މީޑިއާ ކޮންޓްރޯލް ބިލު ފާސްކޮށްފި ނަމަ ސަރުކާރުން ބޭނުންވެއްޖެ ހާލަތެއްގައި ސޯޝަލް މީޑިއާތައް ބޭން ކުރެވޭނެ!

މީޑިއާތައް ކޮންޓްރޯލް ކުރާ ބިލު ފާސްކޮށްފި ނަމަ އެ ބިލުގެ 60 ވަނަ މާއްދައިގެ ދަށުން ސަރުކާރުން ބޭނުންވެއްޖެ ހާލަތެއްގައި ސޯޝަލް މީޑިއާތައްވެސް ބޭން ކުރެވޭނެ އެވެ.

ގާނޫނީ ވަކީލް މުހައްމަދު ނިޝާން އިބްރާހިމް ރާއްޖެއެމްވީ އަށް ދެއްވި ޚާއްސަ އިންޓަވިއުއެއްގައި ވިދާޅުވީ، މީޑިއާ ކޮންޓްރޯލް ކުރާ ބިލުގައި ބަޔާންކޮށްފައިވާ ބައެއް ކަންތައްތަކާއި ގުޅޭގޮތުން ސަރުކާރުން އަތޮޅުތެރޭގެ ރައްޔިތުންނަށް މައުލޫމާތު ދިނުމަށްޓަކައި އަދި އެބޭފުޅުންގެ ވިސްނުމުގައި ހުރިގޮތް އެނޫން ގޮތަކަށް ފުރޮޅާލުމަށްޓަކައި އަތޮޅުތެރެއަށް ވަފްދުތައް ފޮނުވައިގެން މަސައްކަތް ކުރައްވަމުން ގެންދާ ކަމަށެވެ.

މި ބޭފުޅުންގެ މައިގަނޑު އެއް ނަގްސަދަކަށް މިއޮތި އިލެކްޓްރޯނިކް މީޑިއާގެ ތެރޭގަ ފޭސްބުކްއާ މި ބާވަތުގެ ދިވެހި ރައްޔިތުން ފޯނުގެ ޒަރިއްޔާއިން މި ބޭނުންކުރާ މުއާމަލާތްތައް މީގެ ތެރެއަށް ނުވަންނާނެ ކަމަށް ބުނެ އެކަން ރައްޔިތުންނަށް ވިސްނަދިނުމަށްޓަކައި އެ މަސައްކަތް ކުރައްވަނީ

ނިޝާން

ނިޝަން ވިދާޅުވީ އެބޭފުޅުން އެގޮތައް ވަކާލާތު ކުރި ކަމުގައި ވިޔަސް ގާނޫނުގަ ނުވަތަ އެ ބިލުގައި ބުނެފައި އޮތް މަފްހޫމަށް ރިއާޔަތް ކުރަން ޖެހޭކަމަށެވެ. އެގޮތުން އެބިލުގައިވާ 60 ވަނަ މާއްދާގައި ބަޔާންކޮށްފައިވަނީ "މި ޤާނޫނުގައި ނޫހާ ގުޅޭގޮތުން ބަޔާންކޮށްފައިވާ އުސޫލުތައް، އިލެކްޓްރޯނިކް މީޑިއާއަށްވެސް، އެ މީޑިއާގުޅޭ ނިސްބަތަކަށް ހިނގާނެއެވެ. އަދި ނޫސްވެރިންނާ ގުޅޭގޮތުން މި ޤާނޫނުގައި ބަޔާންކޮށްފައިވާ އުސޫލުތައް، އިލެކްޓްރޯނިކް މީޑިއާގައި މަސައްކަތްކުރާ މީހުންނަށް، އެމީހުންނާގުޅޭ ނިސްބަތަކަށް ހިނގާނެއެވެ."

ނިޝާން ވިދާޅުވީ 60 ވަނަ މާއްދާއިން ވަރަށް ސާފުކޮށް އިންޓަނެޓުގެ ޒަރިއްޔާއިން ބޭނުންކުރާ ބޭނުންކުރުންތައް މީގެ ތެރެއަށް ވަންނަ ކަމަށް ބަޔާން ކުރާ ކަމަށެވެ. އަދި މި ގާނޫނުގައި އިންޓާނެޓުގެ ޒަރިއްޔާއިގަ ބޭނުންކުރާ މައުލޫމާތު ތަކަކީ ނުވަތަ މުއާމަލާތްތަކަކީ ކޮބައިކަން އެ ގާނޫނުގެ 80 ވަނަ މާއްދާގައި މާނަ ކޮށްދީފައިވާ ކަމަށެވެ.

އެގޮތުން އެ ބިލުގައިވާ 80 ވަނަ މާއްދާގެ ބ ގައި ބުނެފައިވަނީ "އިލެކްޓްރޯނިކް މީޑިއާ" ކަމަށް ބުނެފައި އެވަނީ އޯޑިއޯ، ވީޑިއޯ، ޓޭޕާއި ޑިޖިޓަލް ސްޓޯރޭޖް މީޑީއާއާއި އިންޓަނެޓަށެވެ." މި މާއްދާގައި ފާހަގަ ކޮށްފައިވާ ކަންކަން އިތުރަށް ތިލަކޮށްދެއްވައި ނިޝާން ވިދާޅުވީ، އިންޓާނެޓުގެ ޒަރިއްޔާއިން ކުރާ މުއާމަލާތްތަކަކީ އާންމުކޮށް މީހުން ބޭނުންކުރާ ފޭސްބުކް އާއި ޓުވިޓާ އަދި ޓެލެގްރާމް ފަދަ އާންމު ޒަރިއްޔާތައް ކަމަށެވެ.

ޖުމްލަ ގޮތެއްގައި 60 ވަނަ މާއްދާ އާއި 80 ވަނަ މާއްދާގެ ބ ގައި ވާ ކަންކަމަށް ބަލާއިރު މި ގާނޫނުގައި ނޫސްތަކާއި ބެހޭގޮތުން ނުވަތަަ މީޑިއާތަކާއި ބެހޭގޮތުން އައިސްފައިވާ ހުރިހާ ކަންތައްތަކެއް ސޯޝަލް މީޑިއާގައި ނުވަތަ އިންޓަނެޓުގެ ޒަރިއްޔާއިން ބޭނުންކުރާ ބޭނުން ކުރުންތަކުގެ މައްޗަށް ގާނޫނު ބަޔާންކުރާ ހުރިހާ ކަމެއް އެމީހުންގެ މައްޗަށް ތަންފީޒު ކުރެވޭނެ ކަމަށް ނިޝާން ވިދާޅުވި އެވެ.