ޔަމަންގެ ހޫތީންއާ ދެކޮޅަށް ކުރަމުން އަންނަ ހަނގުރާމައިގައި މާޗު މަހުން ފެށިގެން މިހާތަނަށް، ޔަމަންގެ 1000 އަމާޒަށް ހަމަލާ ދީފައި ވާނެ ކަމަށް އެމެރިކާގެ ޕެންޓަގަން އިން ހާމަކޮށްފި އެވެ.

ރަތް ކަނޑާއި، އަދަން ކަނޑުގައި ދުއްވަމުން އަންނަ އުޅަނދު ފަހަރުތަކަށް އަމާޒުކޮށް ހޫތީން އިން ވަނީ 2023 ވަނަ އަހަރުން ފެށިގެން ހަމަލާ ދޭން ފަށައިފަ އެވެ. އެއާ ގުޅިގެން، 2024 ވަނަ އަހަރުގެ ކުރީ ކޮޅު އެމެރިކާ އިން ވަނީ ވަނީ ހޫތީންއާ ދެކޮޅަށް ހަމަލާ ދޭން ފަށައިފަ އެވެ. 

ޕެންޓަގަންގެ ތަރުޖަމާނު ޝޯން ޕާނެލް ވިދާޅުވެފައިވާ ގޮތުގައި، މާޗު މަހުގެ 15 އިން ފެށިގެން ޔޫއެސް ސެންޓްކޮމްގެ ހަމަލާތަކުގައި ހޫތީ ހަނގުރާމަވެރިންނާއި، އެ ޖަމާއަތުގެ ލީޑަރުން ވަނީ މަރުވެފަ އެވެ. އަދި އެކަމުގެ ސަބަބުން އެ މީހުންގެ ޤާބިލުކަން ދަށްވެފައިވާ ކަމަށް ވެސް ވަނީ ބުނެފަ އެވެ. 

އީރާނުގެ އެހީތެރިކަން ލިބިގެން ހޫތީން ދޭ ހަމަލާތަކާ ގުޅިގެން، ސުވޭޒް ކެނަލް މެދުވެރިކޮށް އުޅަނދު ފަހަރު ދަތުރު ކުރުން ވަނީ ހުއްޓުވައިފަ އެވެ.

މިއީ ދުނިޔޭގެ ކަނޑު ދަތުރުފަތުރުގެ 12 އިންސައްތަ ހިއްސާކުރާ މުހިންމު މަގެކެވެ. ހޫތީން އިން ބުނާ ގޮތުގައި އެމީހުން މިފަދަ ހަމަލާތައް ދެނީ ޣައްޒާގެ ރައްޔިތުންނާ އެއްބައިވުމުގެ ގޮތުންނެވެ.