ފުރާޅަށް ވެއްޓިދާނެ ކަމަށް ބަލާފައި ނަގައި ދިނުމަށް އެދުނު ރުށް، ނަގަން އުޅެނިކޮށް ވެއްޓުނީ ފުރާޅަށް
ރުއް ވެއްޓިފައިވަނީ ސީދާ ކައުންސިލްގެ އިހުމާލުން، އެ މަސައްކަތް ކުރުމަށް ބޭނުންކުރީ ފީވެފައި އޮތް ވަލެއް
ތުރާކުނުގައި ގެއަކަށް ރުކެއް ވެއްޓިފައިވާ މަންޒަރު
ގޭގެ ވެރިފަރާތުން އެދިގެން ހއ ތުރާކުނު ކައުންސިލުން ކެނޑި ރުކެއް، ރުއްކަނޑަން އެދުނު މީހާގެ ގޭގެ ފުރާޅު މައްޗަށް ވެއްޓި ބޮޑެތި ގެއްލުންތަކެއް ލިބިއްޖެ އެވެ.
ރާއްޖެ އެމްވީ އާއި ވާހަކަދައްކަމުން އެގޭގެ ވެރިފަރާތުން ބުނީ، އެ ރުއް ނަގައިދިނުމަށް އެދި ކައުންސިލަށް ސިޓީއެއް ލީ، އެރުކަކީ ގެއާއި ވަރަށް ކައިރި ހުރި ރުކަކަށް ވެފައި، ވައި ބާރު ދުވަހެއްގައި ގެއަށް ވެއްޓިދާނެތީ ކަމަށެވެ. އަދި ސިޓީ ލުމުން އެ ރުކުގެ ވެރިފަރާތަށް ބަދަލުދީ އެ ރުއް ނެގުމުގެ ތެރޭގައި އެގޭގެ ފުރާޅު މައްޗަށް ވެއްޓިފައިވާ ކަމަށް ގޭގެ ވެރިފަރާތުން ބުނެ އެވެ.
އޭނާ ބުނީ ރުއް ނެގުމުގެ މަސައްކަތް ކުރީ ހެނދުނު ކަމަށާއި އަދި އެރުއް އެގޭގެ ފުރާޅު މައްޗަށް ވެއްޓުނު ފަހުން މިވަގުތާ ހަމައަށް ވެސް ކައުންސިލުގެ ބަހެއް ލިބިފައި ނުވާކަމަށެވެ. އަދި ރުއް ވެއްޓިފައިވަނީ ސީދާ ކައުންސިލް ގެ އިހުމާލުން ކަމަށާއި އެ މަސައްކަތް ކުރުމަށް ބޭނުންކުރީ ފީވެފައި އޮތް ވަލެއް ކަމަށް އޭނަ ބުންޏެވެ.
މި ހާދިސާގައި އެގޭގެ ސީލިންގ ގެ ބޮޑު ބައެއް ހަލާކުވެފައި ވާއިރު މަގުފާރު ރެނދުލާފައިވާ ކަމަށް ގޭގެ ވެރިފަރާތުން މައުލޫމާތު ދެއެވެ. އޭގެ އިތުރުން ފުރާޅާއި ފައިދޮއްތަކަށް ވެސް ބޮޑެތި ގެއްލުންތަކެއް ލިބިފައިވާކަމަށް އޭނާ ބުންޏެވެ.
އަދި ކައުންސިލަކުން ނުގުޅާ. ހެނދުނު ވީ ކަމެއް އަދި ކައުންސިލަކުން އަޅުގަނޑަކަށް ނުގުޅާ އެއްވެސް ވަރަކަށް މިކަމެއް ވެއްޖޭވެސް އެހެން ވެއްޖޭ ބުނާކަށްވެސް. ދެން މީސް މީހުން ފޮނުވާފަ ހުރި ފޮޓޯތަކާ ވީޑިއޯތައް އަޅުގަނޑު އަތުގަ ހުރީ.ގޭގެ ވެރިފަރާތް 11:37 ގައި ރާއްޖެ އެމްވީ އަށް ދެއްވި އިންޓަވިއު
މި ހާދިސާއާ ގުޅިގެން ތުރާކުނު ކައުންސިލްގެ ރައީސް އަލީ އަބްދުއްލަތީފް ވިދާޅުވީ، ރުއް ވެއްޓުނު ވަގުތު އެޓެންޑް ވެފައިވާނެ ކަމަށާއި ނަމަވެސް އެވަގުތު އަތޮޅު ކައުންސިލްގެ މީޓިން އެއް އޮތުމުން މީޓިން އަށްވެސް އެޓެނޑް ވާން ޖެހުނު ކަމަށެވެ. އަދި އެ ވަގުތު އެ ސަރަހައްދުގައި ކައުންސިލް ގެ އެހެން މުވައްޒަފުންނާއި ފެނަކައިގެ މުވައްޒަފުންގެ އިތުރުން އާންމު ރައްޔިތުންވެސް ހަރަކާތްތެރިވަމުން ދިޔަކަމަށް އަބްދުއްލަތީފް ވިދާޅުވި އެވެ.
އަބްދުއްލަތީފް ވިދާޅުވީ އެ ކައުންސިލުން މީގެ ކުރިންވެސް ރުއްގަސް ނެގުމުގެ މަސައްކަތް ކުރަނީ ވާ ޖަހައިގެން ކަމަށެވެ. ސަބަބަކީ ރަށުގައި ރުއްގަސް ނެގޭނެ އެހެން ނިޒާމެއް ނެތުމުން ކަމަށް އޭނާ ފާހަގަ ކުރި އެވެ. އަދި އެކަމުގައި ކައުންސިލްގެ އިހުމާލެއް ނެތް ކަމަށާއި ކޮންމެ ކަމެއް ކޮންމެ ގޮތަކަށް ކުރި ނަމަވެސް ކަމެއް ދިމާވެދާނެ ކަމަށް ކައުންސިލްގެ ރައީސް އަބްދުއްލަތީފް ވިދާޅުވި އެވެ.
އަބްދުއް ލަތީފް ވިދާޅުވީ ގޭގެ ވެރިފަރާތާއި ގުޅަން ދެ ފަހަރަށް މަސައްކަތް ކޮށްފައިވާނެ ކަމަށައި އެހެން ނަމަވެސް އެ ފަރާތާއި ގުޅޭގޮތް ނުވި ކަމަށެވެ.
