އެމެރިކާގެ މެޑިކަލް ޖަމިއްޔާ ތަކުން، ހެލްތު ސެކްރެޓަރީ ކެނެޑީގެ އިސްތިއުފާ އަށް ގޮވާލައިފި

އެމެރިކާގެ މެޑިކަލް ޖަމިއްޔާ ތަކުން، އެ ޤައުމުގެ ހެލްތު ސެކްރެޓަރީ ރޮބާޓް އެފް ކެނެޑީ ޖޫނިއާ މަގާމުން އިސްތިއުފާ ދިނުމަށް ގޮވާލައިފި އެވެ.

އެމެރިކާގެ 20 އަށް ވުރެ ގިނަ މެޑިކަލް ޖަމިއްޔާ ތަކުން ވަނީ ހެލްތު ސެކްރެޓަރީ ކެނެޑީގެ އިސްތިއުފާ އަށް ގޮވާލައި ބަޔާނެއް ނެރެފަ އެވެ. މިއީ ކެނެޑީގެ ސިޔާސަތު ތަކުގެ ސަބަބުން އެމެރިކާގެ ރައްޔިތުންގެ ޞިއްޙަތަށް ނުރައްކާވަމުންދާ ކަމަށް ބުނެ ގޮވާލާފައިވާ ގޮވާލުމެކެވެ.

ސެންޓާސް ފޯ ޑިޒީޒް ކޮންޓްރޯލް (ސީޑީސީ)ގެ ކުރީގެ ޑިރެކްޓަރުން ވެސް ވަނީ ކެނެޑީގެ ނިންމުން ތަކާ މެދު ކަންބޮޑުވުން ފާޅު ކުރައްވައިފަ އެވެ. އެ ބޭފުޅުންނަކީ މީގެ ކުރިން ޑިމޮކްރެޓިކް ޕާޓީ އަދި ރިޕަބްލިކަން ޕާޓީގެ ސަރުކާރު ތަކުގެ ދަށުން ވެސް އިސްކޮށް މަސައްކަތް ކުރައްވާފައިވާ ބޭފުޅުންނެވެ. ވަކިން ޚާއްސަކޮށް، ސީޑީސީގެ ޑިރެކްޓަރު ވަޒީފާ އިން ވަކި ކުރުމަށް ކެނެޑީ ނިންމި ނިންމުމާ މެދު އެ ބޭފުޅުން ވަނީ ފާޑު ވިދާޅުވެފަ އެވެ.

ޖަމިއްޔާ ތަކުގެ ބަޔާނުގައި ބުނެފައި ވަނީ މިވަގުތު އެމެރިކާ އަށް ބޭނުން ވަނީ ހާމަކަން ބޮޑު، އަދި ތެދުވެރި މުއާމަލާތްތައް ކުރިއަރުވާނެ އިސްވެރިން ތަކެއް ކަަމަށެވެ. އެހެން ނަމަވެސް، މީޣެ އަހަރު ތަކެއް ވަންދެން ފުރާނަ ސަލާމަތް ކުރުމަށް ކުރެވިފައިވާ ސައިންޓިފިކް ދިރާސާތައް އެއް ފަރާތްކޮށް، ޞިއްޙީ ކުރިއެރުންތައް ފަހަތަށް ޖައްސާލުމަކީ ޤަބޫލު ކުރެވޭނެ ކަމެއް ނޫން ކަަމަށް ވެސް އެ ބަޔާނުގައި ވަނީ ބުނެފަ އެވެ.

ހެލްތު ސެކްރެޓަރީ ކެނެޑީގެ މަގާމުގައި އެންމެ ފާހަގަ ކޮށްލެވޭ ނިންމުން ތަކުގެ ތެރޭގައި، މިއަހަރުގެ މެއި މަހުގެ ތެރޭހައި ކުޑަ ކުދިންނާއި މާބަނޑު އަންހެނުންނަށް ކޯވިޑް-19 ވެކްސިން ދިނުމުގެ ފެޑަރަލް ލަދާ އެރުވުން ހިމެނެ އެވެ.އއަދި އޭގެ ފަހުން ޖޫން މަހުގެ ތެރޭގައި ސީޑީސީގެ ވެކްސިން ލަދާފޭ ކޮމެޓީގެ މެމްބަރުން ވަކި ކުރުމަށް ފަހު، ކެނެޑީގެ އަމިއްލަ ވިސްނުމާ އެއްް ގޮތަށް ހިތްވަރުދޭ ބަޔަކު އެ މަގާމު ތަކަށް އައްޔަން ކުރުން ހިމެނެ އެވެ.

ސީޑީސީގެ ޑިރެކްޓަރު ސޫސަން މޮނާރެޒް ވަޒީފާ އިން ވަކި ކުރުމާ ގުޅިގެން، އެތައް އިސް އޮފިޝަލުން ތަކެއް ވަނީ މަގާމުން އިސްތިއުފާ ދީފަ އެވެ. މީގެ އިތުރުން، 1000 އަށް ވުރެ ގިނަ މިހާރުގެ އަދި ކުރީގެ ހެލްތު އެންޑް ހިއުމަން ސާވިސަސް ޑިޕާޓްމަންޓުގެ މުވައްޒަފުން ވަނީ ކެނެޑީ އިސްތިއުފާ ދިނުމަށް ނުވަތަ، މަގާމުން ވަކި ކުރުމަށް ގޮވާލައި ސިޓީއެއް ގައި ސޮއި ވެސް ކޮށްފަ އެވެ.

ކެނެޑީއާ ދެކޮޅަށް އެތައް ބަޔަކު ވާހަކަ ދައްކަމުން އަންނަ ދަނޑިވަޅެއްގައި، ސޯޝަލް މީޑިއާގައިި ކުރެއްވި ޕޯސްޓެއްގައި އޭނާ ވިދާޅުވެފައި ވަނީ، އޭނާގެ މަޤުސަދަކީ ސީޑީސީގެ އަމާޒު އަނބުރާ ގައިން ގަޔަށް އަރާ ބަލިތަކާ ދިމާލަން ބަދަލު ކުރުން ކަމަށެވެ. އަދި ހާމަ ކަމާއި ޤާބިލު ކަމުގެ ތެރެއިން އަލުން އިތުބާރު ބިނާ ކުރުން ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕް، ރިޔާސީ ދެ ވަނަ ދައުރަކަށް ވަޑައިގެންނެވުމަށް ފަހު ކެނެޑީ ހެލްތު ސެކްރެޓަރީ ކަމަށް އައްޔަން ކުރައްވާފައި ވަނީ މިއަހަރުގެ ފެބްރުވަރީ މަހުގެ 13 ވަނަ ދުވަހު އެވެ.