ލިތުއޭނިއާ މުބާރާތުގައި ލައިބާ އަށް ރަނގަޅު ފެށުމެއް

ލިތުއޭނިއާގައި މިހާރު ކުރިއަށްދާ، ލިތުއޭނިއަން އިންޓަނޭޝަނަލް ފެސްޓިވަލްގައި ރާއްޖޭގެ ޒުވާން ކުޅުންތެރިޔާ، ލައިބާ އަޙުމަދު މަޚްލޫފް (އެލީ) ރަނގަޅު ފެށުމެއް ހޯދައިފި އެވެ.

މުބާރާތުގެ ސިންގަލްސް އިވެންޓުގައި ވާދަކޮށް ލައިބާ ވަނީ ކުއާޓާ ފައިނަލްގެ ފުރުސަތު ހޯދައިފަ އެވެ. އެއީ ލައިބާ ހިމެނުނު ގުރޫޕު ޑީގައި ކުޅުނު ތިން މެޗުން ވެސް މޮޅުވެ، ގުރޫޕުގެ އެއް ވަނަ ހޯދައިގެންނެވެ. ފުރަތަމަ މެޗުގައި ލައިބާ ވަނީ ވިކްޓޯރިއާ ސިބުލްސްކާގެ މައްވަށް ސީދާ ދެ ސެޓުން ކުރި ހޯދައިފަ އެވެ. އެއީ 21-17 އަދި 21-16 އިންނެވެ. ދެ ވަނަ މެޗުގައި ބިއާޓްރިސް އުޒޮމެކައިޓްގެ މައްޗަށް ވެސް ކުރި ހޯދީ ސީދާ ދެ ސެޓުންނެވެ. އެއީ 21-13 އަދި 21-10 އިންނެވެ. ފަހު މެޗުގައި ވަކާ އިންތައިޓޭގެ މައްޗަށް ކުރި ހޯދީ، 21-17 އަދި 21-12 އިންނެވެ.

މުބާރާތުގެ ޑަބަލްސް އިވެންޓުގެ ސެމީ ފައިނަލް އިން ވެސް ލައިބާ ވަނީ ފުރުސަތު ހޯދައިފަ އެވެ. ޑަބަލްސް އިވެންޓުގައި ލައިބާގެ ޕެއާ ޕާޓްނަރަކީ ޔޫކްރެއިންގެ އެމާ ކަރަޓަނޯވާ އެވެ. ޑަބަލްސް އިވެންޓުގެ ގުރޫޕް ސްޓޭޖުގައި ލައިބާ އާއި އެމާ ވަނީ ކުޅުނު ތިން މެޗުން ވެސް މޮޅުވެފަ އެވެ. ފުރަތަމަ މެޗާއި، ތިން ވަނަ މެޗު ކާމިޔާބު ކުރީ ސީދާ ދެ ސެޓުންނެވެ. ދެ ވަނަ މެޗުން މޮޅުވީ ދެ ސެޓު އެއް ސެޓުންނެވެ.

މުބާރާތުގެ ސެމީ ފައިނަލް މެޗުތަކާއި. ކުއާޓާ ފައިނަލް މެޗުތައް އަދި މިކްސް ޑަބަލްސްގެ ކުޅުން އޮންނާނީ ހޮނިހިރު ދުވަހު އެވެ.

މި މުބާރާތުގައި ލިތުއޭނިއާގެ އިތުރުން، ލަޓްވިއާ، ޕޮލެންޑު، އެސްޓޯނިއާ އަދި ޔޫކްރެއިންގެ ޓޮޕް ކުޅުންތެރިން ވާދަކުރެ އެވެ. ދެ ދުވަހުގެ މުއްދަތަކަށް ކުރިއަށްދާ މި މުބާރާތަކީ، ބެޑްމިންޓަން ޔޫރަޕުގެ ކަލަންޑަރު މުބާރާތެކެވެ.