ކައުންސިލްގެ ރައީސް ވިދާޅުވީ، ކުރީ ސަރުކާރުން ހިއްކާފައި އޮތް ފަސް ގަނޑު، ވެރިކަން ބަދަލުވީ ފަހުން އެއްވެސް މަސައްކަތެއް ނުކުރެވި މިހާރު ގިރަމުން އަންނަ ކަމަށް
ފ. ފީއަލީ ގައި ހިއްކާފައިވާ ފަސްގަނޑު ފެންނަ ފޮޓޯ
ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން ފ. ފީއަލީގައި ހިއްކާފައި އޮތް 10 ހެކްޓަރުގެ ފަސް ގަނޑު، ރިވެޓްމަންޓް ޖަހާ ނުލެވި ގިރަމުން ދާތީ އެކަމުގެ ކަންބޮޑުވުން ފާޅު ކޮށްފި އެވެ.
ރާއްޖެ ޓީވީއާ ވާހަކަ ދައްކަވަމުން ފީއަލީ ކައުންސިލްގެ ރައީސް މޫސާ އަޙުމަދު ވިދާޅުވީ، ކުރީ ސަރުކާރުން ހިއްކާފައި އޮތް ފަސް ގަނޑު، ވެރިކަން ބަދަލުވީ ފަހުން އެއްވެސް މަސައްކަތެއް ނުކުރެވި މިހާރު ގިރަމުން އަންނަ ކަމަށެވެ. ކައުންސިލްގެ ރައީސް ވިދާޅުވީ، ފީއަލީގެ ބިން ހިއްކުމަކީ އެ ރަށު ރައްޔިތުންގެ އެންމެ ބޮޑު އެއް އުންމީދު ކަމަށެވެ.
އެހެން ނަމަވެސް، ރަށުގެ އެންމެހާ ރައްޔިތުން ލޯ ކުރިމަތީގައި މިއަދު އެ ފަސްގަނޑު ގިރަމުން ގިރަމުން ގޮސް، ބޮޑު ބައެއް ގިރާލާފައިވާ ކަމަށް މޫސަ ވަނީ ފާހަގަ ކުރައްވައިފަ އެވެ. މިހާރު ފަސް ގަނޑު އެ އޮތް ގޮތަށް ބާއްވައިފި ނަމަ، އޭގެ އިން ބޮޑު އިންސައްތައެއް ގިރާލައިގެން ދާނެ ކަމަށް އަންދާޒާ ކުރައްވާ ކަމަށް އޭނާ ވިދާޅުވި އެވެ.
ފަސް ގަނޑު ޙިމާޔަތް ކުރުމަށް ޖަހަން ޖެހޭ ރިވެޓްމަންޓާ ގުޅޭ ގޮތުން ވާހަކަ ދައްކަވަމުން އޭނާ ވިދާޅުވީ، އެ ރިވެޓްމަންޓް ޖެހޭނެ ދުވަހެއް އެއްވެސް ދިމާލަކުން އެނގެން ނެތް ކަމަށެވެ. ރިވެޓްމަންޓް ޖެހުމަށް ބޭނުންވާ ކޮންމެ ވެސް މިންވަރެއްގެ ހިލަ ކުރީ ސަރުކާރުން ގެނެސްފައިވާއިރު، މި ސަރުކާރުން ވެސް ހިލަ ޖެހުމަށް މަސައްކަތް ކުރި ކަމަށް މޫސަ ވިދާޅުވި އެވެ.
އެހެން ނަމަވެސް، ފީއަލީގެ ސިޔާސީ އިސްވެރިން ނިކުމެ އެކަން ހުއްޓުވާފައިވާ ކަމަށް އޭނާ ވަނީ ވިދާޅުވެފަ އެވެ. އެކަން ހުއްޓުވީ ހިއްކާ ސަރަހައްދު އިތުރަށް ބޮޑު ކުރުމަށް ކަމަށް ވިދާޅުވި ނަމަވެސް، އެކަން ކުރެވޭ މަންޒަރު ނުފެންނަ ކަމަށް މޫސަ ވިދާޅުވެފައިވެ އެވެ. ފީއައްޔަށް ބޭނުންވާ ހިލަ ގެންނަވާނެ ކަމަށް ދެ ފަހަރެއްގެ މަތިން ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވިދާޅުވި ނަމަވެސް، މި ދައުރުގެ ތެރޭގައި އެކަން ކުރެވޭނެ ކަމުގެ އެއްވެސް އުންމީދެއް ނެތް ކަމަށް ވެސް ކައުންސިލްގެ ރައީސް ވިދާޅުވި އެވެ.
