ނޫސްވެރިކަމުގެ މިނިވަންކަން ކޮންޓްރޯލް ކުރާ ބިލަކީ މި ސަރުކާރުގެ މުނާފިގުކަން ދައްކުވައިދޭ މިސާލެއް: ވަހީދު
ރައީސް މުއިއްޒު ވަރަށް އަނިޔާވެރި ވެރިކަމެއް ކުރައްވަން ފަހަރަކު ކަމެއް ޓެސްޓު ދަނީ ޓެސްޓު ކުރައްވަމުން
ރާއްޖެޓީވީގެ ޓީވީޓޯކް ޕްރޮގްރާމްގައި ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު ވާހަކަ ދައްކަވަނީ
ނޫސްވެރިކަމުގެ މިނިވަންކަން ކޮންޓްރޯލް ކުރާ ބިލަކީ މިސަރުކާރުގެ މުނާފިގުކަން ދައްކުވައިދޭ މިސާލެއް ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި ވަހީދު ވިދާޅުވީ ރައީސް ޑރ.މުހައްމަދު މުއިއްޒު ވަރަށް އަނިޔާވެރި ވެރިކަމެއް ކުރައްވަން ފަހަރަކު ކަމެއް ޓެސްޓު ކުރައްވަމުން ގެންދަވާ ކަމަށެވެ. އެގޮތަށް ފަހަރަކު ކަމެއް ކުރަމުން ގޮސް، ޕީއެންސީގެ ރައްޔިތުންގެ މަޖިލީހުގެ މެންބަރުންގެ ބާރުކަނޑުވާލައި، މިހާރު ނޫސްވެރިކަމުގައި ތަޅުއެޅުވުމުގެ މަސައްކަތް ފަށާފައިވާ ކަމަށް އޭނާ ވިދާޅުވިއެވެ.
ކަންކަމުގައި މަޝްވަރާއަށް އިސްކަންދޭކަން ދެއްކުމަށް ސަރުކާރުން މަސައްކަތް ކުރާކަން ފާހަގަކުރައްވައި ވަހީދު ވިދާޅުވީ މަޖިލީހުގެ ޕީއެންސީ މެންބަރުންނަށް އަމިއްލަ ދިފާއުގައި އަދި ބޮޑެތި މައްސަލަތަކުގައި ވާހަކަ ނުދެއްކޭއިރު، އާއްމު ރައްޔިތަކަށް އެ ފުރުސަތު ނުލިބޭނެ ކަމަށެވެ.
ވަހީދު ވިދާޅުވީ ގައުމުގެ ކަންކަން ދަނީ ގޯހުންކަން އެނގިތިބެ، ހުރިހާ ކަމެއް ސާފުކޮށް ފެންނައިރު ވެސް ހަގީގަތް އޮޅުވާލުމަށް މަސައްކަތް ކުރާ ކަމަށާއި، ޕީއެންސީގެ ބޭފުޅުންނަކީ ހަމަޖެހޭ ބައެއް ކަމާމެދު ސުވާލު އުފެދޭ ކަމަށެވެ. އަދި ނޫސްވެރިކަމުގެ މިނިވަންކަން ހަނިކުރާ ބިލަކީ މިސަރުކާރުގެ މުނާފިގު ސިފަ ދައްކުގައިދޭ ކުޑަކުޑަ މިސާލެއް ކަމަށް އޭނާ ވިދާޅުވިއެވެ.
އަމިއްލަ މީހަކު ލައިގެން އުޅޭ އެއްޗެއް. ސަރުކާރުން ލައިގެން އުޅޭ އެއްޗެއް ނޫން. ސަރުކާރާ ބައިވެރިވުމެއް ވެސް ނެތް. އެކަމަކު ބަންޑާރަނައިބު ނުކުންނަވާފައި، ވަޒީރުން މަގުމައްޗަށް ނުކުމެ އަތް އުކާ، ބިލު ދިފާއު ކުރާ ހިސާބަށް ގޮސްފައި ދެން. މިދެންނެވިހެން މިމީހުން ކުރާ ކޮންމެ ކަމެއްގައި ވެސް މުނާފިގުކަން ދެ މޫނުގެ ސިފަ ފެންނަ ކުޑަ ކުޑަ މިސާލެކޭ މި ބިލަކީ. ހަގީގަތަކީ ވާހަކަ ދެއްކުމަކީ މަޖިލީހުގެ ގާނޫނު އަސާސީ ދެތިން ހަތަރުގަޑީރުގެ ތެރޭގައި ބަދަލުކޮށްލި ބައެއް މިއީ. ދެން ކޮންމެ އެއްޗެއް ހުޅުވާލާ ރައްޔިތުން ހިޔާލަށް. ވާހަކަދައްކައިގެން ކޮންކަމެއްތޯ ވަނީ.ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު
ވަހީދު ވިދާޅުވީ ރާއްޖޭގައި އަނދިރިއަނދިރިން ވެރިކަން ހިންގަމުން ދިޔައިރު ވެސް އެންމެންގެ ކަރަށް ރާ އަޅައި، އެންމެން މަރާގަތުލު ނުކުރާ ކަމަށާއި، ބައެއް މީހުންނަށް ހަދިޔާ ބަދިޔާވެސް ދީފައިވާ ކަމަށެވެ. ނަމަވެސް އެދުވަސްވަރު ވެސް އަނދިރިއަނދިރިންނާ ދެކޮޅުވެރިވެ، ދިވެހިންގެ ދީނާ ދިވެހިންގެ މިނިވަންކަމާ ދިވެހިންގެ ސަގާފަތާއި މިކަންކަމުގެ ދިފާއުގައި ބަސްބުނާ މީހަކަށް އަނިޔާކުރާ ކަމަށް އޭނާ ވިދާޅުވިއެވެ. އަދި މިއަދު ރާއްޖޭގައި މިއޮތީ އެހާލަތު ކަމަށާއި، މީޑީއާތައް ކޮންޓްރޯލް ކުރުމަށް މަސައްކަތް ކުރަމުންދަނީ އަނިޔާވެރިކަން އިސްކުރުމަށް ކަމަށެވެ.
ނަމަވެސް ރައީސް މުއިއްޒުގެ މަޑުމައިތިރިކަމާއި، ވައުދުފުޅު ފުއްދަވާ ކަމަށާއި، އެމަނިކުފާނަށް ޅެން ބަހުރުވައިން ޅެން ކިޔައި، އެމަނިކުފާނު ޕްރޮމޯޓް ކުރާނަމަ ރާއްޖޭގެ ހުރިހާ މީޑިއާއެއް ވަރަށް ރަނގަޅުވާނެ ކަމަށް ވަހީދު ވިދާޅުވިއެވެ.
މީގެ އިތުރުން ވަހީދު ވިދާޅުވީ ޕީއެންސީގެ ބޭފުޅުންނަށް ފާޑުކިޔުން ހަޖަމްނުވާނެ ކަމަށާއި، ޑިމޮކްރެޓިކް ތޮބީއަތް ނޭނގޭ ކަމަށެވެ.
އެކަމަކު މިއުޅެނީ ތަންދޮރު ވެސް ނޭނގެނީ އަނެއްކާ ޑިމޮކްރެޓިކް ތޮބީއަތް ވެސް ނޭނގެނީ. ފާޑުކިޔުން އެއްވެސް ގޮތަކަށް ހަމަޖުވެސް ނުވަނީ. ފުރަތަމަ ކަމަކަށް ތި ހުރިހާ ކަމެއް ގުޅޭ ރާއްޖެ އައިސްފައި މިއޮތީ މަލްޓިޕާޓީ ޑިމޮކްރަސީއާ އަޅުގަނޑުމެންގެ. ޕީއެންސީގައި މަޝްވަރާއެއް އޮންނަކަން އެނގިއްލާވާތޯ. ދުވަހަކު ދެކުނިންތޯ ސެނެޓެއް ގައުމީ މަޖިލީހެއް ކަހަލަ އެއްޗެއް މަޝްވަރާކޮށް ބަހެއް ބުނެ، ވޯޓެއް ނަގާފައި. ނޯންނާނެ. މިމީހުންގެ ތޮބީއަތުގައި ނޯންނާނެ ހިޔާލުތަފާތުވުމެއް އެނގޭތޯ. ހަމަ ވެރިމީހާއަށް ފެނިވަޑައިގަންނަވާ ގޮތް އެދުވަހު ހޭފުޅުލައްވާއިރުގައި މޫޑު ހުންނަ ގޮތް އެއީ އޮންނަ ގޮތް. ދެން ދިވެހި ހުރިހާ ރައްޔިތުން ޖެހޭނީ އެމޫޑަށް ތަބާވެގެން އުޅެން. ނޫޅޭ މީހެއް ވެއްޖެއްޔާ ދެން އެމީހަކު މިއްލަތުން އެވީ ބޭރުވާން އެނގޭތޯ.ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު
ވަހީދު ވިދާޅުވީ ރާއްޖެ މިދަނީ އަނދިރީގެ ތެރެއަށް ކަމަށާއި، މިގޮތަށް ދާން ދޫކޮށްލުން ގައުމަށް އަދި ރައްޔިތުންނަށް އެފޯޑް ނުކުރެވޭނެ ކަމަށެވެ.
