އިހަވަންދިއްޕޮޅުގައި އާގުބޯޓުފަހަރަށް ޚިދުމަތް ދިނުމަށް ކުރަންޖެހޭ ކަންކަން ކުރިއަށް ގެންދަން ރައީސް އަންގަވައިފި
އުލިގަމަކީ ޒަމާނުއްސުރެ ގިނަ އަދަދަކަށް ޔޮޓު ބަނދަރު ކުރާ ގުދުރަތީ ބަނދަރެއް
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު
އިހަވަންދިއްޕޮޅުގައި އާގުބޯޓުފަހަރަށް ޚިދުމަތް ދިނުމަށް ކުރަންޖެހޭ ކަންކަން ކުރިއަށް ގެންދަން ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު ސަރުކާރުގެ ގުޅުންހުރި އިދާރާތަކަށް އަންގަވައިފިއެވެ.
ރައީސް އެގޮތަށް އަންގަވާފައިވަނީ ރާއްޖޭގެ އެންމެ އުތުރުން އިހަވަންދިއްޕޮޅުގައި ބައިނަލްއަގްވާމީ ކޮންޓެއިނަރ ޓްރާންސްޝިޕްމެންޓް ބަނދަރެއް ޤާއިމު ކުރެވެންދެން، އެސަރަޙައްދުން ދަތުރުކުރާ އާގުބޯޓުތަކުން މިވަގުތު ވެސް އިޤްތިޞާދީ ނަފާ ރާއްޖެއަށް ލިބިދާނެ ހުށަހެޅުންތަކަކާއެކު، ރައީސަށް ޤަރާރެއް ހުށައަޅާފައިވާތީއެވެ.
މި ޤަރާރަކީ މިދިޔަ ޑިސެމްބަރު މަހުގެ 30 ވަނަ ދުވަހު ހއ. ހޯރަފުއްޓާއި، ތުރާކުނާއި، އުލިގަމުގެ ކައުންސިލު މެމްބަރުން ސޮއިކުރައްވައި ނެރުއްވާފައިވާ ޤަރާރެކެވެ. ހޯރަފުށި، ތުރާކުނު އަދި އުލިގަމުގެ ކައުންސިލު މެމްބަރުން ހިމެނޭ ގޮތަށް މި ޤަރާރުގައި 17 މެމްބަރަކު ވަނީ ސޮއިކުރައްވާފައެވެ.
ޤަރާރުގައި މައިގަނޑު ގޮތެއްގައި ވަނީ އިހަވަންދިއްޕޮޅުގައި ޓްރާންސްޝިޕްމަންޓް ބަނދަރެއް ޤާއިމު ކުރެވެންދެން ވެސް އެސަރަޙައްދުގެ އިޤްތިޞާދީ ނަފާ ހޯދުމަށްޓަކައި މިވަގުތަށް ބޭނުންވާ 3 ކަމެއް ފެށޭނެ މަގުފަހިކޮށްދެއްވުމަށް އެދިލައްވާފައެވެ.
ރާއްޖެއެމްވީއަށް އެނގިފައިވާ ގޮތުގައި ދެމެހެއްޓެނިވި ގޮތެއްގައި ކައުންސިލުން ފާހަގަކޮށްފައިވާ ޚިދުމަތްތައް ދިނުން މުހިއްމުކަމަށް ފެންނަކަމަށް ރައީސް އޮފީހުން ދެކެއެވެ. ވުމާއެކު، އެކަންކަން ތަންފީޒު ކުރުމަށް ޤަރާރުގައި ހުށައަޅާފައިވާ ކަންކަން ފުރިހަމަ ކުރުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓުން އިސް ނަގައިގެން މަސައްކަތްތައް ކުރިއަށް ގެންދިއުމަށް ރައީސް ސާލިޙު ވަނީ އިކޮނޮމިކް މިނިސްޓްރީއަށް އަންގަވާފައެވެ.
ރައީސް ސާލިޙު ވަނީ އިކޮނޮމިކް މިނިސްޓްރީން އިސްނަގައިގެން ޑިފެންސް މިނިސްޓްރީއާއި، ޓްރާންސްޕޯޓް މިނިސްޓްރީއާއި، ގުޅުންހުރި އިދާރާތަކާއެކު މަޝްވަރާކޮށް، އެކަންކަން ކުރިއަށް ގެންދިއުމަށް ބުދަ ދުވަހު އެމިނިސްޓްރީއަށް އަންގަވާފައެވެ.
އިހަވަންދިއްޕޮޅުގައި އާގުބޯޓުފަހަރަށް ޚިދުމަތްދީގެން ދިވެހިރާއްޖޭގެ އިޤުތިޞާދު ފުޅާކުރުމުގެ ވާހަކައަކީ ޒަމާނުންސުރެ ދެކެވެމުން އަންނަ ވާހަކައެކެވެ. އެހެންނަމަވެސް، މިއަދާއި ހަމައަށް އައިއިރު އެކަމަށް އެއްވެސް އަމަލީ ސިފައެއް ގެނެވިފައިނުވާއިރު، ޓްރާންސްޝިޕްމަންޓް ބަނދަރެއް ޤާއިމު ކުރެވެންދެން ވެސް އެ 3 ޙަރަކާތް އެ ސަރަޙައްދުގައި ފެށޭނެ މަގުފަހިކޮށްދެއްވުމަށް ޤަރާރުގައި މެމްބަރުން ވަނީ އެދިލައްވާފައެވެ.
އެ ކަންކަން ފެށުމާއެކު އެ ސަރަޙައްދުގައި ޓްރާންސިޕްމަންޓް ބަނދަރެއް ހެދުމަށް އޮންނަ ޑިމާންޑް ބޮޑުވެ، އެކަމަށް އިންވެސްޓްކުރަން ވިސްނާ ފަރާތްތަކުގެ ޝައުގުވެރިކަން އިތުރުވެގެންދާނެކަމަށް ކައުންސިލުން ދެކެއެވެ.
