ލޫޓުވައިފި، ލޫޓުވައިފި އެއްވުމާ ބެހޭ ގޮތުން ފުލުހުން ނެރުނު "ސިޔާސީ" ބަޔާނަށް ގިނަ ބައެއްގެ ސީރިއަސް ފާޑު ކިޔުން އަމާޒުވެއްޖެ އެވެ.

ސަރުކާރުން ހިންގާ ކަރަޕްޝަން އާއި ސަރުކާރުން ރައްޔިތުންގެ ހައްގުތަކަށް އަރައިގަނެފައިވާތީ އެކަމަށް އިހުތިޖާޖު ކުރުމުގެ ގޮތުން ރާއްޖޭގެ އެންމެ ބޮޑު އިދިކޮޅު ޕާޓީ - އެމްޑީޕީ އިން އަންނަ ހުކުރު ދުވަހުގެ ރޭ އާޓިފިޝަލް ބީޗް ގައި ބޭއްވުމަށް ތައްޔާރުވަމުންދާ އިހްތިޖާޖު އާ ބެހޭ ގޮތުން ފުލުހުންގެ އިދާރާ އިން ބުދަ ދުވަހު ނެރުނު ބަޔާނަށް ފާޑުކީ ބައެއް ފަރާތްތަކުން ބުނެފައިވަނީ އެއީ ސިޔާސީ ބަޔާނެއް ކަމުގައެވެ.

ފުލުހުންގެ ބަޔާނުގައި ބުނީ ބޮޑު އެއްވުމުގައި ކުށްކުރާ ގުރޫޕުތައް ނެރެ މާލެ ހަލަބޮލި ކުރަން އުޅޭކަމުގެ މައުލޫމާތުތަކެއް ފުލުހުންނަށް ލިބިފައިވާ ކަމަށެވެ. އެހެން ނަމަވެސް އެކަމުގެ ތަފްސީލެއް ހާމަ ކޮށްފައި ނުވުމުގެ އިތުރުން އެފަދަ ކަމެއް ރާވާ ކަމުގެ ތުހުމަތުގައި މިހާތަނަށް އެއްވެސް ބަޔަކު ހައްޔަރު ކޮށްފައެއް ވެސް ނުވެއެވެ.

ބައެއް ފަރާތްތަކުން ބުނެފައި ވަނީ އެއީ "ބިރު ދައްކަން" ނެރުނު ބަޔާނެއް ކަމުގައެވެ.

މާފަންނު އުތުރު ދާއިރާގެ ކުރީގެ މެމްބަރު އިމްތިޔާޒް ފަހުމީ ވިދާޅުވީ، "މިއީ ވަރަށް ބޭ އިންސާފު ތާކުންތާކު ނުޖެހޭ ވާހަކަތަކެއް އޮތް މުސްކުޅި ކޮޕީ ބަޔާނެއް،" ކަމުގައެވެ.

ކުރީގެ ޑިފެންސް މިނިސްޓަރ މާރިޔާ އަހްމަދު ދީދީ ފާހަގަ ކުރެއްވި ގޮތުގައި، ފުލުހުން ނެރުނު ބަޔާނުގައި "ސުލްޙަވެރި ޙަރަކާތެއްގެ ނަމުގައި" މިހެން ލިޔެފައި ވުމުން އެއީ ސިޔާސީ، ޕްރޮފެޝަނަލް ނޫން އަދި ހީއެއްގެ މައްޗަށް ކަންކަން ކަނޑައަޅައިގެން ދައްކާފައިވާ ވާހަކައެއް ކަމުގައެވެ. މާރިޔާ ވަނީ ފުލުހުންގެ ޕްރޮފެޝަނަލިޒަމް ދެމެހެއްޓުމަށާއި، "ސިޔާސީ" ބަޔާންތައް ނެރުމުން ދުރުހެލިވުމަށް ގޮވާލައްވާފައެވެ.

އިތުރަށް މާރިޔާ ވިދާާޅުވީ ފުލުހުން ނެރުނު ބަޔާނުގައި "ސުލްޙަވެރި އެއްވުމެއްގެ ނަމުގައި" ކަމަށް ބުނެފައި ވާއިރު، މިއީ ސުލްޙަވެރި އެއްވުމެކޭ ބުނެ އެނޫން ގޮތަށް ހިނގާ ޙަރަކާތެއް ކަމަށް ދެކޭ ކަމަށް ދޭހަވާ ގޮތަށް ބަޔާނެއް ނެރުނީތީ ހިތާމަ ކުރައްވާ ކަމުގައެވެ.

"އަޅުގަނޑުމެންގެ ޤާނޫނުތަކުގައި އެއްވެސް މީހަކު ކުށެއް ކުރިކަން ސާބިތު ނުވާހައި ހިނދަކު، އެމީހާ ކުށްވެރިއެއް ކަމަށް ނުބެލެވޭނެ،" ކަން ވެސް އެކްސް ގައި މާރިޔާ ކުރެއްވި ޕޯސްޓު ގައި ވިދާޅުވިއެވެ.

އެހެން ކަމާއެކު، ފުލުހުން ވެސް ޕްރޮފެޝަނަލް ވުމަށާއި، މިފަދަ ހީއެއްގެ މައްޗަށް ކަންކަން ކަނޑައަޅައިގެން ދައްކާ ވާހަކަތަކަށް ނުފޫޒު ފޯރުވުމަށް ސިޔާސީ ފަރާތްތަކަށް ފުރުސަތު ނުދިނުމަށް ގޮވާލާ ކަމަށް ވެސް މާރިޔާ ވިދާޅުވިއެވެ.

އެކްސް ގައި ފުލުހުން ޝާއިއު ކުރި މި ބަޔާނަށް އާންމުންގެ ގިނަ ބަޔަކު ވަނީ ނުރުހުން ފާޅު ކޮށްފައެވެ.

ފުލުހުންގެ ބަޔާނާ ހަވާލާދީ އެމްޑީޕީ އިން ނެރުނު ބަޔާނުގައި ވެސް "ލޫޓުވައިފި، ލޫޓުވައިފި" އެއްވުމަށް ހުރަސް ނޭޅުމަށް ފުލުހުންނަށް ގޮވާލާފައިވެއެވެ.