ފ.ފީއަލީ ގައި ހުންނަ ފ.އަތޮޅު މަދަރުސާ ގައި އިމާރާތް ކުރަން ފަށާފައިވާ ސައިންސް ލެބުމުގެ މަސައްކަތް ހުއްޓިފައިވާއިރު، އެ ތަނުގައި ކަރާ ހައްދަން ފަށައިފި އެވެ.

ފީއަލީ ކައުންސިލްގެ ރައީސް މޫސާ އަޙުމަދު، ރާއްޖެ ޓީވީއާ ވާހަކަ ދައްކަވަމުން ވިދާޅުވީ ސައިންސް ލެބުގެ މަސައްކަތް ފެށީ ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި ކަމަށެވެ. ނަމަވެސް، ރައީސް ޞާލިޙުގެ ވެރިކަން ބަދަލުވީ ފަހުން މިވީ ދެ އަހަރު ދުވަހުގެ ތެރޭގައި އެ ތަނުގައި މާ ބޮޑު މަސައްކަތެއް ނުކުރެވޭ ކަމަށް މޫސަ ވިދާޅުވި އެވެ.

އެގޮތުން ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ސަރުކާރަށް މިވީ ދެ އަހަރު ދުވަހުގެ ތެރޭގައި، އެ ތަނުގަައި ކުރެވުނު ހަމައެކަނި މަސައްކަތަކީ އުކުޅުވަހީކޮޅުގައި ގާކޮޅެއް ޖެހުން އެކަނި ކަމަށް ކައުންސިލްގެ ރައީސް ވަނީ ފާހަގަ ކުރައްވައިފަ އެވެ. ނަމަވެސް، އެ މަސައްކަތް ކުރެވުނު ގޮތަށް އިތުރު މަސައްކަތެއް ކޮށްފައި ނުވާ ކަމަށް ވެސް ފާހަގަ ކުރި އެވެ.

ފ.އަތޮޅު މަދަރުސާގެ ސައިންސް ލެބުގެ މަސައްކަތް މިހާރު ކުރިއަށް ގެންދަނީ ފެނަކަ ކޯޕަރޭޝަންއާ ހަވާލު ކޮށްގެންނެވެ. މަސައްކަތް ހުއްޓިފައި އޮންނަތާ އެތައް ދުވަހެއް ވެފައިވާއިރު، އެ ތަނުގައި ކަރާ ހެއްދުމުގެ މަސައްކަތް ކުރަމުން އަންނަނީ ފެނަކަ އިންނެވެ.