ފަހު ވަގުތު މޮޅުވެ، ލިވަޕޫލް ވެސް ގަދަ 16 އަށް

ކަރަބޯ ކަޕްގެ ތިން ވަނަ ބުރުގައި ސައުތެމްޓަންއާ ދެކޮޅަށް ކުޅުނު މެޗުން ފަހު ވަގުތު މޮޅުވެ، ލިވަޕޫލް އިން މުބާރާތުގެ ގަދަ 16 ވަނަ ބުރުން ޖާގަ ހޯދައިފި އެވެ.

އަންގާރަ ދުވަހުގެ ރޭ ކުޅުނު މެޗު ލިވަޕޫލް އިން ކާމިޔާބު ކުރީ 2-1 އިންނެވެ. މެޗުގައި ލިވަޕޫލް އިން ލަނޑު ޖަހައި ކުރި ހޯދާފައި ވަނިކޮށް، ސައުތެމްޓަން އިން ނަތީޖާ ހަމަހަމަ ވެސް ކުރި އެވެ. ނަމަވެސް، ލިވަޕޫލް އިން ވަނީ ފަހު ވަގުތު ލަނޑު ޖަހައިގެން މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ ފަހު ވަގުތުގެ ތެރޭގައި ލިވަޕޫލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އެލެކްސެންޑާ އިސާކް އެވެ. އެ ލަނޑު ޖަހަން އިސާކް އަށް ފުރުސަތު ތަނަވަސްކޮށްދިނީ ފެޑެރިކޯ ޗިއެސާ އެވެ.

މެޗުގެ ދެ ވަނަ ހާފުގައި ސައުތެމްޓަން އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. މެޗުގެ 76 ވަނަ މިނެޓުގައި ސަައުތެމްޓަން އަށް ނަތީޖާ ހަމަހަމަ ކޮށްދިނީ ޝިއާ ޗާލްސް އެވެ.

އޭގެ ފަހުން މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް ލިވަޕޫލް މޮޅު ކޮށްދިނީ ހޫގޯ އެކިޓީކޭ އެވެ. އެ ލަނޑު ޖަހަން އޭނާ އަށް ވެސް ފުރުސަތު ތަނަވަސްކޮށްދިނީ ޗިއެސާ އެވެ.

މެޗަށް ފަހު ވާހަކަ ދައްކަމުން ލިވަޕޫލްގެ ކޯޗު އާން ސްލޮޓް ބުނެފައި ވަނީ، މެޗުގައި ލިވަޕޫލްގެ ކުޅުންތެރިން ދެއްކީ އޭނާ ހިތްހަމަ ޖެހޭ ވަރުގެ ކުޅުމެއް ކަމަށެވެ. ޚާއްސަކޮށް މެޗުގެ ނަތީޖާއާ މެދު ހިތްހަމަ ޖެހޭ ކަމަށް އޭނާ ބުންޏެވެ.

ސްލޮޓް ބުނީ ކުރިއަށް ދާން މަސައްކަތް ކުރަން ޖެހީ ފަހަރަކު ހަރުފަތަކުން ކަމަށާއި، ކާމިޔާބަށް ވާސިލުވުމަށް ގަދައަޅާ މަސައްކަތް ކުރަން ޖެހޭނެ ކަމަށެވެ. އަދި މަސައްކަތް ކޮށްފި ނަމަ، ބޭނުންވާ ނަތީޖާ ވެސް ހާސިލު ވާނެ ކަމަށް އޭނާ ބުންޏެވެ.