ނޫސްވެރިޔާ ލީވާން ފުލުހުންގެ ބަންދުން ދޫކޮށްލައިފި
ލީވާން ހައްޔަރު ކުރެވުނީ މިނިވަން މީޑިއާ ނައްތާލާ ބިލާ ދެކޮޅަށް މުޒާހަރާ ކުރަނިކޮށް
ހައްޔަރު ކުރެވުނު އަދަދުގެ ނޫސްވެރިޔާ ލީވާން އަލީ ނާސިރު
މިނިވަން މީޑިއާ ނެތިކޮށްލުމުގެ ބޭނުމުގައި ފާސްކުރި ބިލާ ދެކޮޅަށް މުޒާހަރާ ކުރަނިކޮށް ހައްޔަރުކުރެވުނު "އަދަދު" ނޫހުގެ ނޫސްވެރިޔާ ލީވާން އަލީ ނާސިރު ފުލުހުންގެ ބަންދުން ދޫކޮށްލައިފި އެވެ.
ލީވާން ދޫކޮށްލާފައިވަނީ، އޭނާ ހައްޔަރުކޮށް ބަހައްޓާފައި ހުރި ތަނެއް ނުބުނެ ގިނަ ވަގުތުތަކެއް ފާއިތުވުމަށްފަހުގައެވެ. އޭނާ ދޫކޮށްލުމަށް އެދި ނޫސްވެރިންނާއި އާންމު ރައްޔިތުންގެ އިތުރުން ގިނަ ޖަމިއްޔާތަކުން ވަނީ އަޑުއުފުލާފަ އެވެ.
ފުލުހުން މައުލޫމާތު ދެއްވި ގޮތުގައި، ލީވާން ހައްޔަރުކުރެވުނީ ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާ ހިލާފަށް މަޖިލިސް ކުރިމަތީގައި އެއްވެ، މުޒާހަރާ ކުރުމާއި ފުލުހުންނާ ކުރިމަތިލުމުގެ ތުހުމަތުގައެވެ. ނަމަވެސް، އޭނާ ހައްޔަރުކުރި ވަގުތު ފެތުރުނު ވީޑިއޯ ފުޓޭޖްގައި ފެންނަނީ ތިން ފުލުހަކު އޭނާގެ އަތުގައި ބިޑިއަޅުވައި، އަނިޔާވެރިކޮށް ހައްޔަރުކޮށްގެން ގެންދާ މަންޒަރެވެ.
މިނިވަން މީޑިއާ ނައްތާލާ ބިލު މަޖިލީހުން ފާސްކޮށްފައިވާއިރު، މަޖިލީހުގެ ޖަލްސާ ފެށުނީއްސުރެ ނިމެންދެން މި ބިލު ފާސްނުކުރުމަށް ގޮވާލައި ގިނަ އަދަދެއްގެ ނޫސްވެރިންނާއި އާންމު ރައްޔިތުން ވަނީ މުޒާހަރާކޮށްފައެވެ. މި މުޒާހަރާ ރޫޅާލުމަށް ފުލުހުން ވަނީ ހާލަތާ ނުގުޅޭ މިންވަރަށް ބާރުގެ ބޭނުންކޮށް، ބައެއް ނޫސްވެރިންނަށް ޖިސްމާނީ އަނިޔާ ކޮށްފައެވެ.
މި ބިލާ ދެކޮޅަށް އަޑުއުފުލި "އަދަދު" ނޫހުގެ އަހުމަދު އާއިދު، މުހައްމަދު ޝަހުޒާން އަދި "ދައުރު" ނޫހުގެ އަހުމަދު ނާއިފް ފަދަ ނޫސްވެރިންނަށް މަރުގެ އިންޒާރު ލިބިފައިވާކަން ފާހަގަކުރެވެ އެވެ.
ގާނޫނީ މާހިރުންނާއި ނޫސްވެރިކަމުގެ ދާއިރާގެ ތަޖުރިބާކާރުން ފާހަގަކުރާ ގޮތުގައި މި ބިލު ފާސްވުމާއެކު ދިވެހިރާއްޖޭގެ ނޫސްވެރިކަމުގެ މިނިވަންކަމަށް އެތަކެއް ޒަމާނެއް ފަހަތަށްގޮސް، ރައްޔިތުންގެ ޚިޔާލުފާޅުކުރުމުގެ މިނިވަންކަން ވެސް ހަނިވެގެންދާނެ ކަމުގައެވެ. އިދިކޮޅު ފަރާތްތަކުން ދެކޭގޮތުގައި މިއީ ވަރުގަދަ ޚުދުމުހުތާރު ވެރިކަމެއް އުފައްދަވަން ރައީސް މުއިއްޒު ކުރައްވާ މަސައްކަތްތަކުގެ ތެރެއިން ފާސް ކުރި ބިލެކެވެ.
