ރަޝިއާގައި އުފައްދައި ޓެސްޓުކުރަމުން އައި ކެންސަރު ވެކްސިން ޕްރީކްލިނިކަލް ޓްރަޔަލްތައް ކާމިޔާބުކަމާއެކު ފުރިހަމަކޮށް އެ ވެކްސިން އަކީ ކާމިޔާބު ވެކްސިން އެއްކަމަށް އިއުލާނުކޮށްފި އެވެ.

ރަޝިއާގެ އެންޓެރޯމިކްސް ކެންސަރު ވެކްސިން މިހާރުވަނީ ކްލިނިކަލް ބޭނުންތަކަށް ތައްޔާރުވެފައި ކަމަށް ފެޑެރަލް މެޑިކަލް އެންޑް ބަޔޮލޮޖިކަލް އޭޖެންސީ (އެފްއެމްބީއޭ) އިން ވަނީ ބުނެފަ އެވެ.

އެފްއެމްބީޑީގެ އިސްވެރިޔާ ވެރޯނިކާ ސްކްވޯޓްސޯވާ ވިދާޅުވި ގޮތުގައި އެމްއާރްއެންއޭ އަށް ބިނާކޮށް ތައްޔާރުކުރެވިފައިވާ މި ވެކްސިން ވަނީ ޕްރީކްލިނިކަލް ޓްރަޔަލްތައް ކާމިޔާބުކަމާއެކު ފުރިހަމަކޮށް، އޭގެ ރައްކާތެރިކަމާއި މަތީ ފެންވަރުގެ ނަތީޖާ ދައްކުވައިދީފައި ކަމަށެވެ.

މި ވެކްސިނުން ޓިއުމަރުތައް ކުޑަކުރުމާއި އޭގެ ދުވެލި މަޑުކުރުމުގައި ފާހަގަކުރެވޭ ނަތީޖާތަކެއް ދައްކުވައިދީފައިވާ އިރު، ތަކުރާރުކޮށް ބޭނުންކުރުމަށްވެސް ރައްކާތެރި ކަމަށް ބުނެ އެވެ. ސްކްވޯޓްސޯވާ ވިދާޅުވި ގޮތުގައި މި ވެކްސިން ތައްޔާރުކުރެވޭނީ ކޮންމެ ބަލިމީހެއްގެވެސް އަމިއްލަ އާރްއެންއޭ އަށް ބިނާކޮށް، އެމީހަކަށް ޚާއްސަކޮށްގެންނެވެ.

އޭނާ އިތުރަށް ވިދާޅުވި ގޮތުގައި މި ވެކްސިންގެ ފުރަތަމަ ވައްތަރު ބޭނުންކުރެވޭނީ ކޮލޮރެކްޓަލް ކެންސަރު ފަރުވާކުރުމަށް ކަމަށާއި، އަދި އެހެން ވައްތަރެއް ތަރައްޤީކުރެވެމުންދަނީ ގްލިއޯބްލާސްޓޯމާ އާއި ސިކުނޑީގެ ކެންސަރަށް އަދި ވަކި ބާވަތްތަކެއްގެ މެލަނޯމާ، ނުވަތަ ހަމުގެ ކެންސަރަށެވެ.