ރައީސްގެ ބާރުގެ ދަށުން ޔުކްރެއިން އަށް އެހީ ފޮނުވަން ޓްރަމްޕް ނިންމަވައިފި

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމައިގައި، އެމެރިކާގެ ރައީސް އަށް ލިބޭ ބާރުގެ ދަށުން ޔުކްރެއިން އަށް އެހީ ފޮނުވުމަށް އެ ޤައުމުގެ ރައީސް ޑޮނަލްޑް ޓްރަމްޕް ނިންމަވައިފި އެވެ.މިއީ އެމެރިކާގެ ރިޔާސީ ދެ ވަނަ ދައުރަކަށް ޓްރަމްޕް ވަޑައިގެންނެވި ފަހުން، އެމެރިކާ އިން ޔުކްރެއިން އަށް އެހީ ފޮނުވާނެ ފުރަތަމަ ފަހަރަވެ. އެގޮތުން ޓްރަމްޕް ނިންމަވާފައި ވަނީ ޔުކްރެއިން އަށް އަސްކަރީ އެހީތެރިކަން ފޯރު ކޮށްދިނުމަށެވެ. މިއީ ޕްރެޒިޑެންޝަލް ޑްރޯޑައުން އޮތޯރިޓީގެ ދަށުން ނިންމާފައިވާ ނިންމުމެކެވެ. އެމެރިކާ ސަރުކާރުގެ އިސް އޮފިޝަލަކާ ހަވާލާދީ މީޑިއާ ތަކުގައި ބުނެފައިވާ ގޮތުން މިއީ ގާތް ގަނޑަކަށް 300 މިލިއަން ޑޮލަރުގެ އެހީގެ ސާމާނެވެ. އޭގެ ތެރޭގައި ޕެޓްރިއޮޓް މިސައިލް އަދި މެދު ރޭންޖުގެ ރޮކެޓު ހިމެނޭނެ ކަމަށް ވަނީ ރިޕޯޓު ކޮށްފަ އެވެ. ނަމަވެސް، ޔުކްރެއިން އަށް ފޮނުވާނެ ވަކި ހަތިޔާރެއް ކަނޑައަޅާފައި ނުވާ ކަމަށް ވެސް ވަނީ ބުނެފަ އެވެ. ރަޝިޔާ އިން ޔުކްރެއިން އަށް ދެމުން އަންނަ ހަމަލާތައް އިންތިހާ އަށް ވަރުގަދަ ކޮށްފައި ވަނިކޮށް، މިދިޔަ އަންގާރަ ދުވަހު ޓްރަމްޕް ވަނީ އެމެރިކާ އިން ޔުކްރެއިން އަށް އެހީ ވާނެ ކަމަށް އިއުލާން ކޮށްފަ އެވެ. ޓްރަމްޕް ވެރިކަމަށް ވަޑައިގެންނެވި ފަހުން އެމެރިކާ އިން ޔުކްރެއިން އަށް އެއްވެސް އެހީތެރިކަމެއް ފޮނުވާފައި ނުވާއިރު، ފޮނުވާފައި ވަނީ ކުރީގެ ރައީސް ޖޯ ބައިޑަންގެ ސަރުކާރުގައި ހުއްދަ ދީފައިވާ ހަތިޔާރެވެ. ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމައިގައި މިހާތަނަށް ޓްރަމްޕްގެ ވިސްނުން ވަނީ އެކި ފަހަރު މަތިން ބަދަލުވެފަ އެވެ. ބައެއް ފަހަރު އެމެރިކާ އިން ޔުކްރެއިން އަށް ވަމުން އައި އެހީތެރިކަމަށް ފާޑު ވިދާޅުވެފައިވާއިރު، ރަޝިޔާ އަށް ތާއީދު ކުރައްވާ ކަމަށް ވެސް ވިދާޅުވެފައިވެ އެވެ. ނަމަވެސް، މި ފަހުން ޓްރަމްޕް ގެންދަވަނީ ރަޝިޔާ އަށް ފާޑު ވިދާޅުވަމުންނެވެ. ޔުކްރެއިން އަށް ދެވޭ އެހީގެ ގޮތުގައި މިވަގުތު ވެސް 3.86 ބިލިއަން އެމެރިކާ ޑޮލަރިގެ ހަތިޔާރު ފޮނުވުމުގެ ބާރު އެމެރިކާ އަށް އޮންނާނެ އެވެ. އެންމެ ފަހުން، މިއަހަރުގެ ޖަނަވަރީ މަހުގެ ނުވަ ވަނަ ދުވަހު، ކުރީގެ ރައީސް ބައިޑަން ވަނީ 500 މިލިއަން ޑޮލަރުގެ އެހީ ޔުކްރެއިން އަށް ދިނުމަށް ނިންމައިފަ އެވެ.