އިންޓަނެޓް ބޭންކިންއަށް ހޭލުންތެރިކުރުވުމަށް ބީއެމްއެލް އިން ކެމްޕޭނެއް ފަށައިފި
މާދަމާ ރޯޑްޝޯވް ބާއްވާނީ ފޭދޫ އާއި މަރަދޫގައި
ބީއެމްއެލް އިން ހުޅުދޫގައި ބޭއްވި ކެމްޕޭނުގެ ތެރެއިން
އިންޓަރނެޓް ބޭންކިންގ އަށް ކަސްޓަމަރުން އަހުލުވެރިކުރުމަށް ބީއެމްއެލް އިން ހާއްސަ ކެމްޕޭނެއް ފަށައިފިއެވެ.
މި ކެމްޕޭން ކުރިއަށް ގެންދިޔުމަށް ހަމަޖެހިފައިވަނީ މި މަހުގެ 1 އިން 30 އަށެވެ.
ކެމްޕޭންގެ ހަރަކާތްތައް ބޭންކުގެ ހުރިހާ ބްރާންޗުތަކުން ކުރިއަށް ގެންދާނެ ކަމަށާއި އެގޮތުން ހާއްސަ ރޯޑް ޝޯ ތަކެއް ރާއްޖޭގެ އާބާދީ ބޮޑު އެކި ރަށްރަށުގައި ކުރިއަށްގެންދާއިރު، މައުލޫމާތު ދިނުމާއި އެޕްލިކޭޝަން ބަލައިގަތުން ކުރިއަށްގެންދާނެ ކަމަށް ބީއެމްއެލްއިން ބުންޏެވެ.
މި ރޯޑް ޝޯ ތަކުގައި ވަގުތުން އިންޓަރނެޓް ބޭންކިންގ އަށް ރަޖިސްޓްރީކުރެވޭނެ ކަމަށާއި އަދި ކާޑު އެޕްލިކޭޝަންވެސް ބަލއިގަންނާނެ ކަމަށް ބީއެމްއެލްއިން ބުންޏެވެ.
މި ރޯޑް ޝޯތައް ފަށާފައިވަނީ އިއްޔެ އައްޑޫ ސިޓީ ހުޅުމީދޫ އިންނެވެ. ކުރިއަށް ހުރި ބައެއް ރޯޑް ޝޯތަކުގެ ތެރޭގައި އާދިއްތަ ދުވަހު އައްޑޫ ސިޓީ ހިތަދޫ ބޮޑު މަގު އާގަލާ މަރޓް އަދި މަލްޓި މާރޓް ކުރިމަތީގައި އިރުއޮއްސި ހައެއް ޖެހުމާއި ހަމައަށް ރޯޑްޝޯވްއެއް ކުރިއަށްދާނެ ކަމަށް ބީއެމްއެލްއިން ބުންޏެވެ. އަދި ހޯމަ ދުވަހު އައްޑޫ ސިޓީ ފޭދޫ އަދި މަރަދޫގައި ރޯޑް ޝޯވް ބާއްވާއިރު، އަންގާރަ ދުވަހު ވެލާނާގެ ކައިރީގައި އޮންނާނެއެވެ.
ބީއެމްއެލްއިން ކަސްޓަމަރުންނަށް ތަފާތު ގިނަ ހިދުމަތްތަކެއް ފޯރުކޮށްދެމުންދާއިރު އެންމެ ފަސޭހައިން މުސާރަ ޖަމާވި ގޮތް ބެލުމަށް، ކޮންމެ ތާކު ކޮންމެ ވަގުތަކު ހުރެގެން ފައިސާ މުޢާމަލާތްކުރުމަށް އިންޓަރނެޓް ބޭންކިންގ ބޭނުންކުރެވޭ ގޮތް ވަނީ ކަސްޓަމްރުންނަށް ފޯރުކޮށްދީފައެވެ.
