އެތައް މިލިއަން ރުފިޔާއެއްގެ ގެއްލުމުގައި ހިންގާ ފެނަކައަށް އިތުރު ޑެޕިއުޓީ މެނޭޖިން ޑިރެކްޓަރެއް އައްޔަންކޮށްފި
23 ސެޕްޓެމްބަރު 2025 | އަންގާރަ 18:16ގެއްލުމުގައި ހިންގަމުން އަންނަ ފެނަކަ ކޯޕަރޭޝަނަށް އާދަމް ތައުފީގް ޑެޕިއުޓީ މެނޭޖިން ޑިރެކްޓަރެއްގެ ގޮތުގައި ވަނީ އައްޔަންކޮށްފަ
ފެނަކައިގެ ޑެޕިއުޓީ މެނޭޖިން ޑިރެކްޓަރު ކަމަށް އައްޔަންކުރި އާދަމް ތައުފީގު
އެތައް މިލިއަން ރުފިޔާއެއްގެ ގެއްލުމުގައި ހިންގަމުން އަންނަ ފެނަކަ ކޯޕަރޭޝަން ލިމިޓެޑަށް އިތުރު ޑެޕިއުޓީ މެނޭޖިން ޑިރެކްޓަރެއް އަންގާރަ ދުވަހު އައްޔަންކުރައްވައިފިއެވެ.
ފެނަކަ ކުންފުނިން އަންގާރަ ދުވަހު އިއުލާނުކޮށްފައިވާ ގޮތުގައި އެ ކުންފުނީގެ އައު ޑީއެމްޑީއަކީ, އާދަމް ތައުފީގެވެ. އޭނާ ވަނީ ކުރީގެ ރައީސް އަބްދުالله ޔާމީންގެ ވެރިކަމުގައި އިކޮނޮމިކް މިނިސްޓްރީގެ ޑެޕިއުޓީ މިނިސްޓަރުކަން ކުރައްވައިފައެވެ.
ފެނަކައިގެ ޑެޕިއުޓީ މެނޭޖިން ޑިރެކްޓަރަކަށް އައްޔަން ކުރި އާދަމް ތައުފީގް އަކީ މިދިޔަ މަޖިލިސް އިންތިޚާބުގައި ކުރެންދޫ ދާއިރާއަށް ޕީޕީއެމް/ޕީއެންސީ ޓިކެޓްގައި ވާދަވެސް ކުރައްވައި އެ އިންތިޚާބުގައި ނާކާމިޔާބީއާއި ކުރިމަތިވެ ވަޑައިގެންނެވި ބޭފުޅެކެވެ.
ފެނަކަ ޑީއެމްޑީގެ މަގާމުގައި މިހާރު ވެސް ބޭފުޅަކު ހުންނަވައެވެ. އެއީ، މުޙައްމަދު އާރިފެވެ.
ކޮރަޕްޝަންގެ އެތައް އަމަލެއް ހިންގާފައިވާ ކަމަށް ތުހުމަތުކުރެވޭ ފެނަކަ ކޯޕަރޭޝަން އޮތީ މާލީ ގޮތުން ވަރަށް ހާލުގައެވެ. އެ ކުންފުނީގެ މުވައްޒަފުންގެ އަދަދު ވަރަށް އިތުރެވެ. ފެނަކައިގެ ދަރަނި ވަނީ ހަތަރު ބިލިއަން ރުފިޔާއަށް ވުރެ އިތުރުވެފަ އެވެ.
