ފީއަލީ ޞިއްޙީ މަރުކަޒު, ވެރިކަން ބަދަލުވީ ފަހުން މަސައްކަތް ހުއްޓުނު ގޮތަށް އަދިވެސް ހުއްޓިފައި

ކުރީގެ ރައީސް އިބްރާހީމް މުޙައްމަދު ޞާލިޙު ގެ ސަރުކާރުން ފ.ފީއަލީ ގައި ތަރައްޤީ ކުރަން ފެށި ޞިއްޙީ މަރުކަޒު ގެ އައު އިމާރާތުގެ މަސައްކަތް، ވެރިކަން ބަދަލުވި ފަހުން ހުއްޓުނު ގޮތަށް އަދި ވެސް މަސައްކަތް ހުއްޓިފައިވާ ކަމަށް ފީއަލީ ކައުންސިލްގެ ނައިބު ރައީސް މުޙައްމަދު ޖަލީލް ވިދާޅުވެއްޖެ އެވެ.

ރާއްޖެޓީވީ އަށް މައުލޫމާތު ދެއްވަމުން ޖަލީލް ވިދާޅުވެފައި ވަނީ، ރައީސް ޞާލިޙު ގެ ވެރިކަމުގެ ފަހު އަހަރު ގައި ވަރަށް ބުރަ މަސައްކަތް ކޮށްގެން، ދެ ފަންގިފިލާގެ އިމާރާތެއްގެ ގޮތުގައި ޞިއްޙީ މަރުކަޒު ގެ އައު އިމާރާތުގެ މަސައްކަތް ފަށާފައިވާ ކަމަށެވެ.

އެގޮތުން ޖަލީލް ވިދާޅުވީ ޞިއްހީ މަރުކަޒު ގެ އައު އިމާރާތް އަޅަން ބޭނުންވާ ސަރަހައްދު ގެ ބިން ސާފު ކުރުމަށް ފަހު، ކޮންކްރީޓުގެ މަސައްކަތް ވެސް ކުރިއަށް ގެންދިޔަ ކަމަށެވެ. މަސައްކަތް ކުރިއަށް ދަމުން ގޮސް، މަތީ ޝީޓް އެޅުމާ ހަމައަށް މަސައްކަތް އޭރު ގޮސްފައިވާ ކަމަށް ޖަލީލް ފާހަގަ ކުރެއްވި އެވެ.

ނަމަވެސް، 2023 ވަނަ އަހަރުގެ ތެރޭގައި ސަރުކާރު ބަދަލުވި ފަހުން މަސައްކަތް ކުރަމުން އައި ކުންފުންޏަށް ދޭން ޖެހޭ ފައިސާ ސަރުކާރުން ހަމަޖައްސައި ދީފައި ނުވާއިރު، މަސައްކަތަށް ބުރޫ އަރަމުން އައި ކަމަށް ޖަލީލް ވިދާޅުވި އެވެ. އެގޮތުން ބޭނުންވާ ފައިސާ ހަމަ ޖައްސައި ދެވެން ނެތް ނަމަ، ޝީޓު އެޅުމަށް ބޭނުންވާ ސިމެންތި ހަމަޖައްސައި ދިނުމަށް ވެސް އެ ކުންފުނިން އެދުނުކަން ޖަލީލް ފާހަގަ ކުރެއްވި އެވެ.

އެހެން ނަމަވެސް، ކައުންސިލުން ކުރި މަސައްކަތުން ވެސް ސަރުކާރުން އެކަން ހަމަޖައްސައި ދީފައި ނުވާ ކަމަށް ޖަލީލް ވިދާޅުވި އެވެ. އޭގެ ފަހުން މަސައްކަތް ކުރިއަށް ނުގެންދެވި، މަސައްކަތު ސައިޓުގައި ހުރި ދަގަނޑުތަކާއި، ފިލާތައް ވެސް އެ ކުންފުނިން ރުޅާލާފައިވާ ކަމަށް ޖަލީލް ވަނީ ވިދާޅުވެފަ އެވެ.

މަސައްކަތް ހުއްޓާލި ފަހުން ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ފިއައްޔަށް ވަޑައިގެންނެވި ނަމަވެސް، ޞިއްޙީ މަރުކަޒު އައު އިމާރާތުގެ އެއްވެސް ވާހަކައެއް ދައްކަވާފައި ނުވާ ކަމަށް ޖަލީލް ވިދާޅުވި އެވެ. ނަމަވެސް، ރައީސްގެ ދަތުރުފުޅާ ދިމާކޮށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ މަސައްކަތް ހަވާލު ކޮށްފައިވާ ކަމަށް ޖަލީލް ވަނީ ފާހަގަ ކުރައްވައިފަ އެވެ.

ރައީސް މުޢިއްޒު ވަނީ މިއަހަރުގެ ސެޕްޓެމްބަރު މަހުގެ ތެރޭގައި ފީއައްޔަށް ވަޑައިގެންފަ އެވެ. އެ ދަތުރުފުޅާ ދިމާކޮށް ޞިއްޙީ މަރުކަޒުގެ މަސައްކަތް އެމްޓީސީސީއާ ހަވާލު ކުރި ނަމަވެސް، އޭގެ ފަހުން ޞިއްޙީ މަރުކަޒު އައު އިމާރާތުގެ އެއްވެސް މަސައްކަތެއް ކުރިއަށް ނުދެ އެވެ.