ދެކޮޅަށް ވާހަކަ ދައްކަވަމުން ލޭބާ ޕާޓީގެ ޤައުމީ ކޮންފަރެންސްގައި ސްޓާމާ ވިދާޅުވެފައި ވަނީ، އޭނާގެ ސަރުކާރު ވަޒަން ކުރަން ޖެހޭނީ ތިން ކަމަކުން ކަމަށެވެ. އެގޮތުން ސްޓާމާ ވިދާޅުވީ އޭނާގެ ސަރުކާރު ވަޒަން ކުރަން ޖެހޭނީ ރައްޔިތުންގެ ދިރިއުޅުމުގެ ފެންވަރު ރަނގަޅުވުމާއި، ސަރުކާރުގެ ޚިދުމަތްތައް ރަނގަޅުވުމާއި، އަދި ރައްޔިތުންނަށް ރައްކާތެރިކަން ލިބި ދިނުމުން ކަމަށެވެ.

އެންމެ ފަހުން 2024 ވަނަ އަހަރު އޮތް އިނގިރޭސިވިލާތުގެ އިންތިޚާބުގައި ލޭބާ ޕާޓީ އިން ވަނީ ބޮޑު ކާމިޔާބެއް ހޯދައިފަ އެވެ. އެ އިންތިޚާބު ކާމިޔާބުކޮށް، ލޭބާ ޕާޓީ އިން ވަނީ ޤާނޫނު ހަދާ މަޖިލީހުގެ 411 ގޮނޑި ކާމިޔާބު ކޮށްފަ އެވެ. ލޭބާ ޕާޓީއާ ވާދަވެރި ކޮންސަވޭޓިވް ޕާޓީ އަށް ކާމިޔާބު ކުރެވިފައި ވަނީ 121 ގޮނޑި އެވެ.