އާދީއްތަ ދުވަހުގެރޭ ރާއްޖޭގެ ހުރިހާ ރަށެއްގައި ކޭތަ ނަމާދު ކުރާނެ

އާދީއްތަ ދުވަހުގެރޭ ރާއްޖޭގެ ހުރިހާ ރަށެއްގައި ކޭތަ ނަމާދު ކުރުމުގެ އިންތިޒާމު ހަމަޖައްސަން އިސްލާމިކް މިނިސްޓްރީން އަންގައިފި އެވެ. މިނިސްޓްރީން ބުރާސްފަތި ދުވަހު ނެރުނު ސާކިއުލާގައި ބަޔާންކޮށްފައިވާ ގޮތުގައި، އާދީއްތަ ދުވަހުގެރޭ ރާއްޖޭގެ ގަޑިން 8:28 ހާއިރު ހަނދުކޭތަ ހިފަން ފަށާނެ އެވެ.

މިނިސްޓްރީން މަޢުލޫމާތު ދެއްވާފައިވާ ގޮތުގައި، އެރޭ އެންމެ ބޮޑަށް ކޭތަ ހިފާފައި ހުންނާނީ 11:11 ހާއިރުއެވެ. އަދި ހަނދުކޭތަ ވީއްލޭނީ މެންދަމުން އަލިވެ 1:55 ހާއިރުގަ އެވެ. މީހުން ދިރިއުޅޭ ހުރިހާ ރަށެއްގެ އެންމެ ބޮޑު މިސްކިތުގައި ރޭގަނޑު 11:12 ގައި ކޭތަ ނަމާދުކުރުމުގެ އިންތިޒާމު ހަމަޖައްސައިދިނުމަށް މިނިސްޓްރީން ކައުންސިލްތަކަށް އަންގާފައިވެ އެވެ.

ފަލަކީ އިލްމުގެ ތަޖުރިބާކާރެއް ކަމަށްވާ ޢަބްދުﷲ ރަޝީދު (ލިނެޓް) ވިދާޅުވެފައިވާ ގޮތުގައި، މި ހަނދުކޭތަ އެންމެ ފުރިހަމައަށް ފެންނާނެ އެއް ގައުމަކީ ދިވެހިރާއްޖެއެވެ. ސަބަބަކީ ކޭތަ އެންމެ ފުރިހަމަވާ ވަގުތުގައި ހަނދު ހުންނާނީ މާލެ އޮންނަ ޠޫލަށްވުރެ (ލޮންޖިޓިޔުޑް) 13 ދަރަޖަ އިރުމަތީގައި، ހަ ދަރަޖަ ދެކުނު ޠޫލުގައި (ލެޓިޓިޔުޑް) ކަމަށްވުމުން، ހަނދު ފެންނާނީ މާލެއަށް މެދު އުޑުގައި ހުންނައިރު ހުންނަ ފަދަ ގޮތެއްގައި މެދުއުޑާ ދާދި ކައިރީގައި ކަމަށް ވާތީއެވެ.

ހަނދުކޭތަ ހިފަނީ އިރާއި ބިމާއި ހަނދު ސީދަލަށް އެތުރި، އިރުގެ އަލިކަމުގެ ސަބަބުން ހަނދަށް ދުނިޔޭގެ ހިޔަނި އެޅުމުގެ ސަބަބުންނެވެ. މި ވަގުތުގައި ހަނދު ފެންނާނީ ފުސްރަތް ކުލައެއްގައި ނުވަތަ "ބްލަޑް މޫން" ގެ ގޮތުގައެވެ. މިއީ އިރުގެ ބައެއް ދޯދިތައް ދުނިޔޭގެ ޖައްވުން ގޮސް ހަނދަށް އެޅުމުގެ ސަބަބުން ކުރިމަތިވާ ޤުދުރަތީ މަންޒަރެކެވެ.

މާލޭގައި ކޭތަ ނަމާދު ކުރާނީ އިސްލާމީ މަރުކަޒުގައެވެ. އަދި ހުޅުމާލޭގައި ކުރާނީ މަސްޖިދުއް ޝައިޚް ޤާސިމް ބިން އަލްޘާނީ މިސްކިތް ނުވަތަ ގުއްބު މިސްކިތުގައެވެ. އިސްލާމިކް މިނިސްޓްރީން އަންގާފައިވާ ގޮތުގައި ކޭތަ ނަމާދުގެ ޚުތުބާ އެ މިނިސްޓްރީގެ ވެބްސައިޓުން އާދީއްތަ ދުވަހު ފެންނަން ހުންނާނެ އެވެ.

ފަލަކީ ހިސާބުތަކުން ދައްކާ ގޮތުގައި، މިފަދަ ފުރިހަމަ ހަނދުކޭތައެއް ރާއްޖެއަށް ދެން ފެންނާނީ 2028 ވަނަ އަހަރުގެ ޑިސެމްބަރު މަހުގެ 31 ވަނަ ދުވަހު އެވެ.