ފީއަލީގައި ކުރީ ސަރުކާރުން އަޅަން ފެށި ފެން ޕްލާންޓު، ވެރިކަން ބަދަލުވުމުން ބޯ ޖަންގައްޔަކަށް

ނިމުނު އެމްޑީޕީގެ ސަރުކާރުން ފ.ފީއަލީގައި އިމާރާތް ކުރަން ފަށާފައިވާ ފެން ޕްލާންޓުގެ މަސައްކަތް، ސަރުކާރު ބަދަލުވީ ފަހުން ހުއްޓި ބޯ ޖަންގައްޔަކަށް ބަދަލުވެއްޖެ އެވެ.

ރާއްޖެ ޓީވީއާ ވާހަކަ ދައްކަވަމުން ފީއަލީ ކައުންސިލްގެ މެމްބަރު އަޙުޒަމް ޢަބްދުﷲ ވިދާޅުވީ، އެ މަސައްކަތަކީ އެމްޑީޕީގެ ސަރުކާރުން ފީއަލީގައި ފެނުގެ ނިޒާމު ޤާއިމު ކުރުމަށް ފެށި މަޝްރޫއުގެ ދަށުން އިމާރާތް ކޮށްފައިވާ ތަނެއް ކަމަށެވެ. އަޙުޒަމް ވިދާޅުވީ އެމްޑީޕީ ސަރުކާރުގައި އެ މަޝްރޫއުގެ މަސައްކަތް ކުރިއަށް ގެންދަމުން އައި ނަމަވެސް، ވަކި ހިސާބަކުން މަސައްކަތް ހުއްޓިފައިވާ ކަމަށެވެ.

އޭގެ އިތުރުން އަޙުޒަމް ވިދާޅުވީ އެ މަޝްރޫއުގެ ގާތް ގަނޑަކަށް 80 އިންސައްތަ މަސައްކަތް ހުރީ ނިމިފައި ކަމަށެވެ. އެގޮތުން އެ މަޝްރޫއުގެ ބައެއް މަސައްކަތްތައް ކޮށްލައިގެން، ފީއަލީގައި ފެނުގެ ޚިދުމަތް ދޭން ފެށޭ ވަރު ވާނެ ކަމަށް ވެސް އޭނާ ވަނީ ފާހަގަ ކުރައްވައިފަ އެވެ. މަސައްކަތް ގޮސްފައިވާ ހިސާބު ފާހަގަ ކުރައްވަމުން އޭނާ ވިދާޅުވީ، ގޭގެ އަށް ކޮޅު ވެސް ވައްދާފައިވާ ކަމަށެވެ.

އެހެން ނަމަވެސް އޭނާ ވިދާޅުވީ އެމްޑީޕީ ސަރުކާރު ބަދަލުވީ ފަހުން އެ މަޝްރޫއުގެ މަސައްކަތް ހުއްޓިފައިވާއިރު، މަސައްކަތް ކުރަމުން އައި ކޮންޓްރެކްޓަރު އަތުން މަސައްކަތް އަތުލާފައިވާ ކަމަށެވެ. ނަމަވެސް އެ މަސައްކަތް ހަވާލު ކޮށްފައި ވަނީ ކޮން ބަޔަކާ ކަމެއް ވެސް ނޭނގޭ ކަމަށާއި، އެ ސަރަހައްދު ކައުންސިލް އިން ބެލެހެއްޓުމަށް ސަރުކާރުން އަންގާފައިވާ ކަމަށް އަޙުޒަމް ވިދާޅުވި އެވެ.

އިތުރަށް އަޙުޒަމް ވިދާޅުވެފައި ވަނީ އެ މަޝްރޫއުގެ މަސައްކަތް ހަވާލު ކޮށްފައިވާ ކުންފުނީގެ އަތުން މަސައްކަތް އަތުލާފައި ވަނީ އެއްބަސްވުމާ ޚިލާފަށް ކަމަށް ބުނެ، އެ މައްސަލަ ކުންފުނީގެ ފަރާތުން ކޯޓަށް ހުށަހަޅާފައިވާ ކަމަށެވެ.

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު މިއަހަރުގެ ސެޕްޓެމްބަރު މަހުގެ ތެރޭގައި އެ ރަަށަށް ވަޑައިގެންނެވިއިރު، އެ މަޝްރޫއުގެ ވާހަކަ ހިއްސާ ކުރި ނަަމަވެސް، ރައީސްގެ އެއްވެސް ޖަވާބެއް ނެތް ކަމަށް ކައުންސިލް އިން ވަނީ ފާހަގަ ކޮށްފަ އެވެ.