ސޮސިއެޑާޑް ބަލިކޮށް، ބާސެލޯނާ އެއް ވަނަ އަށް

ސްޕެނިޝް ލީގުގައި ރެއާލް ސޮސިއެޑާޑްއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން ލީގު ތާވަލްގެ އެއް ވަނަ އަށް ޖެހިލައިފި އެވެ.

އާދީއްތަ ދުވަހުގެ ރޭ ކުޅުނު މެޗަށް ނިކުތްއިރު، އެ މެޗުން މޮޅުވެ އެއް ވަނަ އަށް ޖެހިލުމުގެ ފުރުސަތު ބާސެލޯނާ އަށް އޮތެވެ. އެއީ ވާދަވެރި ރެއާލް މެޑްރިޑް އެންމެ ފަހުން ކުޅުނު މެޗުން އެ ޓީމު ބަލިވެފައި އޮތުމުންނެވެ.

ފުރުސަތުގެ ބޭނުން ހިފައި ބާސެލޯނާ އިން ވަނީ 2-1 ސޮސިއެޑާޑް ބަލިކޮށްފަ އެވެ. މެޗުގައި ސޮސިއެޑާޑް އިން ލަނޑު ޖަހައި ކުރި ހޯދާފައި ވަނިކޮށް، ބާސެލޯނާ އިން ވަނީ ފަހަތުން އަރައި ދެ ލަނޑު ޖަހައިގެން މޮޅުވެފަ އެވެ.

މެޗުގެ ފުރަތަމަ ހާފުގެ 31 ވަނަ މިނެޓުގައި ސޮސިއެޑާޑް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ސޮސިއެޑާޑް އަށް ޖަހައިދިނީ އަލްވާރޯ އޮޑްރިއޯޒޮލާ އެވެ. އެއީ އަންޑާ ބެރެނެޓްޒިއާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ބާސެލޯނާ އަށް ނަތީޖާ ހަމަހަމަ ކޮށްދިނީ ޖޫލްސް ކޫންޑޭ އެވެ. އެއީ މާކަސް ރަޝްފޯޑު ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

އޭގެ ފަހުން ދެ ވަނަ ހާފު ފަށައިގެން ކުރީ ކޮޅު ބާސެލޯނާ އިން ވަނީ ދެ ވަނަ ލަނޑެއް ޖަހައި ލީޑު ނަގައިފަ އެވެ. ދެ ވަނަ ހާފު ފަށައިގެން ސާދަ ވަނަ މިނެޓުގައި ބާސެލޯނާ އަށް އެ ލަނޑު ޖަހައިދިނީ ޕޮލެންޑުގެ ފޯވާޑު ރޮބާޓް ލެވަންޑޯސްކީ އެވެ. އެއީ ލަމީން ޔަމާލް ތަނަވަސްކޮށްދިން ފުރުސަތެއްގައި ލެވަންޑޯސްކީ ޖެހި ލަނޑެކެވެ.

މެޗަށް ފަހު ވާހަކަ ދައްކަމުން ބާސެލޯނާގެ ކޯޗު ހަންސީ ފްލިކް ބުނެފައި ވަނީ، އެ މެޗު ފެށުނީ ވަރަށް އުނދަގޫކޮށް ކަމަށާއި، ބާސެލޯނާ އިން ހޯދީ އުނދަގޫ މޮޅެއް ކަމަށެވެ. ބާާސެލޯނާގެ ކުޅުންތެރިން މެޗުން މޮޅުވުމަށް ވަރަށް މަސައްކަތް ކުރިކަން ފާހަގަކޮށް ފްލިކް ބުނީ، ބާސެލޯނާ އަށް އެ މެޗުން ލިބުނީ ހައްގު މޮޅެއް ކަމަށެވެ.

އެކަން ފާހަގަކޮށް ފްލިކް ބުނީ ބާސެލޯނާ އިން ދައްކަމުން އަންނަ ކުޅުމާ މެދު އޭނާ ވަރަށް ބޮޑަށް ހިތްހަމަ ޖެހޭ ކަމަށާއި، ކުޅުންތެރިންނާ މެދު ފަޚުރުވެރިވާ ކަމަށެވެ. އަދި ބާސެލޯނާ އިން ފުރަތަަމ އެގާރަ އަށް ބަދަލު ގެނެސްގެން ކުޅެން ޖެހުނު ނަމަވެސް، އެކަމުގައި މާ ބޮޑު ކަންބޮޑުވުމެއް ނެތް ކަމަށް ފްލިކް ވަނީ ފާހަގަކޮށްފަ އެވެ.

މޮޅާއެކު ބާސެލޯނާ އެއް ވަނައިގައި އޮތީ، މިހާތަނަށް އެ ޓީމު ކުޅެފައިވާ ހަތް މެޗުން 19 ޕޮއިންޓާ އެކު އެވެ. ހަ މެޗުން ބާސެލޯނާ މޮޅުވެފައިވާއިރު، އެއް މެޗުން ވަނީ އެއްވަރުވެފަ އެވެ. ދެ ވަނައިގައި ރެއާލް އަށް ހަތް މެޗުން ލިބެނީ 18 ޕޮއިންޓެވެ.