ފޯމިއުލާ ވަން: އިޓާލިއަން ޖީޕީ ހެމިލްޓަން ކާމިޔާބު ކޮށްފި

ފޯމިއުލާ ވަންގެ އިޓާލިއަން ގްރޭންޑް ޕްރީ އިނގިރޭސިވިލާތުގެ ލުއިސް ހެމިލްޓަން ކާމިޔާބު ކޮށްފިއެވެ.

އިޓަލީގެ މޮންޒާގައި އޮންނަ "އޮޓޯޑްރޯމް ނަޒިއޮނާލެ މޮންޒާ" ރޭސިން ސާކިޓުގައި ކުރިޔަށް ދިޔަ މި ރޭސް ހެމިލްޓަން ކާމިޔާބުކުރީ ޖަރުމަނުގެ ސެބެސްޓިއަން ވެޓެލްއާ ފިންލޭންޑުގެ ވަލްޓޭރީ ބޯޓާސް ފަހަތަށް ޖައްސާލުމަށްފަހުއެވެ.

ހެމިލްޓަން ރޭސް ނިންމާފައިވަނީ އެއް ގަޑިއިރާ 15 މިނުޓުންނެވެ. އޭނާގެ ފަހަތުން ދެވަނައަށް ނިންމި އޭނާގޭ ޓީމުގެ ދެވަނަ ޑްރައިވަރު، ވަލްޓޭރީ ބޯޓާސްއަށް ރޭސް ނިންމާލެވިފައިވަނީ ހެމިލްޓަންއަށް ވުރެ ހަތަރު ސިކުންތު ފަހަތުންނެވެ. އަދި ތިންވަނައަށް ރޭސް ނިންމި ފެރާރީގެ ސެބެސްޓިއަން ވެޓެލްއަށް ރޭސް ނިންމުނީ ހެމިލްޓަންއަށްވުރެ 36 ސިކުންތު ލަހުންނެވެ.

ހެމިލްޓަން ވަނީ ރޭހުގެ ކުރިން ބޭއްވުނު ކޮލިފައިން ރައުންޑުގައި ފޯމިއުލާ ވަންގެ އެންމެ ކާމިޔާބު ޑްރައިވަރު ކަމަށްވާ ޖަރުމަނުގެ މައިކަލް ޝޫމޭކާގެ ރިކޯޑެއް މުގުރާލާފައެވެ. އެގޮތުން އޭނާވަނީ ފޯމިއުލާ ވަންގައި އެންމެ ގިނަ "ޕޯލް ޕޮސިޝަން" ހޯދި ޑްރައިވަރުގެ މަގާމް ހޯދާފައެވެ. އޭނާ ޝޫމޭކާގެ ރިކޯޑު މުގުރާލީ 69 "ޕޯލް ޕޮސިޝަން" އާއެކުއެވެ.

ރޭސް ކާމިޔާބު ކުރުމަށްފަހު ނޫސްވެރިންނާ ވާހަކަ ދައްކަމުން ހެމިލްޓަންވަނީ އޭނާގެ ޓީމަށް ތައުރީފުކޮށް ފެރާރީއާ ދެމެދު އޮންނަ ވާދެވެރި ކަމުގެ މުހިންމުކަން ފާހަގަކޮށްފައެވެ. އެގޮތުން އޭނާ ބުނެފައިވަނީ ފެރާރީއާ ދެމެދު އޮންނަ ވާދެވެރި ކަމަކީ ރޭސްތަކުން މޮޅުވުމަށް ލިބޭ ހިތްވަރެއް ކަމަށް ބުނެފައެވެ. މިއީ މި ސީޒަނުގައި އޭނާ ކާމިޔާބުކުރި ހަވަނަ ރޭހެވެ.

މި މޮޅާއެކު އޭނާވަނީ ޑްރައިވަރުންގެ ރޭންކިންގައި ވެޓެލް ފަހަތަށް ޖައްސާލުމަށްފަހު އެއްވަނައަށް ޖެހިލާފައެވެ. އެގޮތުން އެއްވަނައިގައި ހެމިލްޓަންއޮތީ 238 ޕޮއިންޓާއެކެއެވެ. އޭގެ ތިން ޕޮއިންޓް ފަހަތުން ދެވަނައިގައި އޮތީ ވެޓެލްއެވެ. އަދި 197 ޕޮއިންޓާއެކު ތިންވަނައިގައި އޮތީ މާސިޑީސްގެ ބޯޓާސްއެވެ.

ޓީމުތަކުގެ ރޭންކިންގެ އެއްވަނައިގައި 435 ޕޮއިންޓާއެކު މާސިޑީސް އޮތްއިރު 373 ޕޮއިންޓާއެކު ދެވަނައިގައި އޮތީ ފެރާރީއެވެ. ފޯމިއުލާ ވަންގެ ރޭހެއް ދެން އޮންނާނީ މި މަހުގެ 17 ވަނަ ދުވަހު ސިންގަޕޫރުގައެވެ.