ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ހޮނިހިރު ދުވަހުގެ ހަވީރު ފ.ފީއައްޔަށް ވަޑައިގަންނަވާއިރު، ފަހު ވަގުތު ދަތުރުގެ ޕްރޮގްރާމް ބަދަލުކޮށް، ފީއަލީ ކައުންސިލާ ބައްދަލު ނުކުރަން ނިންމަވައިފި އެވެ.

މިހާރު އަތޮޅު ތެރޭގެ ރަށްތަކަށް ކުރައްވާ ދަތުރުފުގައި އެމަނިކުފާނު ފީއައްޔަށް ވަޑައިގަންނަވަން އޮތީ ހޮނިހިރު ދުވަހުގެ ހަވީރު އެވެ. މިއީ ވެރިކަމަށް ވަޑައިގެންނެވި ފަހުން ރައީސް މުޢިއްޒު ފީއައްޔަށް ވަޑައިގަންނަވާ ދެ ވަނަ ފަހަރެވެ.

އެ ދަތުރުފުޅާ ގުޅިގެން ރައީސުލްޖުމްހޫރިއްޔާގެ އޮފީހުން އެންމެ ފުރަތަމަ ފީއަލީ ކައުންސިލް އަށް ފޮނުވި ޕްރޮގްރާމްގައި ކައުންސިލާ ބައްދަލު ކުރަން އޮތީ ހަމަޖެހިފަ އެވެ. "ސިއްރު" ޖަހާފައިވާ އެ އެޖެންޑާގައި ވަނީ، ފީއަލީ ކައުންސިލާއި، އަންހެނުންގެ ތަރައްޤީ އަށް މަސައްކަތް ކުރާ ކޮމެޓީ އާއި، ރަށުގެ މުއައްސަސާ ތަކުގެ އިސްވެރިންނާ ބައްދަލު ކުރާ ގޮތަށެވެ. އެ ބައްދަލުވުން އޮތީ ފީއަލީ ކައުންސިލް އިދާރާގަ އެވެ.

އޭގެ ފަހުން ދެ ވަނަ ފަހަރަށް ޕްރޮގްރާމް ބަދަލު ކުރުމަށް ފަހު ކައުންސިލްއާ ހިއްސާ ކުރިއިރު ވެސް އެ ބައްދަލުވުން އޮތީ ހިމަނައިފަ އެވެ. ނަަމަވެސް، ތިން ވަނަ ފަަހަރަށް ޕްރޮގްރާމް ބަދަލު ކުރުމަށް ފަހު ކައުންސިލްއާ ހިއްސާ ކޮށްފައި ވަނީ ހޮނިހިރު ދުވަހުގެ 10:30 ހާއިރު އެވެ.

ތިން ވަނަ ފަހަރަށް ޕްރޮގްރާމް ފޮނުވިއިރު، އެ ޕްރޮގްރާމްގައި ކައުންސިލްއާ ބައްދަލު ކުރާ ގޮތަކަށް ނެތެވެ. އޭގެ ބަދަލުގައި އޮތީ ފީއަލީގެ މުއައްސަސާތަކުގެ އިސްވެރިންނާ ބައްދަލު ކުރެއްވުމަށެވެ. އެ ބައްދަލުން އޮތީ ވެސް، ފީއަލީގައި ހުންނަ ފ.އަތޮޅު މަދަރުސާ އަށް ބަދަލު ކޮށްފަ އެވެ.

އެކަމާ ގުޅިގެން ފީއަލީ ކައުންސިލްގެ ނައިބު ރައީސް މުޙައްމަދު ޖަލީލް ވިދާޅުވީ، ކައުންސިލްގެ ބައްދަލުވުން އުނި ކުރުމަށް ފަހު ޕްރޮގްރާމް ހިއްސާ ކުރުމުން، ރައީސްގެ ދަތުރުފުޅުގެ އެޑްވާންސް ޓީމުގެ އިސް ބޭފުޅާއާ ގުޅުއްވި ކަމަށެވެ. އަދި ކައުންސިލްގެ ބައްދަލުވުން ނެތީ ކީއްވެތޯ އާއި، މުއައްސަސާތަކުގެ އިސްވެރިންގެ ބައްދަލުވުމުގައި ކައުންސިލް އަށް ބައިވެރިވެވޭނެތޯ ސުވާލު ކުރި ކަމަށް ޖަލީލް ވިދާޅުވި އެވެ.

އެއާއެކު އެޑްވާންސް ޓީމުގެ އިސް ބޭފުޅާ ވިދާޅުވީ، މުއައްސަަސާތަކުގެ ބައްދަލުވުމުގައި ކައުންސިލް އަށް ބައިވެރި ނުވެވޭނެކަން ކަމަށް ޖަލީލް ވިދާޅުވި އެވެ. އަދި އެއީ "މަތިން" އައި އޯޑަރެއްގެ ސަބަބުބް ގެނެސްފައިވާ ބަދަލެއް ކަމަށް އެ ބޭފުޅާ ވިދާޅުވެފައިވާ ކަމަށް ޖަލީލް ވިދާޅުވި އެވެ.

ރައީސް އޮފީހުން ފީއަލީ ކައުންސިލް އަށް ފޮނުވާފައިވާ ޕްރޮގްރާމް ވަނީ މި ނޫހަށް ލިބިފަ އެވެ. ފުރަތަމަ ދެ ޕްރޮގްރާމްގައި ވެސް ޕީއަލީ ކައުންސިލްއާ ބައްދަލު ކުރަން އޮތް ނަމަވެސް، ތިން ވަނަ ޕްރޮގްރާމް އިން ވަނީ ކައުންސިލްގެ ބައްދަލުވުން އުނި ކޮށްފަ އެވެ.

މީގެ އިތުރުން އެ ދަތުރުފުޅުގައި ރައީސް މުޢިއްޒު ފީއަލީ ރައްޔިތުންނާ ބައްދަލު ކުރާއިރު، އެ ބައްދަލުވުމުގައި ވާހަކަ ދެއްކުމުގެ ފުރުސަތު ވެސް ކައުންސިލަށް ނުދެ އެވެ. ޖަލީލް ވިދާޅުވީ، މިހާތަނަށް ކައުންސިލް އަށް އެ ފަދަ ފުރުސަތެއް އޮތް ކަމަަށް އަންގާފައި ނުވާ ކަމަށެވެ.

އާންމު ގޮތެއްގައި ރައީސް ރަށް ރަށަށް ވަޑައިގަންނަވާއިރު، ރަށް ތަކުގެ ކައުންސިލް އަދި އަންހެނުންގެ ތަރައްޤީ އަށް މަސައްކަތް ކުރާ ކޮމެޓީއާ ބައްދަލު ކުރައްވަ އެވެ. އަދި ރައްޔިތުންގެ ބައްދަލުވުމުގައި ވާހަކަ ދެއްކުމުގެ ފުރުސަތު ވެސް ކައުންސިލް އަށް ދެ އެވެ.