ފަޔަރ ޓްރަކު ހަލާކުވެގެން ބަންދުކުރި ފުވައްމުލަކު އެއަރޕޯޓު 48 ގަޑިއިރު ފަހުން ހުޅުވައިފި
3 ސެޕްޓެމްބަރު 2025 | ބުދަ 06:04ބަންދުކުރި މުއްދަތުގައި ބައެއް ދަތުރުތައް ގަން އިންޓަނޭޝަނަލް އެއަރޕޯޓަށް ވަނީ ބަދަލުކޮށްފަ
ފުވައްމުލަކު އެއަރޕޯޓް
ފަޔަރ ޓްރަކު ހަލާކުވެގެން ވަގުތީގޮތުން ބަންދުކުރި ފުވައްމުލަކު އެއަރޕޯޓު 48 ގަޑިއިރު ފަހުން ހުޅުވައިފި އެވެ.
ރާއްޖެ އެމްވީ އަށް އެނގިފައިވާ ގޮތުގައި ފުވައްމުލަކު އެއަރޕޯޓު ބަންދު ކޮށްފައިވަނީ މިދިޔަ ހޯމަ ދުވަހު ހަވީރު އެވެ. ފަޔަރ ޓްރަކަށް ދިމާވި މައްސަލަ ހައްލު ކުރުމަށް ފަހު އަލުން އޮޕަރޭޝަންސް ފަށާފައިވާއިރު ފުރަތަމަ ދަތުރު އޮތީ ބުދަ ދުވަހު ހަވީރު އެވެ. އަލިފާން ނިއްވާ އުޅަނދެއް ނެތި އެއަރޕޯޓު ހިންގުމަކީ ހުއްދަކަމަށް ނުވާތި ވޭތުވެދިޔަ 48 ގަޑިއިރު އެ އެއަރޕޯޓުގެ ހިދުމަތް އެއްކޮށް ވަނީ ހުއްޓިފަ އެވެ.
އެކަމުުގެ ސަބަބުން ފްލައިޓް ތައް ކެންސަލްވެ ދަތުރުވެރިންގެ ޝަކުވާތައް ގިނަވުމުން ބައެއް ދަތުރުތައް ގަން އިންޓަނޭޝަނަލް އެއަރޕޯޓަށް ވަނީ ބަދަލުކޮށްފަ އެވެ.
ރާއްޖެ އެމްވީ އަށް މިކަމުގެ މައުލޫމާތު ހިއްސާކުރި މޯލްޑިވިއަންގެ މީޑިއާ އޮފިޝަލް ވިދާޅުވީ، ފުވައްމުލަކު އެއަރޕޯޓު މިހާރު ހުޅޫވާލައިފި ކަމަށާއި މޯލްޑިވިއަންގެ ފުރަތަމަ ދަތުރު އޮތީ ބުދަ ދުވަހު ހަވީރު ކަމަށެވެ.
