ހއ. ތުރާކުނު ޕޮލިސް ޑެސްކު ރަސްމީކޮށް މިއަދު ހުޅުވައިފިއެވެ.

މި ޑެސްކް ހުޅުއްވައިދެއްވާފައި ވަނީ އެކަމަށްޓަކައި މިއަދު ބޭއްވި ރަސްމިއްޔާތުގައި މިނިސްޓަރ އޮފް ހޯމް އެފެއާޒް ޢިމްރާން ޢަބްދުﷲއާއި ކޮމިޝަނަރ އޮފް ޕޮލިސް މުޙައްމަދު ޙަމީދެވެ.

މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ޢިމްރާން ވިދާޅުވީ, މުޅި ރާއްޖެއަށް ފުލުހުންގެ ޚިދުމަތް ފުޅާކުރުމަށްޓަކައި ފުލުހުންގެ މުއައްސަސާއިން ގިނަ މަސައްކަތްތަކެއް ކުރައްވަމުން ގެންދަވާކަމަށާއި, މިހާރު އެ ޚިދުމަތް ދިނުމުގެ އެންމެ މުހިންމު އަސާސީ ފަލްސާއަކީ އަވައްޓެރި ފުލުހުންގެ ނުވަތަ ނެއިބަރހުޑް ޕޮލިސް ޚިދުމަތްކަމަށެވެ.

އަދި އެޚިދުމަތް ގާއިމުކުރެވިގެން ދަނީ ކޮންމެހެން ކުށް އުފެދިގެން ނުވަތަ އުފަންވެފައި އޮތުމަކުން ނޫންކަމަށާއި, ކުުށާ ހަމައަށް ދިއުމުގެ ކުރިން, ކުށަކަށް ވެދާނެ ކަންކަން ދެނެގަނެ މުޖުތަމައު ސަލާމަތްކުރުމަށްޓަކައި ކުރެވޭ މަސައްކަތުގެ ތެރެއިންކަން މިނިސްޓަރ ފާހަގަކުރެއްވި އެވެ.

މީގެ އިތުރުން ކޮމިޝަނަރ އޮފް ޕޮލިސް ވިދާޅުވީ, ފުލުހުންގެ ޚިދުމަތުގެ ގާނޫނަށް އަމަލުކުރަމުންދާއިރު، ފުލުހުންގެ މަސައްކަތްތައް އިންތިޒާމުވެފައިވާ ގޮތް ވަރަށް ސާފުކޮށް ގާނޫނުގައި ކަނޑައަޅާފައިވާކަމަށެވެ.

އަދި ލާމަރުކަޒީކޮށް ޚިދުމަތް ދިނުމަށާއި މުޖުތަމައުއާ އޮންނަ ގުޅުން ދެމެހެއްޓުމަށް ވަރަށް ބޮޑަށް ގާނޫނުން ބާރުއަޅާފައިވާކަން ފާހަގަކުރައްވައި ކޮމިޝަނަރ ވިދާޅުވީ, ފުލުހުންގެ މަސައްކަތްތައް އަމާޒުކޮށްފައިވަނީ ރައްޔިތުންނަށް ފުލުހުން ދޭ ޚިދުމަތް އަލުން ތަރުތީބުކޮށް ޑިމޮކްރެޓިކް ވެއްޓަކަށް އެކަށޭނަ, ތަރައްގީވެފައިވާ ފުލުހުންގެ ޚިދުމަތްތަކެއް މުޅި ރާއްޖެއަށް ފޯރުކޮށްދޭ މުއައްސަސާއަށް އެ ޚިދުމަތް ބަދަކުރަމުން ގެންދިއުމަށްކަމަށެވެ. މިއަދު ތުރާކުނުގައި ޕޮލިސް ޑެސްކެއް ހުޅުވިގެންދާކަމީ އެއަމާޒަށް ވާސިލްވުމަށް އެޅުނު ވަރަށް މުހިންމު ފިޔަވަޅެއް ކަމަށްވެސް ކޮމިޝަނަރ ވިދާޅުވިއެވެ.

ފުލުހުންގެ ސްޓްރެޓީޖަކް ޕްލޭންގައި ލޯކަލް ޕޮލިސިންގ ކަނޑައަޅާފައިވަނީ އަތޮޅުތެރޭގައި ދެވޭ ފުލުހުންގެ ޚިދުމަތްތަކަށް އިތުރު އަހައްމިއްޔަތުކަމެއް ދިނުމުގެ ގޮތުން ކަމަށްވެސް ކޮމިޝަނަރ ވިދާޅުވިއެވެ. މިއަދުން ފެށިގެން, ހޯރަފުށިން ފުލުހުން އައިސް ދެމުން ދިޔަ ޚިދުމަތަށް ނިމުން އައިސް, ތުރާކުނުގައި ފުލުހުންގެ ޚިދުމަތް ދެވިގެންދާނީ ރައްޔިތުންނާ ކައިރިންކަމަށް ޕޮލިސް ކޮމިޝަނަރ ޙަމީދު ވިދާޅުވި އެވެ.

އަދި ޕޮލިސް ޑެސްކެއް ގާއިމުވެގެން ދިއުމާއެކު, މިހާރު ކުރިމަތިވެފައިވާ ކޮވިޑް-19ގެ ޕެންޑަމިކް ފަދަ ކަމެއް މެދުވެރިވާ ހާލަތެއްގައި, ރައްޔިތުންނާއި ކައުންސިލާއި ހެލްތު ސެންޓަރާ ގުޅިގެން މަސައްކަތްކުރަންޖެހޭ ކުރުުމުން ފެށިގެން, ރަށުގައި ހިންގާ ކުށުގެ އަމަލުތަަކަށް ފާރަވެރިވެ އެކުށްތައް ހުއްޓުވުމަށް އަތޮޅުގައި ގާއިމުވެފައިވާ ފުލުހުން ޓީމުތަކާއެކު މަސައްކަތްކުރުމާއި, ރައްޔިތުންނާއެކު ގާއިމުކުރެވޭ ގުޅުމުގެ ތެރެއިން ފުލުހުންގެ މަގުސަދުތައް ހާސިލްކުރުމަށް ކޮންމެ ދުވަހަކު މަސައްކަތް ކުރެވިގެންދާނެކަމަށްވެސް ވިދާޅުވިއެވެ.

މި ރަސްމިއްޔާތުގައި ޑެޕިއުޓީ ކޮމިޝަނަރ އޮފް ޕޮލިސް ޢަލީ ރަޝީދާއި އަޕަރ ނޯތު ޕޮލިސް ރީޖަން ކޮމާންޑަރ ޗީފް ސްޕްރިންޓެންޑެންޓް މުޙައްމަދު ޝިހާމްއާއި ރައްޔިތުންގެ މަޖިލީހުގެ ހޯރަފުށީ ދާއިރާގެ އިއްޒަތްތެރި މެމްބަރު އަޙްމަދު ސަލީމް ބައިވެރިވެވަޑައިގެންނެވި އެވެ. އަދި ހއ. އަތޮޅު ކައުންސިލްގެ ރައީސްއާއި ތުރާކުނު ކައުންސިލްގެ ރައީސްއާއި ފުލުހުންގެ ސީނިއަރ ބައެއް އޮފިސަރުންގެ އިތުރުން, ތުރާކުނު ރައްޔިތުންނާއި ފުލުހުން ބައިވެރިވިއެވެ.