ރައްޔިތުންގެ ހުރި ކަންބޮޑުވުންތަކަށް ޖަވާބު ނުލިބިގެން ހައުސިން މިނިސްޓްރީ ދޮށުގައި އިހުތިޖާޖު ކޮށްފި

ބޯހިޔާވަހިކަމުގެ އެކި މަޝްރޫއުތަކާ ގުޅޭ ގޮތުން ހުރި އެކި އެކި މައްސަލަތަކަށް ސަރުކާރުގެ ފަރާތުން ޖަވާބެއް ނުލިބުމުގެ ސަބަބުން އެމްޑީޕީގެ މަޖްލިސް މެމްބަރުން ހިމެނޭ ގޮތަށް، ގިނަ ރައްޔިތުންތަކެއް ހައުސިން މިނިސްޓްރީ މިހާރު ހިންގަމުންދާ ދަރުބާރުގެ ކުރިމަތީގައި އިހްތިޖާޖު ކޮށްފިއެވެ.

މި އިހުތިޖާޖުގެ ބައިވެރިން ގޮވާލަމުން ދިޔައީ ބޯހިޔާވަހިކަމުގެ މަޝްރޫއުތަކާ ގުޅިގެން ރައްޔިތުންގެ ހުރި ކަންބޮޑުވުންތަކަށް ސާރުކާރުގެ ފަރާތުން ޖަވާބުދާރީ ވުމަށެވެ. ހައުސިން މަޝްރޫއުތަކާ ގުޅޭ ގޮތުން މިނިސްޓަރު މުއްތަލިބުގެ ފަރާތުން ޖަވާބެއް ހޯދަން މަސައްކަތް ކުރައްވާތާ މިހާރު އެތަކެއް މަހެއް ވެދާނެ ކަމަށް މި އިހްތިޖާޖުގައި ބައިވެރިވި އެމްޑީޕީގެ މަޖްލިސް މެމްބަރުން ވިދާޅުވެފައި ވެއެވެ.

Advertisement

އިހްތިޖާޖުގެ ބައިވެރިން ވަނީ އެމްޑީޕީގެ މި ނިމުނު ސަރުކާރުން ދޫކުރި ފްލެޓްތައް ހަވާލުކުރުމުގެ މަސައްކަތް އަވަސްކޮށް ދެފުށްފެންނާނެ ގޮތަށް އެކަން ކުރިއަށް ގެންދިއުމަށް ސަރުކާރަށް ގޮވާލައްވާފައެވެ. އަދި ފްލެޓްތަކުގެ އަގު ވެސް އެމްޑީޕީގެ ސަރުކާރުން ކަނޑައެޅި ވަރަށް ތިރިކޮށް، ފްލެޓްތަކުން ނަގަން ނިންމާފައިވާ އެޑްވާންސް ފައިސާ ނެގުން ހުއްޓާލުމަށާއި ރައީސް މުހައްމަދު މުއިއްޒު ވައުދުވެވަޑައިގެންފައިވާ ގޮތަށް ގުޅީފަޅު، ގިރާވަރުފަޅު އަދި ހުޅުމާލޭން ދޫކުރާ ގޯތި ހަވާލުކޮށް، ސަރުކާރުގެ ހަރަދުގައި ގެދޮރު އަޅައިދިނުމަށް އެދިވެސް އިހްތިޖާޖުގެ ބައިވެރިން އަޑުއުފުލާފައިވެއެވެ.

އެހެން ދުވަސްތަކާ ޙިލާފަށް ދަރުބާރުގެއަށް ނުވަދެވޭ ގޮތަށް ފުލުހުން މިއަދުވަނީ ބެރިކޭޑް ޖަހާ ބަންދުކޮށްފައެވެ. އިހްތިޖާޖުގެ ބައިވެރިން ދިޔައީ ބެރިކޭޑްތައް ނަގާ ހައުސިން މިނިސްޓްރީގެ އިމާރާތައް ވަދެވޭނެ ގޮތެއް ހަދައިދިނުމަށް ފުލުހުންގެ ކިބައިން އެދެމުންނެވެ. ފުލުހުން ހުރަސް އެޅުމުގެ ސަބަބުން އެސަރަހައްދަށް އެއްވެ ތިބި އާމުންނަށް އެތެރެއަށް ވަދެވޭގޮތް ވަނީ ނުވެފައެވެ. ނަމަވެސް ފުލުހުންނާ މުއާމަލާތު ކުރުމަށްފަހު އެސަރަހައްދުގައި ތިބި އެމްޑީޕީގެ ޕާލަމެންޓަރީ ގުރޫޕުގެ މެމްބަރުން ވަނިީ، މިނިސްޓަރ މުއްތަލިބުގެ ފަރާތުން ރައްޔިތުންގެ ސުވާލުތަކަށް ޖަވާބެއް ލިބޭނެ ކަމުގެ އުއްމީދުގައި ހައުސިން މިނިސްޓްރީގެ އިދާރާއަށް ވަދެފަ އެވެ.

އެބޭފުޅުންނަށް ލިބުނު ޖަވާބަކީ މިނިސްޓަރ މިވަގުތު އޮފީހުގައި ނޫޅުއްވާ ކަމަށެވެ. އަދި އެތައް އިރަކު ހައުސިން މިނިސްޓްރީގައި މަޑުކުރިފަހުން ދެން މިނިސްޓްރީގެ ފަރާތުން ދިން ޖަވާބަކީ ބައްދަލު ކުރާ ފެންވަރުގެ އެއްވެސް ބޭފުޅަކު މިހާރު އޮފީހުގައި ނޫޅުއްވާ ކަމަށެެވެ. މިކަމާ ގުޅިގެން ރައްޔިތުންގެ މަޖލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) ވިދާޅުވީ ރައްޔިތުންގެ މަޖިލީހުގެ މެންބަރުންގެސުވާލުތަކަށް ޖަވާބު ހޯދަން، މިހާ ދަތި ހާލުގައި އުޅެން ޖެހޭނަމަ އާންމު ރައްޔިތަކު މިފަދަ ވުޒާރާއަކުން މައުލޫމާތު ހޯދަން އުޅޭނެ ހާލު ތަސައްވުރުކޮށްލެވޭ ކަމަށެވެ.

އެމްޑީޕީގެ ފަރާތުން އިސްނަގައިގެން މިއަދު މި އިހްތިޖާޖު ކުރިޔަށް ގެންދިޔަ އިރު، އެޕާޓީއިން ދަނީ އޮކްޓޯބަރ މަހުގެ 3 ވަނަ ދުވަހު މާލޭގައި ބޮޑު މުޒާހަރާއެއް ކުރުމަށް ތައްޔާރު ވަމުންނެވެ. ރައީސް މުއިއްޒު، ވެރިކަމާއި ހަވާލުވި ދުވަހުން ފެށިގެން ގަސްތުގައި ރާވައިގެން ދިވެހިރާއްޖޭގެ ދުސްތޫރީ ނިޒާމް ހަލާކުކޮށްލުމުގެ ހަޑިހުތުރު މަސައްކަތް މެދުކެނޑުމެއް ނެތި ކުރަމުން ގެންދާތީ އެކަން ނިމުމަކަށް ގެނައުމަށް އެމްޑީޕީ އިން މާލޭގައި ބާއްވާ މި ބޮޑު އެއްވުމަށް ތައްޔާރުވުުގެ ގޮތުން އެޕާޓީ އިން އެކިއެކި ހަރާކާތްތައް ހިންގަމުންދެއެވެ. އެގޮތުން މީގެ ކުރިން މާލެ އަދި ހުޅުމާލެގައި ޕިކަޕް ޖަލްސާތަކެއްވެސް ބާއްވާފައިވެ އެވެ.