މީޑިއާ ވިލެޖް ހިމެނޭ ''ހޮޓެލް އިމާރާތު''ގެ މަސައްކަތް 'ވާރލްޑް އޮފް ބިޒްނަސް"އާ ހަވާލުކުރީ އާއްމުކޮށް އިއުލާން ކުރުމެއް ނެތި
ޕްރޮޖެކްޓް ފަންޑު ކުރަނީ ވާރލްޑް އޮފް ބިޒްނަސްއިން، ޕްރޮޖެކްޓް އެވޯޑް ކުރީ ވާރލްޑް އޮފް ބިޒްނަސްއިން
ހުޅުމާލޭގައި ތަރައްގީ ކުރާ ސިޓީ ހޮޓާ
މީޑިއާ ވިލެޖާއި، ޔޫތު ސެންޓަރު އަދި މެޑިކަލް ކޮލެޖް ތަރައްގީކުރުމަށް ހަމަޖެހިފައިވާ ސިޓީ ހޮޓަލުގެ މަސައްކަތް ނިންމާ އަދި އެތަން ހިންގުމަށް "ވާރލްޑް އޮފް ބިޒްނަސް ޕްރައިވެޓް ލިމިޓެޑް'' އާ ހަވާލުކޮށްފައިވަނީ އާއްމުކޮށް އިއުލާން ކުރުމެއް ނެތިކަން ހާމަވެއްޖެއެވެ.
މިކަން ހާމަވީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ރާއްޖެޓީވީން ހުށަހެޅި އާރްޓީއައިއާ ގުޅިގެންނެވެ.
އެ އާރުޓީއައި ރާއްޖެޓީވީން ވަނީ، ހައުސިންގ ޑިވެލޮޕްމަންޓް ކޯޕްރޭޝަން (އެޗްޑީސީ) އާއި ވޯލްޑް އޮފް ބިޒްނަސް ޕްރައިވެޓް ލިމިޓެޑް އާއި ދެމެދު 21 އޯގަސްޓް 2025 ގައި މަޝްރޫއުތަކެއް ތަރައްގީ ކުރުމަށް އެއްބަސްވުމެއްގައި ސޮއިކޮށްފައިވާކަން ފާހަގަކޮށްފައެވެ. މި މަޝްރޫއުތަކުގެ ތެރޭގައި މީޑިއާ ވިލެޖް، ގައުމިއްޔަތު އިންސްޓިޓިއުޓް، އެމްއެންޔޫ މެޑިކަލް ކޮލެޖް އަދި 5 ސްޓަރ ލަގްޒަރީ ހޮޓެލެއް ހިމެނޭ ކަމަށެވެ. އަދި ޕްރޮޖެކްޓްތަކުގެ އަގު ވަކިވަކިން ފަންޑު ކުރަނީ ކޮން ފަރާތަކުންތޯއާއި، އަދި ކޮންޓްރެކްޓަރު ހޮވީ ކޮން އުސޫލަކުންތޯ ސުވާލުކޮށްފައިވެއެވެ.
މި ސުވާލުތަކާއި ގުޅިގެން އެޗްޑީސީން ފޮނުވާފައިވާ ޖަވާބުގައި ބުނީ، ޕްރޮޖެކްޓް ފަންޑު ކުރަނީ ވާރލްޑް އޮފް ބިޒްނަސް އިން ކަމަށާއި، ޕްރޮޖެކްޓް އެވޯޑް ކުރީ ވާރލްޑް އޮފް ބިޒްނަސްއިން ކަމަށެވެ. އަދި އެޗްޑީސީއަށް ހުށަހެޅި ޕްރޮޕޯސަލްއާއި ލިޔެކިއުންތައް ދިރާސާކުރުމަށްފަހު އެފަރާތުގެ ޕްރޮޕޯސަލްގައި ހިމަނާފައިވާ ކަންކަމަކީ ސަރުކާރާއި އެކޯޕްރޭޝަންގެ ލަނޑުދަނޑިތަކާއި ދިމާވާ ކަންކަމަށްވާތީ ކަމަށް އެޗްޑީސީން ބުނެފައިވެއެވެ.
ސަރުކާރުގެ ބޭނުމަށް ހާއްސަކުރެވޭ އޮފީސް ބައެއް ހިމެނޭގޮތަށް ތަރައްގީކުރާ އެ ހޮޓެލްގެ މަސައްކަތް، އެތަން ހިންގުމަށް ޚާއްސަކޮށް އުފައްދާފައިވާ ކުންފުންޏެއް ކަމުގައިވާ ވާރލްޑް އޮފް ބިޒްނަސްއާ ހަވާލުކޮށް 'މެންހަޓަން ގްރޭންޑ ހޮޓެލް' ގެ ނަމުގައި އެތަން ހިންގުމަށް ހަމަޖެހިފައިވަނީ %50 ފޮރިން އިންވެސްޓްމަންޓާއެކުއެވެ. މި މަޝްރޫއަށް އިންވެސްޓްކުރުމަށް ހަމަޖެހިފައިވަނީ ޔޫއޭއީގެ ކުންފުންޏެއް ކަމުގައިވާ 'ޑީޕް ސީފުޑް ކޮމްޕެނީ' އިންނެވެ.
ހުޅުމާލޭގައި މި ތަރައްގީކުރެވޭ މި ހޮޓަލުގައި ސަރުކާރުގެ ބޭނުމަށް ހާއްސަކުރެވޭ އޭރިއާ (3.5 ފްލޯރ ސްޕޭސް) ގައި ސަރުކާރުގެ މުހިއްމު ވައުދުތަކުގެ ތެރޭގައި ހިމެނޭ މީޑިއާ ވިލެޖް އަދި ގައުމިއްޔަތު އިންސްޓިޓިއުޓްގެ އިތުރުން އެމްއެންޔޫ މެޑިކަލް ކޮލެޖް ތަރައްގީ ކުރާނެ އެވެ. މިތަންތަން ނިންމުމަށް ހަމަޖެހިފައިވަނީ މަސައްކަތް ފަށާތާ 06 މަސް ދުވަހުގެ ތެރޭގައެވެ.
އަދި ހޮޓެލްގެ ބާކީ އޭރިއާގައި ފަސް ތަރި ސްޓޭންޑާރޑްގެ 158 ކޮޓަރި ތަރައްގީކޮށް، މަސައްކަތް ފަށާތާ 12 މަސް ދުވަހުގެ ތެރޭގައި އޮޕަރޭޝަނަށް ގެނައުމަށް ވަނީ ހަމަޖެހިފަ އެވެ. މިއީ، ރާއްޖެ ޒިޔާރާތްކުރާ ފަތުރުވެރިންނަށް ޓްރާންސިޓް ކުރެވޭނެ ރަނގަޅު ހޮޓަލެއް ހުޅުމާލޭގައި ތަރައްގީކުރުމަށް ރައީސް ޑރ. މުހައްމަދު މުއިއްޒު ވެލައްވާފައިވާ ވައުދުފުޅާ އެއްގޮތަށް، އެންމެ ޒަމާނީ ވަސީލަތްތަކާއެކު ފެންވަރު ރަނގަޅު ހިދުމަތް ދެވޭ ގޮތަށް ތަރައްގީކުރާ އިމާރާތެކެވެ.
