އިސްރާއީލްގެ ހަމަލާތަކުގައި ދުވާލަކު 28 ކުޑަކުދިން ޝަހީދުވަމުން ދާއިރު، ގައްޒާގެ ނަރަކައިގެ ދޮރުތައް ހުޅުވެމުންދާކަމަށް އިސްރާއީލްގެ ދިފާއީ ވަޒީރު ވަނީ ބުނެފައެވެ. ޣައްޒާ ހަނގުރާމައިގައި 64,000 އަށްވުރެ ގިނަ މީހުން ޝަހީދުވެ، ގާތްގަނޑަކަށް 162,000 މީހުން ޒަޚަމްވެފައިވާއިރު، އިތުރު އެއް މިލިއަން މީހުން ދެކުނަށް ހިޖުރަ ކުރަން މަޖުބޫރު ވާނެ ކަމަށް ބެލެވެއެވެ.
އިސްރާއީލުގެ ހަނގުރާމަ މަތީ މަތިންދާ ބޯޓުތަކުން ޣައްޒާ ސިޓީގައި ހުންނަ މުޝްތަހާ ޓަވަރަށް ބޮން އަޅައި ފުނޑުފުނޑު ކޮށްލައިފި
ޣައްޒާގައި "ނަރަކައިގެ ދޮރުތައް" ހުޅުވެމުންދާ ކަމަށް އިސްރާއީލްގެ ދިފާއީ ވަޒީރު ބުނެފިއެވެ.
އޭނާ މިހެން ބުނީ، ޣައްޒާ ސިޓީގެ އާބާދީ ބޮޑު ސަރަހައްދެއްގައި ހުރި އުސް ޓަވަރެއް ގޮއްވާލައި، އިތުރު ގިނަ އުސް އިމާރާތްތައް ގޮއްވާލާނެ ކަމަށް އިންޒާރުދީ، ޣައްޒާ ހިސޯރު ކުރުމަށް އިސްރާއީލުގެ އަސްކަރިއްޔާ އިން ހަނގުރާމަ ވަރުގަދަ ކުރުމުންދާ ވަގުތެއްގައެވެ.
އިސްރާއީލީ ބާރުތަކުން ހުކުރު ދުވަހު ޣައްޒާގެ އެކި ސަރަހައްދުތަކުން މަދުވެގެން 44 މީހުން ޝަހީދު ކޮށްލާފައިވެއެވެ. މީގެ ތެރޭގައި ޣައްޒާ ސިޓީ އަށް ދިން ހަމަލާތަކުގައި ޝަހީދުވި 7 ކުޑަކުދިން ހިމެނެއެވެ.
އިސްރާއީލު ސިފައިން ބުނާ ގޮތުގައި މިހާރު ޣައްޒާ ސިޓީގެ 40 އިންސައްތަ އެމީހުންގެ ކޮންޓްރޯލްގައިވާ ކަމަށާއި، މަދަނީ ކޭމްޕްތަކާއި އާންމުން ދިރިއުޅޭ ގެތަކަށް ދޭ ހަމަލާތައް އިތުރުކޮށްފައިވާ ކަމަށެވެ. ޔުނިސެފްއިން މިހާރުގެ ހާލަތު ސިފަކޮށްފައި ވަނީ "ވިސްނުމަށް ގެނެވޭ ވަރަށްވުރެ ގޯސް" ކަމަށެވެ.
ޣައްޒާގެ ހެލްތް މިނިސްޓްރީން ބުނާ ގޮތުގައި އިސްރާއީލްގެ ހަމަލާތަކުގައި ޝަހީދުވި މީހުންގެ ތެރެއިން މަދުވެގެން 30 އިންސައްތައަކީ ކުޑަކުދިންނެވެ. އޮކްޓޯބަރު 2023 އިން ފެށިގެން ކޮންމެ ދުވަހަކު 28 ކުޑަކުދިން ޝަހީދުވެއެވެ.
އޮކްޓޯބަރު 2023 ގައި ހަނގުރާމަ ފެށުނީއްސުރެ، މަދުވެގެން 64,231 މީހުން ޝަހީދުވެ، 161,583 މީހުން ޒަޚަމްވެފައިވެއެވެ. އަދި އެތައް ހާސް މީހުން ފުނޑުވެފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ބެލެވެއެވެ.
އިސްރާއީލްގެ އައު ހަމަލާތަކާ ގުޅިގެން ގާތްގަނޑަކަށް އެއް މިލިއަން މީހުން ޣައްޒާ އިން ދެކުނަށް ހިޖުރަކުރަން މަޖުބޫރު ވާނެ ކަމަށް ލަފާކުރެއެވެ.
މަސްދަރު: އަލް ޖަޒީރާ
