ފާއިތުވި 40 އަހަރުގެ ތެރޭގައި ލ. ކުނަހަންދޫ އަށް ވަޑައިގަތް ފުރަތަމަ ރައީސް އަކީ މުހައްމަދު މުއިއްޒު ކަމަށް ބުނެ ސަރުކާރުގެ މީޑިއާ ޕީއެސްއެމް އިން ދޮގު ޚަބަރު ފެތުރުމާ އެކު ގިނަ ބަޔަކު ފާޑު ކިޔައިފި އެވެ.

ގިނަ ބަޔަކު ވަނީ މި ޚަބަރާ ގުޅިގެން ވޭތުވެ ދިޔަ 40 އަހަރުގެ ތެރޭގައި ކުނަހަންދޫ އަށް ރައީސުން ކުރެއްވި ދަތުރުފުޅުތަކާ ބެހޭ ކުރީގެ ޚަބަރުތަކުގެ ސްކްރީން އިމޭޖްތައް ވެސް ސޯޝަލް މީޑިއާ ގައި ހާމަ ކޮށްފައެވެ.

ރައްޔިތުންގެ ޓެކްސް ފައިސާ އިން ހިންގާ ޕަބްލިކް ސާވިސް މީޑިއާ (ޕީއެސްއެމް) މިހާރު ވެފައި ވަނީ، އެތަން އުފެއްދި ގާނޫނީ މަގްސަދުން ބޭރުވެ ރައީސް މުއިއްޒުގެ ޕްރޮޕަގެންޑާ މެޝިނަކަށް ވެފައި ކަމަށް ބައެއް ފަރާތްތަކުން ވަނީ ބުނެފައެވެ.

ރައްޔިތުންނަށް ހަމަހަމަ ކަމާ އެކު ޚިދުމަތް ކުރުމަށް އުފައްދާފައިވާ ޕީއެސްއެމް އިން އޮކްޓޯބަރު މަހުގެ 20 ވަނަ ދުވަހު "40 އަހަރުތެރޭގައި ފުރަތަމަ ފަހަރަށް ކުނަހަންދޫ އަށް ރައީސަކު ވަޑައިގަތުން އެ ރަށު ރައްޔިތުންގެ ޝުކުރު" މި ސުރުޚީގެ ދަށުން ގެނެސްދިން ޚަބަރުގައި ބުނެފައި ވަނީ، އެންމެ ފަހުން ރައީސަކު އެރަށަށް ވަޑައިގަތީ 1978 ވަނަ އަހަރުގައި ކަމަށެވެ.

"ވޭތުވެދިޔަ 40 އަހަރުތެރޭ ކުނަހަންދޫ އަށް ފުރަތަމަ ފަހަރަށް ރައީސަކު ވަޑައިގަތުމުން އެ ރަށު ކައުންސިލުންނާއި ރަށު ރައްޔިތުން އެކަން ފާހަގަކޮށްފި،" ކަމަށް ވެސް މި ޚަބަރުގައި ވެއެވެ.

އޭގެ އިތުރުން "ވޭތުވެދިޔަ 40 އަހަރުތެރޭ ކުނަހަންދޫއަށް ފުރަތަމަ ފަހަރަށް ރައީސަކު ވަޑައިގަތުން ފާހަގަކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުނަހަންދޫ އަށް ވަޑައިގަތުމުން،" ކަމަށް ވެސް އިތުރަށް ޚަބަރު ގައި ވެއެވެ.

ރާއްޖޭގެ ތާރީޚް އޮޅޭ ގޮތައް ޕީއެސްއެމް އިން މި ޚަބަރު ގެނެސްފައި ވަނީ، ރައީސް މުއިއްޒު އޮކްޓޯބަރު 20 ވަނަ ދުވަހު އެ ރަށަށް ކުރެއްވި ދަތުރުފުޅުގައި އެ ރަށުގެ ކައުންސިލުގެ ރައީސް ދެއްކެވި ވާހަކަ އެއްގެ މައްޗަށް ބިނާ ކޮށްގެން ކަމަށް ބެލޭ އިރު، ޚަބަރު ގެެނެސްދީފައި ވަނީ މުޅިން ހަގީގަތް އޮޅޭ ގޮތައް ކަން ފާހަގަ ކުރެވެއެވެ.

"އަޅުގަނޑުމެންގެ ހަޔާތުން 40 އަހަރު ވެގެންދިޔައިރުގަ އަޅުގަނޑުމެންގެ ކައިރިއަށް އިންތިހާބީ ރައީސެއް ފުރަތަމަ ކުނަހަންދޫ ރައްޔިތުންނާ ބައްދަލްކުރުމަށްޓަކައި ވަޑައިގެންނެވި ފުރަތަމަ ފަހަރު ކަމަށް އުފަލާއެކު ފާހަގަކުރަން" ކުނަހަންދޫ ކައުންސިލްގެ ރައީސް ވިދާޅުވިއެވެ.

އެންމެ ފަހުން ރައީސަކު ކުނަހަންދޫ އަށް ޒިޔާރަތް ކުރެއްވީ 1978 ވަަނަ އަހަރުގައި ކަމަށް ޕީއެސްއެމް އިން ރިޕޯޓު ކުރި އިރު ރައީސް މައުމޫނު ވަނީ 11 މާޗް 1982 ގައި ކުނަހަންދޫ އަށް ޒިޔާރަތް ކުރައްވާފައެވެ.

އޭގެ އިތުރުން ޕީއެސްއެމް އިން މިވާހަކަ މި ގޮތައް ފެތުރި އިރު ރައީސް ޑރ. މުހައްމަދު ވަހީދު ވަނީ 1 އޭޕްރީލް 2012 ގައި ކުނަހަންދޫ އަށް ވަޑައިގަނެފައެވެ. މި ދަތުރުފުޅުގައި އޭރުގެ ހައުސިންގ މިނިސްޓަރުގެ ހައިސިއްޔަތުން ޚުދު މުއިއްޒު ވެސް ވަނީ ރައީސް ވަހީދުގެ އަރިހުގައި ކުނަހަންދޫ އަށް ވަޑައިގަނެފައެވެ.

އޭގެ އިތުރުން ކުނަހަންދޫ ގެ ބަނދަރުހެދުމުގެ މަސައްކަތް ފަށްޓަވައިދެއްވުމަށް ރައީސް ވަހީދު 17 އޭޕްރިލް 2013 ގައި ވެސް އެ ރަށަށް ވަޑައިގެންނެވި އެވެ.

އެ ދަތުރުފުޅުގައި ކުނަހަންދޫ ރައްޔިތުންނާ ބައްދަލު ކުރައްވާ ރައީސް ވަހީދު ދެއްކެވި ވާހަކަފުޅުގައި އެމަނިކުފާނު އެރަށަށް ވަޑައިގަތީ ރަށުގެ ރައްޔިތުންގެ ދައުވަތަކަށް ކަމަށް ވެސް ވިދާޅުވިއެވެ.

"ކުނަހަންދޫ ރައްޔިތުން އަޅުގަނޑަށް ދެއްވި ދަޢުވަތު، އަޅުގަނޑު މި ޤަބޫލު ކުރަނީ، ވަރަށް އުފަލާއެކީގައި. އެހެންވީމާ، އަޅުގަނޑު މިތަނަށް އައިސް މިހުރީ. ދެންވެސް ތިޔަބޭފުޅުންނަށް ހަމަ ޖެހިވަޑައިގަންނަވާނީ އަޅުގަނޑަށް އަންގަވައިލައްވަން. އަޅުގަނޑު ހުންނާނީ ތައްޔާރަށް އަންނަން." ރައީސް ވަހީދު ވިދާޅުވިއެވެ.

އަދި އޭގެ ފަހުން 29 އޯގަސްޓު 2023 ގައި ރައީސް އިބްރާހިމް މުހައްމަދު ސާލިހު ކުނަހަންދޫ އަށް ވަޑައިގެންނެވި އެވެ.

ރައީސް ސާލިހް ކުނަހަންދޫ އަށް ކުރެއްވި ދަތުރުފުޅުގައި އެރަށުގެ ރައްޔިތުންނާ ބައްދަލު ކުރައްވާ ވާހަކަފުޅު ދެއްކެވިއެވެ. އަދި ރަށުގެ ތަރައްގީ އަށް ޓަކައި ގިނަ ކަންތައްތަކެއް ކޮށްދެއްވާނެ ކަމަށް ވައުދުވެ ވަޑައިގަތެވެ.