ސްޕެނިޝް ލީގުގައި ގެޓާފޭއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ބާސެލޯނާ މޮޅުވެއްޖެ އެވެ.

އާދީއްތަ ދުވަހުގެ ރޭ ދަންވަރު ކުޅުނު މެޗު ބާސެލޯނާ އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ބާސެލޯނާ އިން ދެ ލަނޑު ޖެހިއިރު، އަނެއް ލަނޑު އެ ޓީމުން ޖެހީ ފަހު ހާފުގަ އެވެ.

މެޗު ފަށައިގެން 15 ވަނަ މިނެޓުގައި ބާސެލޯނާ އަށް ލީޑު ނަގައިދިނީ ފެރާން ޓޮރޭސް އެވެ. އެ ލަނޑު އޭނާ ޖެހީ ޑެނީ އޮލްމޯ ތަނަވަސްކޮށްދިން ފުރުސަތެއްގަ އެވެ. އޭގެ ފަހުން ފުރަތަމަ ހާފު ނިމުމުގެ ކުރިން ޓޮރޭސް ވަނީ ދެ ވަނަ ލަނޑެއް ޖަހައި ބާސެލޯނާގެ ލީޑު ފުޅާ ކޮށްފަ އެވެ.

މެޗުގެ ދެ ވަނަ ހާފުގައި ބާސެލޯނާ އިން ވަނީ ތިން ވަނަ ލަނޑެއް ޖަހައިފަ އެވެ. އެގޮތުން މެޗުގެ 62 ވަނަ މިނެޓުގައި ބާސެލޯނާގެ ތިން ވަނަ ލަނޑު ޖެހީ އޮލްމޯ އެވެ. އެއީ މާކަސް ރަޝްފޯޑު ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗަށް ފަހު ވާހަކަ ދައްކަމުން ބާސެލޯނާގެ ކޯޗު ހަންސީ ފްލިކް ބުނެފައި ވަނީ، ބާސެލޯނާ އިން މުޅި މެޗުގައި ވެސް ކޮންޓްރޯލް ހޯދައިގެން ކުޅެފައިވާ ކަމަށެވެ. ޚާއްސަކޮށް އޭނާ ބޭނުންވި ފެންވަރުގެ ކުޅުމެއް ބާސެލޯނާގެ ކުޅުންތެރިން ދައްކާފައިވާ ކަމަށް ފްލިކް ބުންޏެވެ.

ގެޓާފޭއާ ދެކޮޅަށް ތިން ލަނޑު ޖަހައި، ގެޓާފޭ އަތުން މުހިންމު ތިން ޕޮއިންޓު ހޯދާފައިވާކަން ފާހަގަކޮށް ފްލިކް ބުނީ، އެއީ ކުރަން ފަސޭހަ ކަމެއް ނޫން ކަމަށެވެ. ފްލިކް ބުނީ ކޮންމެ ތިން ދުވަހަކުން މެޗެއް ކުޅެން ބާސެލޯނާ އަށް ޖެހޭ ކަމަށާއި، މި ފެންވަރުގެ ކުޅުމެއް ދެއްކުމަކީ ވަރަށް ރަނގަޅު ނިޝާނަކަށް ވެފައިވާ ކަމަށެވެ.

މޮޅާއެކު ބާސެލޯނާ އިން ދެ ވަނައިގައި އޮތީ މިހާތަނަށް ކުޅެފައިވާ ފަސް މެޗުން 13 ޕޮއިންޓާ އެކު އެވެ. ހަތަރު މެޗުން ބާސެލޯނާ މޮޅުވެފައިވާއިރު، އެއް މެޗުން ވަނީ ބަލިވެފަ އެވެ. ލީގުގައި ދެން ބާސެލޯނާ އަށް އޮންނާނީ ރެއާލް އޮވިއެޑޯއާ ދެކޮޅަށް ކުޅޭ މެޗެވެ.