އިނގިރޭސިވިލާތް، ކެނެޑާ އަދި އޮސްޓްރޭލިއާ އިން ފަލަސްތީނު ދައުލަތެއްގެ ގޮތުގައި ބަލައިގަނެފި އެވެ.

މި ގައުމުތަކުން ދެ-ދައުލަތުގެ ހައްލަކަށް އާ ބާރެއް ގެނައުމަށް ކުރަމުން ގެންދާ މަސައްކަތުގެ ތެރެއިން ފަލަސްޠީނު ދައުލަތެއްގެ ގޮތުގައި ރަސްމީކޮށް ބަލައިގަތްކަން އިއުލާނު ކުރީ އާދިއްތަ ދުވަހު އެކުގައި ނެރުނު ބަޔާނެއްގައެވެ.

"މެދުއިރުމަތީގައި އިތުރުވަމުންދާ ބިރުވެރިކަމާ ކުރިމަތިލާއިރު، އަމާންކަމާއި ދެ ދައުލަތުގެ ހައްލެއްގެ އުއްމީދު ދިރުވުމަށް އަޅުގަނޑުމެން މަސައްކަތް ކުރަމުން މިދަނީ. އެއީ ރައްކާތެރި އަދި ސަލާމަތްތެރި އިސްރާއީލަކާއި އެކު ދެމެހެއްޓެނިވި ފަލަސްޠީނު ދައުލަތެއް އޮތުން. މިވަގުތު، މިއިން އެއްވެސް ކަމެއް އަޅުގަނޑުމެންނަކަށް ނެތް. އިސްރާއީލާއި ފަލަސްޠީނުގެ އާންމު ރައްޔިތުން ޙައްޤު ވެގެން ވަނީ އަމާން ކަމާއެކު ދިރިއުޅުމަށް،" އިނގިރޭސި ބޮޑު ވަޒީރު ކީރ ސްޓާރމާ ފަލަސްތީނު ދައުލަތް ބަލައިގަތުން އިއުލާނު ކުރައްވަމުން ވިދާޅުވިއެވެ.

މި ހައްލަކީ ހަމާސް އަށް ދެވޭ އިނާމެއް ނޫން ކަމަށާއި އެއީ ހަމާސް އަށް މުސްތަޤުބަލެއް ނެތް ކަމަށާއި، ކުރިމަގުގައި އުފެދޭ ސަރުކާރުގައި އެއްވެސް ދައުރެއް ނޯންނާނެ ކަމަށާއި، އަދި ސަލާމަތީ ކަންކަމުގައި އެއްވެސް ހަމާސް އަށް ދައުރެއް ނެތި އޮންނާނެ އަތީ ކަމަށް ވެސް އިނގިރޭސި ބޮޑުވަޒީރު ވިދާޅުވިއެވެ.

އޭގެ އިތުރުން ބޮޑު ވަޒީރު ވިދާޅުވީ، ޣައްޒާ އަށް ކުރިމަތި ކޮށްފައިވާ އިންސާނީ ހާލަތު އިތުރަށް ގޯސްވަމުންދާ ކަމަށާއި، އިސްރާއީލު ސަރުކާރުން ޣައްޒާ އަށް ދެމުން ގެންދާ އަދި އިތުރު ކުރަމުން ގެންދާ ބޮމުގެ ހަމަލާ ތަކާއި، ބަނޑަށްޖެއްސުމާއި، ޣާއްޒާ ފަނާ ކުރުމަކީ އެއްގޮތަކަށް ވެސް ބަލައިގަނެވޭނެ ކަމެއް ނޫނ ކަމަށް ވެސް ވިދާޅުވިއެވެ.

ހަމާސްގެ ޢަމަލުތަކާއި، އިސްރާއީލު ސަރުކާރުން ހަނގުރާމަ ފުޅާކުރަމުންދިއުމާއި، އަދި ވެސްޓް ބޭންކުގައި ޔަހޫދީ އާބާދީތައް ވަޒަންވެރި ކުރުން ހަލުއި ކުރަމުން ގެންދާއިރު، ދެ ދައުލަތުގެ ހައްލުގެ އުއްމީދު ކުޑަވަމުންދާ ކަމަށާއި ނަމަވެސް އެ އަލިކަން ނިވިގެން ދާކަށް ފުރުސަތު ނުދެވޭނެ ކަމަށް ވެސް ބޮޑު ވަޒީރު ސްޓާރމާ ވިދާޅުވިއެވެ.

އެމެރިކާ އާއި އިސްރާއީލުގެ ގާތް މިތުރުންގެ ގޮތުގައި ބަލަމުން އަންނަ ގައުމުތަކުން ފަލަސްތީނު ދައުލަތެއްގެ ގޮތުގައި ބަލައިގަންނަމުން އަންނަ އިރު، އެ ދެ ގައުމުން ގެންދަނީ މި ކަމާ ރުޅިވެރިކަމާއެކު ނުރުހުންފާޅު ކުރަމުންނެވެ.

އެއާ އެކު ޣައްޒާ ސިޓީ އަށް އެއްގަމު މަގުންނާއި ވައިގެ މަގުން އިސްރާއީލުން ގެންދަނީ ހަމަލާތައް ދެމުންނެވެ.

އާދިއްތަ ދުވަހުގެ ފަތިހުއްސުރެ އިސްރާއީލުގެ ހަމަލާތަކުގައި މަދުވެގެން 55 ފަލަސްޠީނު ރައްޔިތުން ޝަހީދުވެފައިވާއިރު، އޭގެ ތެރެއިން 37 މީހުން ޝަހީދުވެފައިވަނީ ޣައްޒާ ސިޓީގައެވެ.

ދެކުނު ޣައްޒާގެ ޚާން ޔޫނިސްގައި "ހައިހޫނު ކަމާއި ބޭސް ފަރުވާ ނުލިބުމުގެ ސަބަބުން" 3 އަހަރުގެ ކުޑަކުއްޖަކު ވަނީ ނިޔާވެފައެވެ.

ޣައްޒާ ސިޓީ ގައި ދިރިއުޅޭ އެންމެ އެ ސިޓީ ދޫކޮށް ދިއުމަށް އިސްރާއީލުން ވަނީ އަމުރުކޮށްފައެވެ.

އޮކްޓޯބަރު 2023 އިން ފެށިގެން އިސްރާއީލުގެ ހަނގުރާމައިގައި މަދުވެގެން 65،283 މީހުން ޝަހީދުވެ، 166،575 މީހުންނަށް ޒަޚަމްވެފައިވެއެވެ. އަދި އެތައް ހާސް މީހުން ވަޅުލެވިފައިވާ ކަމަށް ޤަބޫލު ކުރެވެއެވެ.