ރިޔާސީ ދައުރެއް ދެ ބައިވީ، ހޯރަފުށި ތިބީ ތަރައްޤީގަ ކާނެ އެއްޗެއް ނެތިފައި ހައި ބަނޑާ: ކައުންސިލް ރައީސް
ހޯރަފުށީގެ ތަރައްޤީގެ ހަގީގީ ބާނީ އަކީ ކުރީގެ ރައީސް އިބްރާޙިމް މުހައްމަދު ޞާލިހު ކަމަށް ކައުންސިލް ރައީސް މުހައްމަދު ވަހީދު ވިދާޅުވި
"ހޯރަފުށީ ދުވަސް' ފާހަގަކުރުމުގެ ހާއްސަ ރަސްމީ ޖަލްސާގައި، ހޯރަފުށީ ކައުންސިލްގެ ރައީސް މުހައްމަދު ވަހީދު ވާހަކަދައްކަވަމުން
ރައީސް ޑރ.މުހައްމަދު މުއިއްޒުގެ ރިޔާސީ ދައުރު ދެ ބައިވީ އިރުގައި ހޯރަފުށި ތިބީ ތަރައްޤީގައި ލައިގެން ކާނެ އެއްޗެއް ނެތިފައި، ހައި ބަނޑާ ކަމަށް ހޯރަފުށީ ކައުންސިލްގެ ރައީސް މުހައްމަދު ވަހީދު ވިދާޅުވެއްޖެ އެވެ.
އޭނާ އެފަދައިން ވިދާޅުވީ "ހޯރަފުށީ ދުވަސް' ފާހަގަކުރުމުގެ ހާއްސަ ރަސްމީ ޖަލްސާގައި ވާހަކަދައްކަވަމުންނެވެ.
ވަހީދު ވިދާޅުވީ ނިމިދިޔަ ދައުރުގައި ހޯރަފުށްޓަށް ވަރަށް ގިނަ ކަންކަން ފުރިހަމަވި ކަމަށެވެ. ހޯރަފުށީގެ ތަރައްޤީއަށްޓަކާ އަދިވެސް ކުރަން ޖެހޭ ވަރަށް ގިނަ މަސައްކަތްތައް ހުރި ނަމަވެސް އެކަން ކުރެވޭނީ އެ ރަށްދެކެ ލޯބިވާ ވެރިޔަކަށް ކަަމަށް މުހައްމަދު ވަހީދު ވަނީ ވިދާޅުވެފައެވެ.
ހޯރަފުށިން ބޭނުންވާ ތަރައްޤީގައި މިހާރު ތިބީ ނިކަމެތި ފިޔަވަޅެއްގެ މަތީގައި ކަމަށް އޭނާ ވިދާޅުވިއެވެ. ގައުމުގެ ހާލަތު ގޯހުން ގޯހަށް ދާ ކަމަށް ފާހަގަކުރައްވާ އޭނާ ވިދާޅުވީ މި ވެރިކަމުގައި ތަރައްޤީގައި ހޯރަފުށި އޮތީ ވަރަށް ފަހަތުގައި ކަމަށެވެ.
"އަޅުގަނޑުމެންނަށް ހެދުނީ އެންމެ ގޯހެއް. އެޅުނީ އެންމެ ޅައެއްޗެއް. އެޅުނުތާ ވެސް އެޅުނީ ޅަ އިހަލަކުން ޅަ އެއްޗެއް. އެރުނީ އެންމެ ނުބައި ގޮޅިއަކަށް. ސައިގޮޅއަކަށް އެވެސް. އަދިވެސް އަޅުގަނޑުމެން މިތިބީ ތަރައްްޤީގައި ބޮޑު ބޮލާ، ދެ މަންތިރި އާއި އަހާ އެ މަނާފުކުގެ އެހީގާ ވެސް ސައިން އަދިވެސް ނުފިލައޭ އިނގޭތޯ." އޭނާ ވިދާޅުވިއެވެ.
ހޯރަފުށީގެ ތަރައްޤީގެ ހަގީގީ ބާނީ އަކީ ކުރީގެ ރައީސް އިބްރާޙިމް މުހައްމަދު ޞާލިހުކަމަށާއި ރައީސް ޞާލިހުގެ ވެރިކަމުގައި ހޯރަފުށީގެ ތަރައްޤީ އަށް ޚާއްސަ އިސްކަމެއް ދެއްވާފައިވާ ކަމަށް މުހައްމަދު ވަހީދު ވިދާޅުވިއެވެ. އެ ރަށުގެ އެއާޕޯޓްގެ މަސައްކަތް ފުރިހަމަ ކުރުމަށް ކޮވިޑް-19އިގެ ބަލިމަޑުކަމުގައި ވެސް މުހިންމު މަސައްކަތްތަކެއް ކުރި ކަމަށާއި އެއީ ވަރަށް ބޮޑު ޤުރުބާނީތަކެއްގެ ނަތީޖާ ކަމަށް އޭނާ ވިދާޅުވިއެވެ.
އަދި އެ ދާއިރާގެ ތަރައްޤީ ގެނައުމުގައި ރައްޔިތުންގެ މަޖިލީހުގެ ކުރީގެ މެމްބަރު އަހުމަދު ސަލީމް އަދާކުރައްވާފައިވާ އިސް ދައުރު ފާހަގަކުރައްވާ ސަލީމް އަށް މުހައްމަދު ވަހީދު ވަނީ ވަރަށް ބޮޑަށް ތައުރީފްކުރައްވާފަ އެވެ. އެ ރަށުގެ ތަރައްޤީއަށްޓަކާ ސަލީމް ކޮށްދެއްވީ އަގު ނުކުރެވޭ ވަރުގެ ބުރަ މަސައްކަތްތަކެއް ކަމަށް ވެސް އޭނާ ވަނީ ވިދާޅުވެފަ އެވެ.
"ހޯރަފުށީގެ ތަރައްޤީގެ ބާނީ އަކީ ތަރައްޤީގެ، ހަގީގީ "ކިންގް" އަކީ ރައީސް ޞާލިހު. ސައްލެގެ ޚިދުމަތް ހަނދާންކުރަމުން ޒިކުރާކުރަމުން ސައްލެ އަށް ވެދުން ކުރަން. ހޯރަފުށި މިދެކޭ ރަބީއީ ތަރައްްޤީގައި އެންމެ ޚިދުމަތްތެރި ޚިދުމަތްތެރިއަކީ އަހުމަދު ސަލީމް" އޭނާ ވިދާޅުވިއެވެ.
އޭނާ ވަނީ ހޯރަފުށީގެ އެއާޕޯޓަކީ އެ ރަށަށް ލިބުނު ރީތި ނަމެއްކަން ފާހަގަކުރައްވާފައެވެ. އަދި އެ އެއާޕޯޓުގެ ސަބަބުން ހޯރަފުށީގެ ނަން ވިދާލި ކަމަށާއި އެއީ ރަށުގެ ތަރައްޤީ އަށް ލިބުނު ކުރިއެރުމެއް ކަަމަށް އެނާ ވިދާޅުވިއެވެ. ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގައި ހޯރަފުއްޓަށް 16 ވަރަކަށް މަޝްރޫޢު ހިންގި ކަމަށް އޭނާ ވިދާޅުވިއެވެ. އެ ވެރިކަމުަގައި ހޯރަފުށީގައި އިތުރު ވަޒީފާގެ ފުރުސަތުތައް ހުޅުވުނު ކަމަށް ވެސް އޭނާ ވަނީ ވިދާޅުވެފައެވެ. އެ މަޝްރޫޢުތަކުގެ އަގު މިލިއަނުން ގުނާލެވޭ ކަމަށް އޭނާ ވަނީ ވިދާޅުވެފައެވެ.
