ހޯމް މިނިސްޓަރު އަލީ އިހުސާނު ގެ ބެއްލެވުމުގެ ދަށުން ހިނގަމުން އަންނަ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން ގެ ތެރޭގައި އޭނާ ވެސް ހުންނަވައިގެން ޕީއެންސީ އަށް ވަގަށް މެމްބަރުން ވެއްދުމުގެ މަސައްކަތް ހިންގާފައިވާކަން ފަޅާ އަރާފައި ވަނިކޮށް ކަރަޕްޝަން ހުއްޓުވޭނެ ގޮތް އޭނާ ވިދާޅުވެ ދެއްވައިފިއެވެ.

ވެރިކަން ހިންގާ ރައީސް މުއިއްޒުގެ ޕާޓީ އަށް މެމްބަރުން އިތުރު ކުރުމަށް ހިންގި ހަރަކާތުގައި ވަގު ސޮއި ކޮށް މީހުންނަށް ނޭނގި އެތައް ބަޔަކު ޕާޓީ އަށް ވެއްދި މައްސަލަ ފެންމަތިވި ދަނޑިވަޅުގައި އިދިކޮޅު އެންމެ ބޮޑު ޕާޓީ އެމްޑީޕީ އިން ވަނީ އިހުސާނުގެ އިސްތިއުފާ އަށް ވެސް ގޮވާލާފައެވެ.

"ކަރަޕްޝަން ހުއްޓުވާނެ ގޮތް ކިޔައިދެއްވަމުން އިހުސާން އެކްސް ގައި ކުރެއްވި ޕޯސްޓު ގައި ވިދާޅުވީ، ކޮރަޕްޝަން ހުއްޓުވުމަށް އެންމެ ރަނގަޅު ގޮތަކީ ޒިންމާދާރު މަޤާމުތަކުގައި ތިބޭ އިރު ކޮރަޕްޝަން ހުއްޓުވުމަށް އަޅަން ޖެހޭ ފިޔަވަޅު އެޅުމާއި ކޮރަޕްޝަންގެ ޢަމަލު ހިންގާ ފަރާތްތަކުގެ މައްޗަށް ޤާނޫނު ތަންފީޛު ކުރުން،" ކަމުގައެވެ.

އާންމުންނަށް ކޮމެންޓް ކުރުން ރެސްޓްރިކްޓް ކޮށް ކޮށްފައިވާ މި ޕޯސްޓުގެ ސްކްރީން އިމޭޖެއް އެޓޭޗް ކުރައްވާ ގާނޫނީ ވަކީލު އައިކް އަހްމަދު އީސާ ވިދާޅުވީ، އިހްސާން އަކީ އެތައް ސަތޭކަ ބައެއްގެ އައިޑެންޓިޓީ ވައްކަމުގައި ސީދާ ބައިވެރިވެފައިވާ ފަރާތެއް ކަމުގައެވެ.

އިހުސާނުގެ ޕޯސްޓުގައި އިތުރަށް ވިދާޅުވީ، އެ ބޭފުޅުން ގެންދަވަނީ ކަރަޕްޝަން ހުއްޓުވުމުގެ މަސައްކަތް ކުރަމުން ކަމަށެވެ.

އައިކް ވިދާޅުވީ، އިހުސާން އަކީ ރައީސުލްޖުމްހޫރިއްޔާ އުފެއްދެވި ކޮމިޝަނެއްގެ ރިޕޯޓެއްގައި ޤާނޫނީ އިމުން ބޭރުވެ، ނުފޫޒާއި ބާރު ނަހަމަ ގޮތުގައި ބޭނުންކުރި ކަމަށް ނަން ހާމަކޮށްފައިވާ މީހެއް ކަމަށެވެ.

އޭގެ އިތުރުން އައިކް ފާހަގަ ކުރައްވާފައި ވަނީ އިހްސާން އަކީ ޖިނާއީ ތަޙުޤީޤުތަކަށް ސީދާ ނުފޫޒު ފޯރުވާފައިވާ އަދި އަމިއްލަ ފައިދާއަށްޓަކައި ސަރުކާރުގެ މުދަލާއި މުވައްޒަފުން ބޭނުންކޮށްފައިވާ ފަރާތެއް ކަމުގައެވެ.

އިހުސާން ވިދާޅުވީ، މަޤާމުތަކުގައި އިދިކޮޅު ފަރާތްތަކުން ތިއްބެވި އިރު ކޮރަޕްޝަން ހުއްޓުވަން ކުރެއްވީ ކޮންކަމެއްތޯ ސުވާލު ކުރަން ޖެހޭ ކަމަށާއި، އެކަމުގައި އެބޭފުންނަށް "ޖަވާބު ދެވޭނެ" ކަމަށެވެ.

ރޭވިގެން ކުރިއަށް ގެންދިޔަ ކަރަޕްޝަންގެ އަމަލެއްގެ ގޮތުގައި ގިނަ ބަޔަކު ސިފަކުރުމުން ދިޔަ ވަގު ފޯމު ފުރުމުގެ މަސައްކަތުގައި، ހޯމް މިނިސްޓްރީގެ އޮފިޝަލުން އާންމު މީހުންގެ ފޮޓޯތައް ކްރޮޕްކޮށް އަދި ޕީއެންސީގެ މެމްބަރޝިޕް ފޯމުތައް ފުރަމުންދާ މަންޒަރު ދައްކުވައިދޭ ލީކްވެފައިވާ ފޮޓޯތަކާ ގުޅިގެން ގިނަ ބަޔަކު ވަނީ ނުރުހުން ފާޅު ކޮށްފައެވެ. މި ފޮޓޯތަކުގައި ހޯމްލޭންޑް ސެކިއުރިޓީ މިނިސްޓަރ އަލީ އިހުސާން އަދި އެހެނިހެން ސިޔާސީ މަޤާމުތަކުގައި ތިބި ފަރާތްތައް ހިމެނެއެވެ.

15 ޖަނަވަރީގައި ހާމަވި މި ފޮޓޯތައް ނަގާފައިވަނީ ޑީއެންއާރުގެ ކޮޓަރިއެއްގެ ތެރެއިންނެވެ.

ޕީއެންސީ އަށް ދައުލަތުން ދޭ ފައިސާގެ އަދަދު އިތުރުކުރުމަށްޓަކައި މެމްބަރުންގެ އަދަދު އިތުރުކޮށްފައިވާ ކަމުގެ ތުހުމަތު މިކަމުގައި ކުރެވުނެވެ.

އެމްޑީޕީން ބުނެފައިވަނީ އެ ޕާޓީގެ މެމްބަރުން ޕީއެންސީ އަށް ބަދަލުކޮށްފައިވާ ކަމަށް ބުނެ 3،000 ޝަކުވާ ލިބިފައިވާ ކަމަށެވެ. އޭގެ އިތުރުން ޑިމޮކްރެޓްސް ޕާޓީން ގާތްގަނޑަކަށް 500 މެމްބަރުން ގެއްލިފައިވެއެވެ.

އިހުސާނުގެ ޕޯސްޓަށް ރައްދު ދެއްވަމުން ރިޔާޒް މަންސޫރު ވިދާޅުވީ، އިހްސާން އަކީ 6.9 ބިލިއަން ރުފިޔާގެ ކޮންޓްރެކްޓެއް ބޭރުގެ ކުންފުންޏެއް ކަމުގައިވާ ބެސްޓިނެޓަށް ދީފައިވާ ފަރާތެއް ކަމުގައެވެ. މިކަން ކޮށްފައިވަނީ އެއްވެސް ބީލަމެއް ނެތި، އަދި އެއްވެސް ސަބަބެއް ނެތި ކަމަށެވެ. އެއީ ރަނގަޅަށް މަސައްކަތްކުރާ ރާއްޖޭގައި ތައްޔާރު ކުރެވިފައިވާ ސޮފްޓްވެއަރ ލިބެން ހުއްޓާ ކަމަށް ވެސް ރިޔާޒް މަންސޫރު ވިދާޅުވިއެވެ.