އެމެރިކާގެ އަސްކަރިއްޔާގެ އިސް ސިފައިންގެ ވެރިންގެ ބައްދަލުވުމެއްގައި، އެ ޤައުމުގެ ރައީސް ޑޮނަލްޑް ޓްރަމްޕް ބައިވެރިވެ ވަޑައިަގަންނަވާނެ ކަމަށް އެމެރިކާގެ އިސް އޮފިޝަލަކު ހާމަ ކުރައްވައިފި އެވެ.

އެމެރިކާގެ އިސް އޮފިޝަލަކާ ހަވާލާދީ މީޑިއާ ތަކުގައި ބުނެފައި ވަނީ، އަންގާރަ ދުވަހު ވަޖީނިއާގެ ކުއަންޓިކޯގައި އޮންނަ އެމެރިކާގެ ސިފައިންގެ ވެރިންގެ ބައްދަލުވުމުގައި ޓްރަމްޕް ބައިވެރިވެ ވަޑައިގަންނަވާނެ ކަމަށެވެ.

އެ ބައްދަލުވުމަކީ، އެމެރިކާގެ ސިފައިންގެ އެންމެ އިސްވެރިން، އެއް ވަގުތެއްގައި އެއް ތަނަކުން ބައްދަލުވާ މަދު ފުރުސަތުގެ ތެރެއިން ފުރުސަތެއް ކަަމަށްް ވަނީ ފާހަގަ ކޮށްފަ އެވެ. އެކަމާ ގުޅިގެން އެމެރިކާގެ ރިޔާސީ ގަނޑުވަރު، ވައިޓް ހައުސް އިން ވަކި އެއްޗެއް ބުނެފައި ނުވެ އެވެ. އެ ބައްދަލުވުމުގެ ޚަބަރު އެންމެ ފުރަތަމަ ރިޕޯޓު ކޮށްފަިއ ވަނީ ވޮޝިންޓަން ޕޯސްޓުންނެވެ.

ރޮއިޓާސް އަށް މައުލޫމާތު ދެމުން އެމެރިކާގެ އޮފިޝަލު ބުނެފައި ވަނީ، ޓްރަމްޕް ބައިވެރިވެ ވަޑައިގަންނަވާ އެ ބައްދަލުވުން ގާތް ގަނޑަކަަށް އެއް ގަޑިއިރަށް ދެމިގެން ދާނެ ކަމަށެވެ. އެ ބައްދަލުވުމުގައި ޑިފެންސް ސެކްރެޓަރީ ޕީޓް ހެގްސެތު ސިފައިންގެ "ވޯރިއާ އީތޯސް" ނުވަތަ، ހަނގުރާމަވެރިންގެ ސިފަތަކާ ބެހެ ގޮތުން ވާހަކަ ދައްކަވާނެ ކަމަށް ވެސް އޮފިޝަލު ވަނީ ހާމަ ކޮށްފަ އެވެ.

ދުނިޔޭގެ އެކި ކަންކޮޅު ތަކުގައި އެމެރިކާގެ އަސްކަރިއްޔާގެ ސިފައިން ޙަރަކާތްތެރިވެ އެވެ. އޭގެ ތެރޭގައި ދެކުނު ކޮރެއާ، ޖަޕާން އަދި މެދުއިރުމަތީގެ ޤައުމުތައް ވެސް ހިމެނެ އެވެ. މި ސަރަހައްދު ތަކުގައި ތިބި ސިފައިންގެ އިސްވެރިންނަކީ، ދެ ތަރި، ތިން ތަރު ނުވަތަ ހަތަރު ތަރީގެ ޖެނަރަލުންނާއި، އެޑްމިރަލުންނެވެ.

ޓްރަމްޕްގެ ރިޔާސީ ދެ ވަނަ ދައުރުގައި ޑިފެންސް ސެކްރެޓަރީގެ މަގާމަށް އައްޔަން ކުރެވި ހެގްސެތު، މަޤާމާ ހަވާލުވެ ވަޑައިގެންނެވުމަށް ފަހު އަންނަނީ ގިނަ ބަދަލު ތަކެއް ގެންނަމުންނެވެ. އޭގެ ތެރޭގައި އިސް ޖެނަރަލުންނާއި، އެޑްމިރަލުން ވަޒީފާ އިން ވަކި ކުރުމާއި، ޓްރަމްޕްގެ ޤައުމީ ސަލާމަތީ އެޖެންޑާ ތަންފީޒު ކުރެއްވުމަށް މަސައްކަތް ކުރެއްވުން ހިމެނެ އެވެ.