އެމެރިކާގެ ދިފާއީ ވަޒީރު އެ ގައުމުގެ ސިފައިންގެ އިސް ޖެނެރަލުންނާއެކު ކުއްލި ބައްދަލުވުމަކަށް އަމުރު ކުރައްވައިފި

ޕެންޓަގަންގެ ވެރިޔާ ޕީޓް ހެގްސެތު އަންނަ ހަފްތާގައި ވާޖިނިއާ ގައި ހުންނަ މެރީން ކޯޕްސް ބޭސްއެއް ގައި އެ ގައުމުގެ އިސް ޖެނެރަލުންނާއި އެޑްމިރަލުން ބައްދަލުކުރެއްވުމަށް ބުރާސްފަތި ދުވަހު އަމުރުކުރައްވައިފިއެވެ.

މިކަމާ ގުޅޭ މައުލޫމާތު އެނގޭ ފަރާތްތަކާ ހަވާލާދީ ރިޕޯޓު ކޮށްފައިވާ ގޮތުން، ހެގްސެތު ވަނީ ކޮމާންޑިންގ އޮފިސަރުން ނުވަތަ އެންލިސްޓެޑް އެޑްވައިޒަރުންގެ ގޮތުގައި ތިބި ސަތޭކަޔަށް ވުރެ ގިނަ ޖެނެރަލުންނަށް މި ބައްދަލުވުމުގައި ބައިވެރިވުމަށް އަންގަވާފައެވެ.

މި ބައްދަލުވުމާ ގުޅޭ ރިޕޯޓުކުރި ދަ ވޮޝިންޓަން ޕޯސްޓުން ބުނެފައިވާ ގޮތުގައި، އެމެރިކާގައި އަދި ދުނިޔޭގެ އެކި ކަންކޮޅުތަކުގައި އެ ގައުމުގެ ގާތްގަނޑަކަށް 800 ޖެނެރަލުންނާއި އެޑްމިރަލުން ތިބެއެވެ.

ހެގްސެތު މީގެ ކުރިން ވިދާޅުވެފައިވަނީ އަސްކަރިއްޔާގައި މަތީ ރޭންކުގެ އޮފިސަރުން ގިނަކަމަށާއި، މި އަދަދު މަދު ކުރެވިދާނެ ކަމަށް ވެސް ވަނީ އިޝާރާތް ކުރައްވާފައެވެ.

ޕެންޓަގަންގެ އިސް ތަރުޖަމާނު ޝޯން ޕާނެލް ވަނީ އަންނަ ހަފްތާގައި ހެގްސެތު އެ މަނިކުފާނުގެ އިސް އަސްކަރީ ވެރިންނާ މުޚާތަބު ކުރައްވާނެކަން ދަ ޕޯސްޓަށް ކަށަވަރުކޮށްދީފައެވެ.

މިކަމާ ގުޅޭ ގޮތުން ދަ ވޮޝިންޓަން ޕޯސްޓަށް ބުނެފައި ވަނީ، "ހެގްސެތުގެ ބައްދަލުވުމަށް އަންނާނެ ކަމަށް ބެލެވޭ ފަރާތްތަކުގެ ތެރޭގައި ހަނގުރާމަވެރި ސަރަޙައްދުތަކުގައި ތިބި އިސް ކޮމާންޑަރުންނާއި ޔޫރަޕާއި މެދުއިރުމައްޗާއި އޭޝިއާ-ފެސިފިކް ސަރަޙައްދުގައި ތިބި އިސް އަސްކަރީ ވެރިން ހިމެނެއެވެ."