ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު، ފ.ފީއަލީގައި ބިންގާ އަޅުއްވައި ދެއްވި ޕޮލިސް ސްޓޭޝަންގެ މަސައްކަތް ހުއްޓިފައި އޮންނަތާ އެތައް ދުވަހެއް ވެއްޖެ އެވެ.

ފީއަލީ ކައުންސިލްގެ ރައީސް މޫސާ އަޙުމަދު ވިދާޅުވީ މިއަހަރުގެ ސެޕްޓެމްބަރު މަހުގެ 20 ވަނަ ދުވަހު ރައީސް މުޢިއްޒު ފީއައްޔަށް ވަޑައިގެން، ޕޮލިސް ސްޓޭޝަން އިމާރާތުގެ ބިންގާ އަޅުއްވައި ދެއްވާފައިވާ ކަމަށެވެ. އެ މަސައްކަތް ފަށައިގެން އިމާރާތުގެ ތަނބުތައް ޖެހި ފަހުން، މިހާރު މަސައްކަތް ހުއްޓިފައިވާ ކަމަށް ކައުންސިލްގެ ރައީސް ފާހަގަ ކުރެއްވި އެވެ.

ކައުންސިލްގެ ރައީސް މޫސަ ވިދާޅުވީ، ފީއައްޔަށް ރައީސް މުޢިއްޒު ވަޑައިގަންނަވާ ދަތުރުފުޅާ ދިމާކޮށް މަސައްކަތް ކުރަން ބޭނުންވާ ސާމާނު ކޮންމެ ވެސް މިންވަރަކަށް ގެނެސްފައިވާ ކަމަށެވެ. އެގޮތުން ސިމެންތި، ހިލަ އަދި ވެލި ގެނެސްގެން މަސައްކަތް ފެށި ނަމަވެސް، ވަކި ހިސާބަކުން ތަކެތި ހުސްވެފައިވާ ކަމަށް މޫސަ ވިދާޅުވި އެވެ.

ތަކެތި ހުސްވި ފަހުން، ކުރީ ސަރުކާރުން ފީއަލީގައި ފަށާފައިވާ ސައިންސް ލެބު އިމާރާތް ކުރުމަށް އޭރު ގެެނެސްފައިވާ ތަކެތި ކޮންމެ ވެސް ވަރަކަށް ބޭނުން ކޮށްގެން، މިހާރު ހުރި ވަރަށް މަސައްކަތް ކޮށްފައިވާ ކަމަށް މޫސަ ވިދާޅުވި އެވެ. ހަމަ އެހެންމެ، އަތޮޅު ތެރޭގެ ބައެއްގެ ރަށް ރަށުން ތަކެތި ގެނައިކަން ފާހަގަ ކުރައްވައި މޫސަ ވިދާޅުވީ، ތަކެތި ނެތުމުގެ ސަބަބުން މަސައްކަތް މިހާރު ހުއްޓިފައިވާ ކަމަށެވެ.

މީގެ އިތުރުން މޫސަ ވިދާޅުވީ، "މުޢިއްޒު ސްޕީޑުގައި" ކުރިއަށް ދާނެ ކަމަށް ބެލެެވުނު މަޝްރޫއަކީ ޕޮލިސް ސްޓޭޝަންގެ މަސައްކަތް ކަމަށެވެ. އެގޮތުން އެ މަސައްކަތް ކުރުމަށް ބޭނުންވާ މުވައްޒަފުން ވެސް ފެނަކަ އަށް ނެގި ކަަމަށާއި، އެއާއެކު ވަރަށް ބާރު ދުވެލީގައި މަސައްކަތް ފެށި ނަމަވެސް، މިހާރު އޮތީ ހުއްޓިފަ އެވެ. އެ މަސައްކަތާ މެދު ދެން ކަންތައް ވާނެ ގޮތާ މެދު ސުވާލު އުފެދިފައިވާ ކަމަށް ކައުންސިލްގެ ރައީސް ފާހަގަ ކުރެއްވި އެވެ.