ޕެންޓަގަން ގެ ނަން "ޑިޕާޓްމަންޓް އޮފް ވޯރ" އަށް ބަދަލުކުރުމަށް ޓްރަމްޕް ނިންމަވައިފި

އެމެރިކާގެ ރައީސް ޑޮނަލްޑް ޓްރަމްޕް ޕެންޓަގަން ގެ ނަން "ޑިޕާޓްމަންޓް އޮފް ވޯރ" އަށް ބަދަލު ކުރުމަށް ނިންމަވައިފި އެވެ.

އޭނާ ހުކުރު ދުވަހު ސޮއިކުރައްވާ އެގްޒެކެޓިވް އޯޑަރެއްގެ ދަށުން ޑިފެންސް ޑިޕާޓްމަންޓަށް އިތުރު ނަމެއްގެ ގޮތުގައި މި ނަން ބޭނުން ކުރުމަށާއި، ޑިފެންސް ސެކްރެޓަރީ ޕީޓް ހެގްސެތްގެ މަޤާމުގެ ނަން "ސެކްރެޓަރީ އޮފް ވޯރ" އަށް ބަދަލު ކުރުމަށް ވަނީ ހަމަ ޖެހިފައެވެ.

އެމެރިކާގެ ހަތިޔާރުއެޅި ބާރުތައް ބަލަހައްޓާ ޕެންޓަގަނަކީ 1789 ގައި ކެބިނެޓް ފެންވަރުގެ އިދާރާއެއްގެ ގޮތުގައި އުފެދި 1947 އާ ހަމައަށް ދެމިއޮތް ވޯރ ޑިޕާޓްމަންޓް އެވެ.

އެގްޒެކެޓިވް ޑިޕާޓްމަންޓްތައް އުފެއްދުމުގެ ޒިންމާ އޮންނަނީ އެމެރިކާގެ ކޮންގްރެސް އަށް ކަމުން، ޑިޕާޓްމަންޓްގެ ނަން ޤާނޫނީ ގޮތުން ބަދަލު ކުރުމަށް ކޮންގްރެސް އިން ފާސް ކުރަން ޖެހޭނެއެވެ.

ބީބީސީ އިން ބުނާ ގޮތުގައި އެ އެޖޭންސީ އަށް ފެނިފައިވާ އެގްޒެކެޓިވް އޯޑަރުގައި ބުނެފައި ވަނީ: "ޑިޕާޓްމަންޓް އޮފް ވޯރ" މި ނަމުން ދޭހަ ވަނީ ހަމައެކަނި ދިފާއީ ޤާބިލިއްޔަތު ފާހަގަކުރާ "ޑިޕާޓްމަންޓް އޮފް ޑިފެންސް" އަށް ވުރެ ވަރުގަދަ ތައްޔާރީ ހާލަތުގައި އޮތްކަމުގެ އަޒުމުގެ މެސެޖެކެވެ."

ޓްރަމްޕް ވަނީ މި ގޮތައް ނަން ބަދަލުކުރުމުގެ ޚިޔާލު ތަކުރާރުކޮށް ފާހަގަ ކުރައްވާފައެވެ. އޭނާ ވިދާޅުވި ގޮތުގައި ކުރީގެ ނަމުގެ ދަށުން އެމެރިކާ އަށް ދެ ބޮޑު ހަނގުރާމައިގައި "ކާމިޔާބީގެ ތާރީޚެއް" ލިބިފައިވެއެވެ. އަދި މިފަދަ ބަދަލަކަށް ޤާނޫނު ހަދާ މަޖިލީހުގެ މެންބަރުން ތާއީދު ކުރާނެ ކަމުގެ އުއްމީދު އޭނާ ފާޅުކުރައްވާފައިވެއެވެ.

"ކޮންގްރެސްގެ އެއްބާރުލުން ބޭނުންވާ ނަމަ އެކަން ލިބޭނެކަން ޔަޤީން. އަޅުގަނޑު ހިތުން އެކަން ބޭނުމެއްވެސް ނުވާނެ،" ރައީސް ވިދާޅުވިއެވެ.

ޓްރަމްޕް އަދި ދިފާއީ ވަޒީރު ހެގްސެތް ވަނީ ޑިފެންސް ޑިޕާޓްމަންޓްގެ އަމާޒު "ހަނގުރާމަ" އާއި "ހަނގުރާމަވެރިންގެ ރޫހު" އަށް ބަދަލު ކުރަން މަސައްކަތް ކުރައްވާފައެވެ.